探險家攻略 > 休閒玩樂 / 城中探秘 / 旅遊 > 郊遊 / 特色景點 / 博物館 / 古蹟 / 其他 / 長線旅遊 > 武漢。武漢大學﹑黃鶴樓﹑辛亥革命武昌起義紀念館

武漢。武漢大學﹑黃鶴樓﹑辛亥革命武昌起義紀念館

由平凡人於 2015-06-30 19:45:00 發表 | 累積瀏覽 484

分類：長線旅遊特色景點博物館古蹟其他郊遊；地區：中國

< 武漢﹑上海﹑蘇州5天遊 >

第一天

到左出發日子啦，今晚會坐火車由深圳出發，去位於武漢既武昌站；由深圳去武漢有1216公里，車程大約11小時30分鐘，聽日一早就會去到！

出發前已經買好火車飛，約好大家係出關口第一間茶餐廳等，順便食返個下午茶，坐得火車多已經知道火車上既飯餸唔會好食，所以要食飽啲先上車

傍晚時份黎到深圳火車站，火車18:35開出，都係早少少到穩陣


好多乘客等緊上車啦；今次乘坐Z24班次列車，不停站直接去到武昌

提早25分鐘上車



我地坐硬臥車箱，環境都算ok，價錢¥261.5唔算好貴；今次係媽媽第一次坐臥鋪火車，希望佢可以訓得著啦，火車一路行一路震而且又有路軌聲，如果唔習慣未必可以訓得好

火車六點幾開出，大家都未咁早訓，見咁得閒就買個火車飯盒比大家試試；呢個飯盒睇落都唔多好食架啦，而且仲好貴tim，賣成30蚊一個！以前見既火車飯盒都係¥15¥-20咋，呢個唔知搞咩賣咁貴！

夜晚九點大家都返上床訓lu，明天一早六點就要落車


第二天

火車未夠六點就到達武昌站，武漢呢個時候開始天光，時間岩岩好可以去玩啦

好大既武昌火車站；武漢分成唔同區域，其中武昌、漢口、漢陽都係武漢市區，當中武昌、漢口都有大型火車站，而我坐呢班車就以武昌站作為總站

武昌站對出有巴士前往武漢大學，事不宜遲即刻跳上巴士出發，欣賞今次旅行重點「武漢大學櫻花」

去到武漢大學門口未夠七點，三月既武漢朝早仲係凍凍地，所以都係先去食返個暖笠笠早餐；落左車隨意搵到間快餐店就入去啦，搭足一晚車之後可以舒舒服服坐低食早餐真好



食飽早餐後就入去武漢大學啦


武漢大學好大，環境亦都好舒服，一早望到咁靚既環境人都精神啲



見到好多花，呢啲係梅花？

繼續向種滿櫻花樹既地方前進



武漢大學太大啦，校園入面係有校車行走唔同地方

終於黎到啦，櫻園呢道種左好多櫻花樹架
武漢大學櫻花有段歷史，話說當年日本佔領武漢期間武漢大學用作收容傷兵，日本政府為緩解傷兵思鄉之情就種左好多櫻花比傷兵欣賞，幾十年之後中日友好日本政府又送左好多櫻花樹比武漢大學，所以呢道就有咁多日本品種櫻花啦



不過抬頭望一望，全部樹枝光禿禿
已經知道今次出事啦，一朵花都未開...呢道應該開滿好多櫻花架！唉...冇野好講...上年呢個時間已經開滿櫻花，今年天氣涷少少竟然一朵都冇，真係要喊出黎...！

