我呢個文肓為左打一個月嘅遊記打得開心過癮又舒服，決定以我嘅母語－廣東話動筆。之後嘅內容含有粗皮不雅、嚴重錯別字或難以理解用語，請多多指教，歡迎直接指出錯誤。
除左之前去絲綢之路時打過一編講促成原因，往後嘅日子都無再講每次旅程嘅成事經過啦！因為真係無乜特別，就係"去囉！去囉！"，就開心心咁去完返黎吶！新相識或唔係同我好熟嘅朋友都曾幾何時問"點解你去D咁嘅地方嘅？" "點解你咁想去南美嘅？"
咁就要由long long time ago開始講啦.....
話說當年我仲係18、22嘅時候，南美係邊都唔多知，咪話有咩國家tim啦，連瑪雅文明係乜都up唔出！就係呢個時候，明珠台用3秒都唔知有無嘅廣告套餐幫一套戲賣廣告。就係呢3秒！仲要係只見過呢個廣告出現2次咁大把！呢套戲就成為我渴望去南美洲嘅關鍵－阿波卡獵逃(Apocalypto) 故事其實好簡單，大概講發生係瑪雅文明後古典時期，瘟疫與戰爭不斷的年代，祭師用活人獻祭求神靈保佑講男主角成為戰俘，點樣逃過成為活人祭同救返老婆仔女。呢套戲引起我對瑪雅文化興趣，亦定下咗我嘅世界之旅以古蹟為前進路線。再黎就係一套PIXAR嘅卡通片UP，講位老伯年青時想同老婆一齊去環遊南美，結果儲錢儲到7老80，老婆死埋都未去到，結果童軍肥仔嘅出現，令固執嘅老伯把心一橫做左間汽球屋飛過去。故仔寫得好，公仔又靚，感情位又交代細膩，真係差D睇到喊！而故事背景取材於委內瑞拉嘅平頂山(Mount Roraima)，都鈎起我兒時同老豆一齊睇變變變生命力嘅記憶。話說5歲睇佢又係咁嘅㨾，廿幾年之後佢仲係無變嘅白頭阿伯David......喘曬氣係平頂山上介紹獨特嘅物種（豬籠草都係呢度獨有品種），果刻我真心仰慕佢！總總以上無聊因素，加埋阿爸阿媽無心無意嘅栽培下......係囉！就係咁！
而呢次旅程咁快成行，都要多謝一位認識唔係好耐嘅朋友，一直push 啊push.......叫我去啦去啦！出發前有多次想取消行程嘅強烈意念，心諗相機唔夠勁wor，要換又無錢、儲唔夠旅費wor、仔仔要我照顧wor、唔夠時間plan行程wor。實際係我真心恐懼人生大目標達到左，之後又以咩寄託，去邊搵動力呢？！最後，lonely planet都差D比我揭爛，website又bookmark左一堆，行程咁就出世，如期出發如期歸巢，仲以為自己會跳飛機T_T
![]()
2015年3月底到南美洲33日，㨂左遊歷秘魯和玻利維亞嘅大景點如下。食住行和手信控制在Hkd15,000。機票直接同America airline買可再平少少，而家用Hkd11,350。整個行程洗費Hkd26,350。
HK>Puerto Maldonado>Tambopata National Reserve>Cusco>Aquas Calientes>Machu Picchu>Sacred Valley>Ollantaytambo>Cusco>Puno>La Paz>Uyuni>copacabana >Arequipa >Nazca>Paracas>Pisco>Lima>HK
