探險家攻略 > 美食之旅 / 旅遊 > 餐廳 / 其他 / 長線旅遊 > 廣州腸粉美食之旅

廣州腸粉美食之旅

由平凡人於 2015-06-08 22:40:00 發表 | 累積瀏覽 928

分類：長線旅遊餐廳其他；地區：中國

攻略日期：2015-01-03

是次消費：每人平均約HK$ 400.00

< 廣州2天遊 >

自從上一次係廣州食過好好食既腸粉之後對腸粉念念不忘（已經係年幾前既事啦），今次借住朋友邀請我去廣州乘機黎一次腸粉之旅，食香港好少機會食既布拉腸粉；上次去廣州係坐舊式綠皮火車，可惜呢班車已經冇左啦，今次選擇坐呢班去昆明既長途車，而且車費仲更加平呢


廣州2天行程：
Day 1：香港 - 深圳 - 廣州。番禺晚餐﹑芳記腸粉
Day 2：廣州。銀記腸粉﹑小洲村﹑有軌電車﹑紅磚廠 - 深圳 - 香港
廣州住宿：春田花花青年旅舍

3-1-2015

第一天

今日上午係銀行處理好戶口問題，食過午餐後坐地鐵到布吉站，即係火車深圳東站所在地，一出地鐵就可以見到火車站係面前

有天橋連接地鐵站火車站，唔怕唔識路


不過地鐵站呢邊係東面廣場，想買飛既話要行去西面廣場售票處



行左5分鐘先行到呢邊售票處；一直以為深圳東站火車唔多，人都應該唔會多，所以只係預早50分鐘到，不過咁就出事啦，呢道好多人！

一早係網上訂好火車飛，但呢道冇專用取票窗口，想拎飛就要齊齊排隊；呢道咁大都只係開四個窗口，變成四條好長既人龍...

眼見排唔切隊冇車搭既時候，望到旁邊有職員坐左出來想開新隊，咁就博一博排上去呢個窗口，今次好好彩比我估中左，成功拎到火車飛...所以呢下次坐火車一定要預多啲時間先得，就算訂好飛但係冇拎到出來一樣冇得上車

拎左飛就即刻上去排隊入候車室，又係好多人


入到候車室見冇咩人，原來大家已經上緊車啦，去一去廁所後就跟大隊上車，時間岩岩好



今次坐呢班車比上次更加平，只係¥24.5咋，超抵！（有一班去廣州最最最平既車只要¥23.5，不過時間地點都唔好所以唔會選擇）如果想買呢班車有個小小特別既地方，就咁search深圳去廣州係搵唔到，只要search深圳去佛山呢班車就會出現，可以照買去佛山，早一個站係廣州東落車就得，我坐個個車箱大部份人都係廣州落車

呢班車總站係昆明，全程要行28小時57分鐘，我就頂唔順坐咁耐啦...好彩去廣州只要1小時24分鐘，比坐巴士更快


快啲搵返自己個車箱上車先，今次係無座要早啲上去霸位


今次黎到深圳東站之後，我終於去齊晒深圳站﹑深圳東站﹑深圳西站﹑深圳北站呢四個深圳主要火車站啦，哈哈

部車暫時唔full，不家都有位坐，不過有啲乖客有位都唔坐，我估佢地係長途乖客，要霸定個靚位過夜



廣深線沿路都係城市，冇風景好睇

個零鐘車程好快就去到廣州

離開火車站就見到日落lu

係火車站出面等左陣，我既廣州朋友開車黎到接我去食飯啦，今次我地去左番禺一條食街食晚餐，呢道好多人亦都有好多餐廳，我見順德菜平時比較少食，咁就隨意揀左一間順德菜館試試



朋友好好客，我地五個人叫左好多野食


食到八點出來已經天黑，係時候返去廣州lu；返到去朋友有事要先離開，我就去到hostel check in

咁早去到hostel緊係唔會訓住啦，九點零鐘去到東方賓館等朋友落車，仲有兩個朋友夜晚收工坐6:45直通巴黎廣州；大約10點佢地終於出現，我地四個齊人啦，即時坐的士同佢地搵地方食晚餐，目的地係位於西華路既「芳記小食店」

芳記小食店由廣州朋友介紹，係廣州其中一間做腸粉最出名﹑最地道﹑又最好食既布拉腸粉店，睇落都覺得呢碟腸粉超正

唔係講笑，呢道啲腸粉又滑又好食，好耐都冇食過咁正既腸粉啦
下次去廣州一定要返黎呢道食先，100%推薦！最衰個時太飽冇食多碟！

價錢好平，幾蚊有交易，絕對可以話係平靚正


食到10:40先走，咁夜比起日頭少好多人，呢道成日排長龍架



由西華路行返去hostel，慢慢行行左半個鐘

係hostel附近見到間小食店又入左去食野啦，不過呢道既腸粉同頭先比差好遠，完全比唔上



食完腸粉見到有間糖水鋪，食地道廣州沙灣甜品，入去食返碗都好，呢道有好多甜品選擇

呢道既糖水同香港糖水好唔同，平時係香港好少好少見有得食呢啲


食完就返去Lazy GaGa Hostel，呢間以前已經介紹過，今次唔講咁多啦



第二天

朝早9:30出發離開hostel

Hostel對出環境好寧靜

路過Pizza Hut想入去舒舒服服食個早餐，但間Pizza Hut竟然多人到要等位，最後是但入左一間快餐店食少少野就算（呢間個名好霸氣）

平時豆漿就飲得多，呢間有米漿飲，第一次飲又幾得意


今日行程好緊密，食完就去到廣州東站買定今晚返深圳既火車飛，咁就唔怕冇車返屋企

可以用回鄉證係自動售票機買，好方便

搞掂好火車飛，坐地鐵去到客村站，兩個朋友去左電訊公司處理電話問題，我同另一個朋友就偷偷地去到銀記腸粉店食腸粉

銀記腸粉都係好好食架，以連鎖店黎講做得好好，而且周圍都有分店好多地方都可以食到，咁岩比我見到緊係要入去食

不過最後都比朋友發現左我地偷食腸粉，哈哈^^食完就要開始我地今日豐富既行程啦，好多地方要去！

鐘意SeeWide的分享，給我們一個Like吧！

檢舉

攻略日期：2015-01-03

攻略地點：中國
攻略時間：1日以上

是次消費：每人平均約HK$ 400.00

共1人比"掂"

EEChan 於2015-06-08 23:25:12 留言
真係好識搵食
舉報回覆
No.1

林公子於2015-06-09 01:46:22 留言
D皮好薄好好味
舉報回覆
No.2

特搜總編E 於2015-06-09 10:28:04 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.3

平凡人於2015-06-09 20:53:06 留言
原文由 EEChan 於 2015-06-08 23:25:12 發表
真係好識搵食

其實唔係架，哈哈
舉報回覆
No.4

平凡人於2015-06-09 20:53:48 留言
原文由林公子於 2015-06-09 01:46:22 發表
D皮好薄好好味

芳記做得好正，好好食
舉報回覆
No.5

平凡人於2015-06-09 20:54:19 留言
原文由特搜總編E 於 2015-06-09 10:28:04 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.6