探險家攻略 > 城中探秘 / 美食之旅 / 購物 / 旅遊 > 特色景點 / 其他 / 其他 / 飲品美食 / 長線旅遊 > 惠州。五礦‧哈施塔特小鎮﹑街頭小食

惠州。五礦‧哈施塔特小鎮﹑街頭小食

由平凡人於 2015-05-18 22:45:00 發表 | 累積瀏覽 659

分類：長線旅遊其他特色景點其他飲品美食；地區：中國

攻略日期：2015-04-03

是次消費：每人平均約HK$ 500.00

< 惠州2天遊 >

復活節又係旅行好時間，今年仲係連續五日假tim，好多朋友都係呢段時間出遊；不過我之前話過暫時唔去旅行ma，所以就算有唔少朋友邀請我旅行我都冇應承...直到復活節前幾日，有朋友叫我離開香港行下，見有時間就同佢一齊去玩下啦

今次預算去玩兩日，遠又去唔到都冇邊道可以選擇，廣州之前已經去過好多次又唔想去，最後大家見惠州又近又未去過所以就去左惠州lu，而且最重要係惠州車費消費都平ma（不過我一向都覺得惠州冇野玩，今次純粹去行下hea下）

惠州2天行程：
Day 1：香港 - 深圳 - 惠州 - 博羅。五礦‧哈施塔特 - 惠州
Day 2：惠州。西湖 - 深圳 - 香港
惠州住宿：漢庭酒店惠州商業步行街店

3-4-2015

第一天

一朝早6:30就出發，比起返工更加早，冇計啦今日係復活節假期第一日，預計過關會有好多好多人，而我地又要早啲去排隊拎火車飛，都係早少少好啲；係地鐵已經見到好多人拎住行李去旅行，去到九龍塘就更多人，最後迫到上水決定先落車食個早餐，呢個短短旅程就係咁開始

以前坐火車食吉野家習慣係粉嶺個間食，今次為左唔想迫唔返上車就去到上水先食，估唔到呢個計劃成功左，上水黎左架冇乘客既火車，我地可以輕輕鬆鬆上車啦

呢班車人唔多，不過羅湖就迫滿好多人；所有入境處櫃台都開晒，但始終人太多，係出閘位天橋樽頸位係塞到寸步難行



由落火車到成功過深圳關用左岩岩好半個鐘，都算快啦？

到深圳就即刻去火車站售票處拎早一日訂好既火車飛，冇飛就冇得去啦；一向都知道火車站有好有好多人排隊買飛，由其呢啲大站會非常多人，我地都預左一個鐘時間係道慢慢等，不過原來深圳站有攞飛專用窗口，排隊人數少好多好多，我去到個時得一個人排隊，好快就成功拎到車飛lu

咁早就拎到飛，兩個人戇居居坐係火車站出面冇野好做；火車站對出有好多旅行團經過，大家都把握長假第一日出遊；不過呢日通聯出現大故障，好多通聯用戶都收唔到電話信號，我就係其中一個受害者...今日冇得玩電話冇得上網lu...最後部電話要等到夜晚先收到信號......

入去坐低慢慢等；今次我坐K106由深圳開往北京既列車，全程行駛時間29小時44分鐘，當然我唔會坐到咁遠

今次我只係買到「無座」票，所以要快啲排隊入閘衝上車霸位

我坐第17號車卡，要行到最頭最頭

成功坐到冇人既位置，Yeah！

呢部應該係新車，所有野都好新



坐住火車睇風景係一種享受，但深圳去東莞呢段路其實冇野好睇
由深圳去惠州我諗絕大部份人都係坐巴士，因為又快又方便，可能得我地呢啲無聊人先會坐火車，冇計啦自己鐘意火車ma，而且火車去惠州車程唔算耐，1小時33分鐘就到，而最重要就係火車車費平好多，巴士車費大約¥55，但火車只係¥18.5，咁唔洗諗都知我會揀火車啦



為左配合坐火車氣氛，就算唔肚餓都開左個杯麵食，哈哈


火車經過東莞東站後個位就有人lu冇得再坐，不過好快就會到惠州

話咁快就落車，火車長到突左出月台


每道門都有小食車



橙銀色25G車箱可能係不久將來將會消失，要好好珍惜


見到有位乘客係右邊橫過路軌再穿過樹叢唔見左，唔通有秘道？

見到有部都係將會消失既藍色車，影低佢先

終於黎到惠州啦


火車站唔算係市區；呢個時間要搵車坐，見到有部車寫住去「博羅」，咁就岩晒跳左上車先算



大約35分鐘車程，去到博羅體育中心落車



體育中心好大，不過就人影都冇個...