唉...唉...唉...唉...唉...冇野好睇都四圍行下啦


唔知呢個係咩花呢？雪白色都幾靚



武漢大學圖書館



不知名建築



咁似楓葉既？

四圍都有一棵棵白花



頭先係武漢大學南面進入，慢慢行行左兩個鐘，而家係北面離開；武漢大學北面係「東湖」，東湖好大架，係中國最大既城中湖



而家先10點，要搵地方去先，發現有巴士到所以就決定去對面呢個「湖北省博物館」

去到門口見到咁多人排除...即時認輸走人，唔排啦


坐巴士去酒店check in，放低個大背囊輕鬆左勁多；今次住「漢庭酒店江漢路步行街店」，第一次住漢庭酒店又覺得幾好bor

休息左一陣又出發啦，行幾分鐘就去到武漢其中一個好旺既地方「江漢路步行街」

清未至民國時間，武漢係中國第二大城市（第一係上海），當年已經非常繁華；江漢路呢邊係英租界，更加係最繁華地段之一，而家呢道一樣咁繁華，仲保留有好多歐洲風格建築，睇到都覺得好靚，如果香港都保留多啲呢啲靚建築就好啦



沿路行到長江邊，去到武漢關碼頭就有得坐船過江


船到啦，好多人等上船；坐船去對岸中華路船費只係個半，超抵



船上二樓有座位

一樓就有好多電單車

上層船尾仲有地方比大家睇風景，好多人已經霸晒啲靚位


長江好闊，比起我心目中闊好多好多



落左船行冇幾遠就係「戶部巷」小食街，好多人好熱鬧；戶部巷係一條明清時期已經有既古街，被譽為「漢味早點第一巷」，好多湖北特色小食都可以係呢道食到

真係人山人海
今次有長輩係道就唔食小食啦，黎睇下就算，要搵個地方舒舒服服坐定定食午餐



係戶部巷對出見到有間火鍋店就入左去啦

叫得三國英雄，職員係三國時期打扮，哈哈

武漢應該係食辣野多，不過媽媽唔食得辣所以要左清湯底，一齊烚下烚下


午餐後繼續出發，好快就見到黃鶴樓


「故人西辭黃鶴樓，煙花三月下揚州...」﹑「昔人已乘黃鶴去，此地空餘黃鶴樓...」，小學已經識呢啲詩句啦；黃鶴樓係江南四大名樓之一，更加係四大名樓之中最出名最多人認識既一座，只不過黃鶴樓由三國時代開始因為種種因素興建損毀過好多次，而家見到既黃鶴樓係1985年根據歷史資料重建而成，5層樓高 50.4米



黃鶴樓入場費唔平架，要80蚊
都係離遠睇下算啦，咁貴入去睇座新樓感覺好唔抵！

咁曬衫又幾得意

再行多陣就去到「辛亥革命武昌起義紀念館」，又叫「紅樓」，當年辛亥革命之後一日革命黨人係呢督創立「中華民國軍政府鄂軍都督府」

入面展示出鄂軍都督府成立初期場景同一啲相關文物，唔特別去影lu

睇完就回程啦，再次經過戶部巷，人冇頭先咁多不過仲係好熱鬧



返到去中華路碼頭坐船過江；感覺上武漢既街道好乾淨企理，市容唔錯



買完船飛等上船；武漢市區比長江、漢水分開左主要三大區域，包括武昌、漢口、漢陽，而家係武昌坐船返去漢口



闊寬江面之上見到一條長江大橋，呢條橋係幾千公里既長江之上第一座大橋，而且仲係鐵路﹑公路兩用，因此被稱為「萬里長江第一橋」

橫跨漢水既大橋



長江上有好多唔同碼頭



經過江漢路返去酒店lu，行足成日大家都想休息下


休息左兩個幾鐘，夜晚8點出去食晚餐，係附近是但入左一間餐廳

食完係附近行行，呢頭有夜市，好多人好熱鬧，不過行兩行就返酒店lu，聽日要好早起身，大家都要早啲休息先得



琴晚係火車大家都訓得唔好，今日又行足一日，大家好快就訓覺啦；聽日仲要坐早機去上海，武漢一日遊話咁快就完成，哈哈^^

鐘意SeeWide的分享，給我們一個Like吧！