嚟九重鮮成件事就喺一個摸錯，本來約咗朋友食私房菜，點知兩日前先被通知包場，取消我哋嘅訂枱，真喺從食以嚟，被餐廳放我飛機都喺第一次。無理由掃大家興，更無理由求其搵間頂替，臨急臨忙，有朋友介紹新開嘅九重鮮，真喺及時雨。原以為喺韓國人開嘅店，其實喺港人引入，又以為照抄，點知又唔喺，下文再講，總之今晚大家就食得開心，兼且驚喜萬分！
內裡環境簡潔，無咩花巧裝飾，大多數都喺晌韓燒店見慣見熟嘅銀色鐵枱，部份喺電油筒圓櫈，部份喺有靠背膠椅。
基本上，喺以食套餐為主，共有三款，包括釜山塔（$258 / 位）、首爾塔（$388 /位）、濟州塔（$488 / 位），全部兩位起，需加一。揀完套餐，再揀咩湯？吓，唔喺蒸鍋咩？變咗打鞭爐？原來，喺擺啲料晌鍋底，藉着下面打出嚟嘅蒸汽及上面帶有海鮮精華嘅倒汗水所煮成嘅粥水湯。
![bowl]()
韓式前菜
點好餐後，先送嚟幾小碗韓式前菜，有大豆芽、芝麻白菜仔、醋醃蘿蔔及薯仔，蘿蔔及薯仔最好食，前者酸香令人開胃，後者粉粉甜甜而好有薯味！
![bowl]()
真露米酒 $98
朋友話帶點乳酪酸味，酒精度又唔高（只有6%），又真喺好易入口，幾好飲喎，好啱女士飲添，一支有成1000毫升，三幾個人共享就最好不過嘞。
![bowl]()
韓國檸七 $13
韓國直送嘅罐裝汽水，定價唔貴，出面食韓燒都賣到成廿幾蚊一小罐。
雖然，店方提供咗鮮茄辣醬及柚子豉油，機本上無乜點需要用，喺食到大蚌，海水味重，有少少鹹，沾啲蕃茄辣醬調和吓好啲。
點食法？放心，餐牌有少少指引，就算唔明，職員都會主動嚟協助，仲有，1、2兩層唔建議沾任何嘢，食其海鮮原味，而鮮蝦，就要試試佢個柚子豉油，翡翠螺就可以試試佢個鮮茄辣醬，但始終人人口味唔同，按自己喜好我都覺得可以喇！
上面講過個九層鍋唔喺照抄，原因喺韓國當地嘅食法喺蒸好先捧出嚟，但晌依度就全部生料，一邊蒸就逐層食落去，需留意喺海鮮會依季節時令變動！咪以為你嚟食就一定食到九層，因為當晚見到有啲客喺得五層或七層，問問店長，原來人少嘅話，例如兩個人就會做五層，三個人就做七層，除咗食物堆得集中啲好睇之外，亦控制番個蒸熟程度。講咁多，喺時候去片成晚食咗乜。
![bowl]()
第一層：蟶子、象仔蚌
因為蒸之前已偷偷打開睇過有蟶子同象仔蚌，所以心中有數。象拔蚌就見得多，象仔蚌都喺第一次見，份量都喺按人頭計，而兩者都爽口鮮甜，真喺乜都唔點，原味行先。
![bowl]()
第二層：大海蝦
食完第一層，店員會主動過嚟收走鋼蒸籠，出現眼前嘅就喺大海蝦，每人有3隻可享用，我都喺試試按佢建議，沾少少柚子豉油，又真喺鮮味突出，蝦肉亦頗彈口牙。
![bowl]()
第三層：元貝
我哋5個人，5隻大元貝就啱啱好放滿個蒸籠，原來，店長話5個人就最理想，一來放得晒所有食材做成九層巨塔之餘，出嚟每一層個賣相會最足料好睇。元貝肉清蒸，好鮮甜，如加些少蒜提提味，就更合我個人心水。
![bowl]()
第四層：花尾龍躉、北寄貝