附近都係啲未有人住既新樓，所以街上都係冇咩人

沿體育中心旁邊既「商業東街」向東行，行到盡頭就係目的地「五礦‧哈施塔特」；呢道有個牌寫住900m，但我好肯定冇咁近，呢段路跟本就望唔到盡頭，行左我地成半個鐘；返到屋企check地圖先知原本有成兩公里咁遠，比佢呃左...好彩呢日係陰天咋，有太陽曬到出煙都似



半個鐘後行到大門口，再要行入去；頭先行到半路先見到有巴士路過，但巴士站又唔見呢班車，咁奇怪既？

其實呢道係一個樓盤，見佢起得咁靚先山長水遠入來睇睇咋


見面就係目的地啦，係唔係好靚呢？

呢道好細...其實呢道係仿照奥地利小鎮Hallstatt造出來，不過同真正既奥地利小鎮比較就...奥地利個道靚好多



暫時冇得去奥地利，黎呢道頂住當先，呢個位望都幾靚


有大量人係呢道影婚莎相，每個地方總有好多人係身邊影緊



入面都係仿照奥地利小鎮既街道，睇落都真係幾靚，好有歐洲味道



不過出面呢個湖就唔太靚啦



建築就幾靚



偷影一下先

一啲藝術作品

小鎮只有兩條街，好快就可以行晒；係呢道見到有大量香港旅行團參觀，睇黎呢道都好受歡迎（冇計啦呢道免費入場ma）

外國人都係道做藝術創作

行到熱，坐低整返枝雪糕降降溫，呢枝雪糕好好食


都冇咩特別好行lu，四圍望望算



呢個噴水池好正，平時係唔會噴水，不過唔知幾時會突然間噴水出來，係入面既話一定走唔切，哈哈

成功係道hea左個幾鐘，係時候走人lu，呢道真係好悶


今次醒目啦唔再行路，出到來即刻跳上巴士，¥1.5一程抵到爛丫

呢道係旅行團黎多，巴士人都冇個

都仲有好多三輪車可以選擇，不過有巴士緊係坐巴士穩陣

幾分鐘車程就返到體育中心，洗咩行得咁辛苦...行出大馬路等車返惠州lu

差唔多一個鐘車程去到惠州汽車總站，再轉市內巴士去到「惠州西洲」

惠州西洲旁邊係「惠州商業步行街」，原本想住湖邊一間酒店，但去到先知full晒...估唔到咁多人住...咁要去搵其他酒店lu

穿過步行街去到另一邊搵酒店

時間已經去到五點，今日午餐就只係火車上既杯麵，所以覺得有少少肚餓啦，見到有間蘭州拉麵就入去食返碗先；大約5年前第一次食蘭州拉麵時覺得蘭州拉麵好好食架，拉麵師傅會即時係你面前拉麵，睇得又食得，而且湯底辣辣地好正



呢道都係即場拉麵，麵質都算ok啦，不過呢碗就唔辣，同我想像中既蘭州拉麵有少少距離，而且肉仲少得可憐...價錢雖然唔貴只係10蚊，但同我第一次係上海食既蘭州拉麵比已經貴一倍

食飽後繼續出發，橫過小小既「西枝江」

前面係2006新興建既「合江樓」；古合江樓係廣東六大名樓之一，可惜而家已經冇左lu...宋朝時蘇東坡係合江樓住過大約一年一個月，寫左《寓居合江樓》等等詩篇，古時合江樓係一個重要地方



過左橋前面係一個大地盤，好似起緊一啲仿古旅遊設施，仲有就係好多民居

今晚就住係漢庭酒店（惠州商業步行街店），價錢¥151唔貴；之前上過漢庭網站睇呢間酒店只可以招待「內賓」，理論上香港人係唔可以入住，不過去到問又話冇問題，咁仲好唔洗煩酒店lu

一向都鐘意漢庭酒店，簡簡單單又乾淨，呢間都唔例外，好舒服；係酒店涼住冷氣休息左一個鐘，hea到七點先出門口食晚餐

騎樓街

寬闊既江面就係我地成日都聽到既「東江」

合江樓呢道就係西枝江匯入東江既位置，東江比起西枝江大好多

去到步行街附近見到有腸粉食，比腸粉吸引左入去；自從幾個月前既廣州腸粉之旅之後都冇食過呢啲即造既腸粉啦

腸粉機！點解香港冇架！細個已經鐘意食呢啲腸粉！

我既腸粉蒸緊（唔知點解呢道既腸粉又叫「蒸米絲」？）

全場最貴既「加蛋加肉加香菇腸粉」都只係6蚊，又平又好食


朋友叫既湯都只係幾蚊

腸粉唔夠喉，再自己叫多個「加肉腸粉」，呢個只係4蚊咋仲好足料

食完lu，不過晚餐冇咁快完，仲有好多餐等緊我地


路過一間「沙縣小吃」，見好耐冇食過就入去食返次啦；我一向都覺得沙縣小吃好神秘，明明係一間小食店，但就開到全中國都有，密度一定高過7-11好多好多，究竟沙縣小吃之間有啲咩神秘關係？

沙縣小吃招牌食物係雲吞同蒸餃，間間都可以食到

今次就叫雲吞同蒸餃，味道普普通通都ok既，不過頭先食得太多腸粉已經唔係幾食得落...

