【魔鬼炸生蠔】神人串燒秘密基地 @ 佐敦武士

武士形象深居簡出, 不苟言笑, 俠義, 刀法了得; 佐敦文英街亦有一名武士, 隱藏小巷, 堅忍不拔, 武功了得, 廚技一流. 他的名字叫阿偉.

武士門外, 無窗無隔, 重門深鎖, 石屎牆上更貼有「私人地方」的告示, 我問阿偉, 不怕趕客嗎? 

穿著背心, 束有黃昏清兵衛辮子的偉:「費事太煩呀, 遲啲穩定啲, 請多啲幫手, 先對外開放麻...」(果然係真武士精益求精, 佩服!佩服!)

我向偉請教有何推薦食物? 他望一望我便回答:「寫得出嚟全部都可以㗎啦...不過啲客話廣島燒（御好味燒)好食喎, 炸蠔好唔好? 你有細路仔, 忌廉餅同雞翼啦!!」(原來E個麻甩佬都幾細心吓喎!)

武士原址位於尖沙嘴利時一小巷內, 今年年三十晚才正式搬來佐敦入舖, 阿偉:「係利時後巷做咗三年, 終於儲夠錢, 又覺得係時候, 米搬囉, 要搬就梗係揀近我住嘅地方啦, 文英街啱晒!」

炸蠔是武士必食之選, 魔鬼生蠔似在呼喚你~食我啦, 食我啦...好食到想叫救命.

食完武士炸生蠔你一定會覺得不枉此生, 回家執相出文時, 一望見魔鬼生蠔的外貌, 口水不其然又大量分泌出來, 好想好想再食呀!!

軟軟腍腍的燒牛舌, 又夠彈性, 又夠厚, 燒得超入味, 好爽口, 精采到暈.

燒雞翼, 明太子雞翼, 各自各好味, 如果要梗性比較, 略嫌燒雞翼我吃中了大量鹽份的位置, 感覺窒了一下.

明太子雞翼, 巧妙的一分為二, 中翼位置釀入了份量不少的明太子, 外皮略脆, 雞味與明太子味道混合一起, 武士的火喉很令仁感動.

武士御好味燒, 又大又厚, 簡直如同一個雜錦燒八爪魚, 豬肉, 椰菜絲, 粟米, 蛋等等, 大件夾抵食.

兩層的沙律醬, 還鋪滿木魚乾, 最正就是不太乾, 不太燶, 真的名符其實武士推介, 御好味燒最好食半件已經飽到不得了. 

搬到新舖, 阿偉找來Jasmine幫手, 貌似官恩娜的她非常熱心, 不停為客人加冰, 抺枱, 換碟, 還細心的為我們拍照, 最令我喜出望外的是她哄小朋友也有一手. (簡直又靚又有愛心)

吃飽飽便是我出動八卦的時候, (阿偉...點解你咁大隻嘅?) 正準備新串燒的偉:「個個都話我大隻? 我又唔覺, 可能我有玩單槓, 雙槓啦, 我鍾意運動呀! 」

(武士有冇意思呢?) 原來阿偉自小習武, 洪拳, 泰拳, 西洋拳, 因為當年剛剛升上中一時, 被人欺負, 於是便激發起他復仇者意志, 中一下學期開始便晉身最強復仇了.

我最初以為阿偉曾於日本學廚, 誰知他答我, 從來沒有學習廚藝, 又怎會到過日本深造呢.

曾於2005年開過日本料理的阿偉說:「果時做老闆, 邊駛識煮呀! 到3年前, 準備係利時開武士前, 點知畀兩個伙記放飛機, 無人煮, 我米用咗2個星期去學囉」(吓??天才小廚神??)

(不過你煮得好日本風味喎, 我仲以為你好熟日本文化添) , 全因為阿偉從前於一日本人開的建築公司任職, 所以經常接觸日本人的原故. 

我覺得阿偉簡直神人一樣, 由建築轉到風馬牛不相及的飲食, 還要煮得大師水準... 阿偉答:「煮得多就得㗎啦, 有幾難啫!」(我煮咗幾十年都淨係識煮公仔麵咋...)

有網民推測Jasmine是否阿偉女友, 我最熱衷求証愛情問題, 阿偉:「老友咋喎...邊個網講㗎??」官恩娜笑笑口:「我唔係佢女朋友呀!!」阿太:「你整到人哋好尷尬...」

(哦!知道...因為武士講求「克」~ 不能被慾望左右信念, 要專心習藝, 侍奉君主, 保護食客...) 阿太:「人哋係米拍拖, 關你鬼事咩!!」(八卦下啫...)

臨別前阿偉大聲道:「拜拜阿仁, 下次再見」, 一定一定... 近期難得一遇的高質素食肆, 我還有大量串燒未試, 下星期再見~武士!!