依一層打開，又再次引得大家嘩嘩聲，不單啲花尾龍躉夠大件，北寄貝更喺大隻有睇頭，前者亦見到細心加塊生菜墊一墊，免魚皮黐底。可能蒸得耐咗，肉質唔夠滑，然而好有魚鮮味，再蘸少少柚子豉油提鮮，更好食；北寄貝新鮮蒸，唔會好似食壽司刺身時嗰啲貨色，又膠又韌。
![bowl]()
第五層：沙巴肉蟹、大蚌
驚喜陸續有嚟，第五層真喺唔令人雀躍都唔得，每人有半隻沙巴大肉蟹，再加埋5隻大蚌，肉蟹非常鮮甜，拆腳拆鉗啖啖肉，蟹身仲有少許膏；相反，大蚌海水味稍重，有啲鹹，要沾啲鮮茄辣醬平衡一下。
![bowl]()
第六層：大花蛤
大花蛤（大花甲）理論上唔會有咩驚喜效果，但到第六層，都一樣有，就喺驚喜嘅多，堆滿成個籠，真喺多得驚人，餐牌原先寫有青口，但店長話來貨唔靚，所以俾番多啲花蛤食客。雖然啲花甲唔喺嫩肉型，但勝在味鮮清爽。
![bowl]()
第七層：翡翠螺、南瓜、粟米
依層輕鬆番一下，主要嘅海鮮喺翡翠螺，經常都會食到，尤其晌自助餐，所以就唔特別提；反而，南瓜、粟米喺依一層嘅亮點，前者既粉且甜，後者絕對喺超甜粟嚟，好食。
![bowl]()
第八層：鮑魚、蕃薯
鮑魚嚟自大連，口感彈牙煙韌，差啲想用刀叉嚟享受，再者，鮑魚嘅鮑鮮味，實在令人回味；蕃薯亦都好粉甜，除第七、八兩層重點有蒸蔬菜外，其實，你都發現每層海鮮都加入少少蔬菜，如露筍仔、菇菌……等等，唔會得啲肉而無蔬菜到肚。
![bowl]()
第九層：韓式豬手湯
上文提過要揀咩湯，人蔘雞湯定韓式豬手湯，因為前者大家都話試過好幾次，後者卻喺第一次遇上，兼且怕「人蔘雞」影響咗啲海鮮精華，所以，舉手公投要咗後者。放九層鍋前已將豬手、年糕、白蘿蔔、蜆及白米放晌最底層嘅大鍋內，由原先一滴水都無，到最後變成一大鍋湯，真喺有點嘖嘖稱奇。
因為放入白米唔多，所以，唔食啲粥都可以飲飲個「海鮮」湯，而個湯真喺鮮到不得了，至於啲粥，估唔到都好綿喎。就算飲唔晒都記得打包走，因為既可以食番啲粥，又可以隔咗啲米粒用湯煮米粉，超正，不過，個人溫馨提示，記得隔走埋啲年糕，因為浸咗一晚，啲年糕變得「腍pat pat」，唔多好食。
![bowl]()
韓式雪花冰 $58
是晚只得原味，雪花冰刨得極度幼細，入口綿柔即化，紅豆十分清甜；唔單止面層加有好多黃豆粉，雪花冰中心亦都多加一層，變咗唔會食到尾得啲冰。之前曾喺韓燒店食過依類韓式雪花冰，仲加入麻糬及杏仁片，效果相當唔錯，店主不妨考慮吓依個做法。
今晚食嘅嘢真喺做到「鮮」入為主，計計數幾百蚊食咗成11款海鮮，實在好超值。當然，想食得更划算，個人覺得釜山塔已經好夠皮，只喺$258已經食到9款海鮮，一樣有蟶子、大海蝦、元貝、大蚌、大花蛤、鮑魚……等等，飲多罐汽水，埋單個人消費都唔使$300！
個人評分
味道：9/10
環境：8/10
服務：8/10
抵食：8/10
平均每人消費：HK$460
餐廳資料：
九重鮮
大坑浣紗街1-5號浣紗閤1樓
2321 8998
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
九重鮮：層層鮮味，重重驚喜！
九重鮮
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)