意大利菜向來都喺喜歡嘅菜系之一，感覺意大利人嘅飲食唔太拘束，意國又食材豐富，單單意粉、薄餅已經可以千變萬化，令人食極都唔會厭，今晚，兜個圈嚟到沙田圍嘅M3 Italian，喺偕友共嚐意菜嘅一夜。
鋪面全裝上茶色玻璃，睇唔到內籠環境，入到店內，環境頗有少少懷舊風格，紅白格仔枱布，配通花木椅，燈光柔和，讓人倍感閒適。
雖然主打意大利菜，不過，睇過餐牌後，都加入唔少其他國家菜色，種類選擇就離不開前菜、沙律、意粉、意大利飯、薄餅、小食、主菜及甜品，所以，M3較似一間賣歐陸菜嘅餐廳，亦都變得多元化。順帶一提，點主菜可以額外加$50，有多一客餐湯及一客甜品，好划算。
主餐牌（前菜、沙律）
主餐牌（前菜、意粉、意大利飯）
主餐牌（薄餅、小食）
主餐牌（主菜）
主餐牌（甜品）
![bowl]()
香草餐包
等待上菜期間，先嚟一小籃香草餐包，香草味唔算太強，但微暖軟熟嘅餐包，沾些少黑醋及橄欖油，簡單味美！
![bowl]()
啤梨藍芝士焦糖合桃沙律 $128
沙律共有5款選擇，介紹依一道啤梨藍芝士焦糖合桃沙律，因為個組合比較少現。清甜嘅啤梨切成薄片，混和沙律菜、藍芝士碎及合桃，清新得嚟好有層次，尤藍芝士嘅濃香夾雜焦糖合桃嘅蜜甜，味道挺有趣。
![bowl]()
香草醬意粉 $88
肉醬、卡邦尼以外，其實香草醬意粉都算其中一款經典意粉，就好似另一道經典意粉「香烤蒜蓉意粉」（Aglio Olio），做法簡單，味道突出。意粉不單質感一流，既咬口，又帶有濃郁香草芳香；此外，店家就多加咗唔少配料，如露筍仔、車厘茄、松子仁，令口感再豐富啲！
![bowl]()
四式芝士薄餅 $138
依度唔喺薄餅店，所以，款式貴精不貴多，5款都喺別具特色。小弟都幾鍾情芝士嘅香味，所以，四式芝士薄餅應該最叫人心癢。M3嘅薄餅以「餅乾」底為主，個四式芝士一身金黃，包括咗金文畢、車打、水牛芝士及藍芝士4款芝士，入口非常香濃，每口都充滿芝士酥香；薄餅邊位好脆口，食到中心就軟綿綿，芝士迷應該會愛上佢。
![bowl]()
香煎法國油封鴨腿配茴香沙律 $208
之前晌大坑一間法式咖啡店嚐過法式油封鴨腿，今晚重遇，實在美妙。鴨腿風乾後再煎烤，獨特嘅鴨味寧捨酥香濃郁，一啖鴨腿，一啖茴香沙律，香濃跟清爽交替，有好好嘅化學作用，最喜歡佢用咗個香橙醬做汁底，令本身唔太油膩嘅鴨腿，更感輕盈清爽。
![bowl]()
烤T骨（18安士）配田園沙律及薯蓉 $428
18安士，真喺好耐未食過咁重份量嘅牛扒喇（當然，有啲賣到30安士添），件T骨奕到上枱，燒得焦香嘅「膚色」，健碩嘅「身形」，十分誘惑。食T骨好就好在一邊食到肉味濃嘅西冷（大邊），另一邊就食到肉質嫩嘅牛柳（細邊），無論西冷定牛柳，燒得啱啱好，肉質呈鮮嫩嘅粉紅色，而外層帶點焦脆，真喺無得頂！
鍾意食甜品嘅人，無甜品作結總喺心結問題，似若有所失。店家提供8款甜品，相信，可以一止甜品迷嘅心癮。
![bowl]()
意式雲呢拿奶涷伴雜莓醬 $38
雲尼拿奶涷做得相當有水準，除咗奶涷夠挺身而質感軟滑之外，奶味香濃，配雜莓醬喺最穩膽嘅做法，但食得出用料唔馬虎，雜莓酸香，味道自然。
![bowl]()
伯爵茶梳乎厘 $48
單講賣相已喺信心保證，因為焗好嘅梳乎厘比焗杯高出50%，喺打蛋白嘅理想表現。梳乎厘質感好輕盈，只喺稍嫌仲有少少濕，不過，已相當上乘，而伯爵茶味慢慢滲出，唔會太突出強悍，有份高雅嘅感覺。
![bowl]()
雜錦果仁朱古力慕絲 $48
朱古力慕絲又喺心水嘅甜品之一，外表平平無奇喺個雜錦果仁朱古力慕絲喺俾人嘅第一個印象，但切開，原來內有乾坤。朱古力慕絲做得十分柔滑，充滿朱古力香味，最驚喜喺中間加咗煮過已打發嘅蛋白，口感就好似棉花糖咁，非常有趣，唯美中不足喺底下嘅雜錦果仁脆餅底，香得嚟卻有啲硬。
除散叫，仲有個「精選二人套餐」，包數款前菜、餐湯，仲有一客主菜（6揀1）、一客意粉（5揀1）、一客薄餅（5揀1），都只不過喺$388 + 10%，額外增值仲可以加$38換購兩杯餐飲，加$48換購兩客甜品，不過，只限星期一至四晚市！
無論沙律、意粉、薄餅，抑或主菜、甜品，樣樣都做得出色，叫人食得稱心，真喺估唔到沙田圍依啲偏遠位都有咁具質素嘅意大利餐廳，多謝晒好友介紹。
個人評分
味道：8/10
環境：7/10
服務：7/10
抵食：8/10
平均每人消費：HK$300
餐廳資料：
M3 Italian
沙田沙田沙角街8-12號, 花園城1期地下2號鋪
2699 3535
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
M3 Italian ：情投意合
M3 Italian
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)