由 HKMSG 於 2015-06-14 09:38:03 發表 | 累積瀏覽 4205
原來大家都對「《魔雪奇緣》冰雪小鎮」入場方面仍存有唔少疑問，尤其"預約證"方面。咁小報就嘗試吓解答呢啲問題！（都幾大段下…）
例牌先利申一下，以下資料跟據本報小編現場體驗及現時所得的園方資料集結而成，如有更改當然以園方公布為準！
首先！相信呢幾日既洗禮，相信大家都被"預約證"呢三個字搞到唔知點咁！其實就算真係一個唔好彩拎唔到"預約證"都唔洗擔心。因為園方提供入場既排隊區其 實有兩條；一條係俾持有"預約證"既賓客排，而另一條就係俾拎唔到"預約證"又或者本身想就咁排隊睇即場既賓客排。而隊伍入口及中途會有指示牌話你知依家 等緊邊一場。但即場排隊等候時間為一至兩小時（單位：小時…滴汗中…）不等！當然要視乎現場人龍而定（小編的溫馨提示：記得飲多啲水呀！避免中暑呀）！
劇場裏面座位約300個，而每場座位分配比有"預約證"既為 2/3 ，而無證排隊等候則為 1/3 左右（大約啦，實際即係幾多？自己計啦！）。
結論係建議大家早啲起身，早啲去排隊索取"預約證"。(就呢幾日情況睇，所有場數既“預約證“喺朝早約 11:30 或之前已經全部派晒！)
講左咁耐，咁究竟"預約證" 喺邊到派同幾時有得拎先？"預約證"派發點其實…… 就喺「《魔雪奇緣》冰雪小鎮」外面！首先大家要進入探險世界，然後向原野劇場 (即獅子王慶典) 方向行再行入多啲啲… 去到近灰熊山谷嘅火車橋底，就會見到派發"預約證"嗰個櫃位。就好似圖1.咁。之後點做？仲問！緊係嗱嗱聲去排隊啦！
"預約證"會由樂園正式開放嗰一刻開始派，呢個月樂園正式開放時間喺 10:00，但一般 9:30 就會先開放大街俾賓客行下先。到十時正大家就可以去排隊索取"預約證"。但記住！"為咗您嘅安全起見，請"步行"到你第一個目的地，請勿奔跑，多謝！祝您 有開心奇妙嘅一日"
事實上又真係無須要奔跑地步行到你第一個目的地 (即喺"預約證"派發點) 因為一日有十場演出 (部分日子場次會有所調整)，而每日第一場 10 : 30 不設"預約證"，大家可以直接入場（涼冷氣）！而餘下場次先會有"預約證"發放。
記住！記住！記住！
"預約證"只係確保持證者該場必定有位座 (越時/遲到者例外) 而唔係快速通行證 fastpass（優先入場果隻）。點解咁講！因為到時演藝人員會先放行約 20 個持"預約證"賓客，然後再放行約 20 個即場排隊賓客，再“有證“、“無證“…如此類推咁放行入去。
仲有！仲有！仲有！
賓客係冇得選擇及指定"預約證"場次時間，同埋無論你喺買一日、兩日門票或者係「奇妙處處通」會員卡嘅賓客，一律要出示門票或會員卡先可以索取到"預約證" (白金卡都要㗎)。
希望大家睇完會清楚入場安排！
以上資料只供參考！拎唔到又或者派晒本報同小編唔負責㗎！帶定頭盔先！哈哈
