小齊已經 5歲,
到現在為止佢都仲未固定地學一種樂器,
好多人都覺得5歲 (OR EVEN 3, 4歲) 可以學,
所以舊年12月我有比小齊試學過 4堂鋼琴,
點講呢? 我覺得佢未READY~
雖然我自己彈琴冇任何級數, 但我其實都試過自學彈琴,
事緣係細個有個親戚送左部電子琴比我地,
咁當玩具咁, 東摸摸, 西摸摸, 自己睇譜研究,
居然都能彈出唔少樂曲,
我仲記得第一次能夠左右手並用彈出一首歌果種興奮,
雖不是什麼困難歌曲, 都已經十分滿足了
由於只當係一般興趣, 玩左一陣就冇再玩, 當然亦冇諗要跟老師學上去
但而家諗返我覺得玩音樂好講"興趣"
呢個亦係綜合左我自己經驗同身邊o既人觀察所得
真係有朋友考到 8 級但平時冇興趣掂部琴,
但有朋友只考到 5級卻十分 enjoy 自彈自唱一d 流行歌曲, 當作自娛而且非常悅耳
所以我覺得技巧相對易得, 但興趣, 造詣難求呀!
學音樂其實都係幾孤獨o既一件事, 好多時都係自己一個人練練練...
如果冇興趣好難持續
一個最切身o既經驗來自我細佬, 即小齊舅父
阿舅父中學時考入一間神校,
從未學過任何樂器o既佢.
中一揀選課外活動時揀左小提琴,
於是我地屋企耐唔耐就會聽到 "gur goo gur goo" o既聲音,
但睇得出佢係冇乜興趣, 所以練習唔多, 亦冇乜動力學咁...學左一個學期就停左...
阿媽都怨佢嘥錢買個小提琴
到佢中二時我妹買左支結他同一本"彈指之間"返屋企自學彈
(果時佢地成日彈"愛我別走", 睇佢地彈得多變左我都彈到幾下)
我細佬就由跟我妹玩下變成迷上,
精心鑽研, 練習...
果時佢冇跟過人學, 只係一把勁自己摸索, 練練練...
一本兩本三本"彈指之間"...
跟住由平o既木結他變成靚o既木結他,
電結他, 電木結他, bass...
彈o既歌由 Beyond, 張震嶽以至歐美日o既樂隊組合...
後尾仲約埋同學一齊夾 Band,
入左 U 之後佢仲做埋 BAND SO CHAIRMAN,
而佢其中有冇跟人學過彈結他呢?!
有, 就係考八級果陣搵左個導師點撥下考試 SKILLS
而家佢電結他同 BASS 都考左 8 級,
本身我諗佢都唔係特別想考, 因為 8級之前我都冇乜印象佢有考級,
考8級係有實用性
咁而家舅父係做咩呢?
忘記左講, 佢除左結他之外, 打鼓同彈琴都唔差, 兩樣我都唔見佢跟人學,
一樣只係自己練, 但當然呢兩樣佢冇考級亦唔會教人啦
以下呢兩段就係舅父 sell 結他o既demo 片
咁小齊呢? 試完 4堂佢話有興趣彈琴, (其實都唔知佢係鍾意琴定鍾意個老師?)
但我冇比佢繼續學
點解? 我覺得佢理解能力未夠, 力量未夠
太早比佢學可遇見o既結果係要花好多時間先有少少進步
所以我決定等等先. 可能學d general 樂理遲d先再考慮學咩樂器,
再醞釀下先, 順著佢興趣方為上策
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