街邊有牛雜賣，朋友買左黎食！不過呢個就唔岩我啦

呢道就係大名鼎鼎既「惠州西湖」

夜晚黑媽媽


湖邊有好多花燈，不過全部都冇開燈，而且啲花燈造型唔靚所以冇野好睇

冇花燈阻住反而仲靚



西湖冇野睇就行返去步行街lu，不過步行街唔會吸引到我地，次次都只係路過

路過好多小食店，不過太飽食唔落lu

返到酒店飲返罐涼茶下下火先

今日節目仲未完架，係酒店抖左一個鐘，11點再次出動，上網睇到附近有間食宵夜既老字號，又再去食多餐！呢道已經坐滿好多人，好彩仲剩一張枱

食少少野算啦；呢道既粥又真係幾好味，好岩宵夜食


有好多選擇，好岩一大班人吹水食野



食完粥之後仲有節目，見到出晒煙就知有好野啦，有好多小食檔而且迫滿好多好多人



我地都唔執輸買返啲野食先


最後買左盒串燒返酒店睇住電視涼住冷氣慢慢

仲買左盒涼皮，呢個好好食架，酸酸地辣辣地好岩我口味

不過呢枝自稱「液體麵包」既野就好難飲，唔知咩黎


一路睇住衝上雲霄一路食（呢集衝上雲霄就係Vincent撞車個集）

今日實左太早起身啦，衝上雲霄都未做完就係床上訓著左lu...好彩之後朋友叫醒我先記得要去沖涼咋；今日去既地方唔多，不過就食左好多野，惠州市區呢道真係冇咩好玩，不過行下hea下都可以既

鐘意SeeWide的分享，給我們一個Like吧！

檢舉

攻略日期：2015-04-03

攻略地點：中國
攻略時間：全日

是次消費：每人平均約HK$ 500.00

共0人比"掂"

EEChan 於2015-05-18 23:02:05 留言
你們一天都去了很多地方
舉報回覆
No.1

stellaluk 於2015-05-19 06:16:27 留言
搭火車ok喎！我幾年前跟團坐旅巴塞車，以後短線長線坐旅巴，怕怕！
舉報回覆
No.2

特搜總編E 於2015-05-19 16:10:13 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.3

平凡人於2015-05-23 19:07:22 留言
原文由 EEChan 於 2015-05-18 23:02:05 發表
你們一天都去了很多地方

其實都唔係好多，主要都係一個地方咋
舉報回覆
No.4

平凡人於2015-05-23 19:08:40 留言
原文由 stellaluk 於 2015-05-19 06:16:27 發表
搭火車ok喎！我幾年前跟團坐旅巴塞車，以後短線長線坐旅巴，怕怕！

不過我覺得坐巴士方便過火車好多，火車勝在唔怕塞車
舉報回覆
No.5

平凡人於2015-05-23 19:09:00 留言
原文由特搜總編E 於 2015-05-19 16:10:13 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.6

1874飛飛於2015-06-12 13:48:25 留言
引用自 '平凡人' 的相片：
回覆：好多年去過惠洲, 呢d 新建築未見過
舉報回覆
No.7

平凡人於2015-06-14 19:04:31 留言
原文由 1874飛飛於 2015-06-12 13:48:25 發表
引用自 '平凡人' 的相片：
回覆：好多年去過惠洲, 呢d 新建築未見過

而家好多旅行團都去呢道啦
舉報回覆
No.8

Linda_Lee 於2015-06-15 11:32:30 留言
引用自 '平凡人' 的相片：
回覆：呢到已經成為左好多旅行團既景點, 最近有個朋友都去左呢到, 影左好多相, 搞到我都心思思想去, 不過又5想跟團去, 但依家d團又好似抵過自己去好困擾
舉報回覆
No.9

平凡人於2015-06-15 22:37:47 留言
原文由 Linda_Lee 於 2015-06-15 11:32:30 發表
引用自 '平凡人' 的相片：
回覆：呢到已經成為左好多旅行團既景點, 最近有個朋友都去左呢到, 影左好多相, 搞到我都心思思想去, 不過又5想跟團去, 但依家d團又好似抵過自己去好困擾

廣東省內應該係跟團抵過自己去，幾百蚊就食好住好不過我都係喜歡自己去多啲，慣左自由自在唔鐘意比人帶住而且我自己去都可以好抵玩，哈哈
舉報回覆
No.10