昨天報章刋登一段關於肥仔領袖巡視水魚養植場時，對該農場同埋工作人員嘅表現感到好唔滿意，即場怒斥多名官員，指責佢哋無能，思想守舊同埋工作態度欠佳等等。由於呢個農場係由佢老豆在生時成立，所以肥仔為咗完成老豆遺願，就算幾唔得閒都要抽時間巡視一下。
咁又係嘅，呢個養植場搞咗成幾年，啲水魚養到好似巴西龜咁細隻，難怪肥仔發老脾嘅。計我話想養靚水魚，肯定要出國取經，唔駛問梗係去有漁米之鄉嘅中國順德喇！睇吓當地人點樣將啲水魚，養到又肥又白。我估班朝鮮人重係用緊傳統方式嚟餵飼，雖則話用傳統方法飼養出嚟嘅水魚會比較健康啲，但就會用較長時間，以肥仔咁急進嘅人，點會容忍到呀？唔採用新科技即係無與時並進，所以肥仔批評佢哋思想守舊一啲都無錯！
國內有一特色，就係養魚嘅唔會食自己養嘅魚；種菜嘅唔敢食自己種植嘅蔬菜，因為啲魚同菜蔬都充滿激素同農葯，不過外表真係好吸引。當肥仔見到啲同佢身形差唔多肥嘟嘟嘅水魚時，肯定笑逐顏開。到時俾肥仔食之嘛，又唔係自己食，真係關人咯！
早前有報導，指人民武力部長玄永哲，由於在開會時太攰頂唔順恰咗眼瞓，點知俾肥仔睇到，認為玄永哲喺佢主持嘅會議上恰眼瞓，係對佢不敬。我相信當時玄永哲心諗，恰吓眼瞓之嘛，有乜大不了？頂多咪降級或者提早退休！懲罰揭曉咗，真係難估過車路士作客零比三大敗俾西布朗，原來肥仔最後決定公開用高射炮將玄永哲處決！
就算俾你估到肥仔要處死玄永哲，都諗唔到佢會用高射炮咁難度高嘅方法！恰眼瞓都要用高射炮處決，養植場班員工呢次真係有得震無得瞓，睇吓肥仔又玩邊一招喇？
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
