Day 1 日本東京親子買食玩自由行(06/2015)

作者：Wong Yik Fung Patrick

上次去東京自己一個去血拼，今次帶住一家人加上只有4歲的外甥去，要留意的事項多很多，完全感受到d爸爸媽媽帶小朋友去旅行有多辛苦，尤其如果地鐵站無電梯得樓梯要抬上抬落。不過，去到各大景點都有好多人推BB車，好多都設有保管BB車的服務，唔需要太擔心。其實一家人玩得開心，辛苦少少又有乜好怕喎！

Day 1: 香港>成田機場>酒店放行李>一蘭拉麵>原鐵道博物館>麵包超人博物館>新宿蟹道樂

今次第一次坐香草航空，夜機出發到東京成田機場。東京有2個機場，成田機場和羽田機場，多數香港出發的飛機都在成田降落。雖然成田機場比較遠離市區，不過如果貴少少坐skyliner一個鐘就可以出到新宿涉谷等旺區，非常方便。除左skyliner，我都推介Access Express去東京車站附近，兩者都好快好舒服。而skyliner更加有套票可以買Tokyo Subway Pass，1日/2日/3日pass 可以任搭無限次Metro及都營地鐵，不過不包括JR線。

東京鐵路網絡比香港複雜好多，由多間不同的鐵路公司營運，每轉一次不同公司的路線都要出閘再入閘，想要搭得平又要方便，一定要在出發前做點功課計一計最少出閘次數的旅遊路線。東京搭地鐵看似複雜，但只要有張鐵路圖就好清楚，好易知道要係邊個站轉邊條線，所以記住去到邊都帶住路線圖。路線圖可以係以下官網搵到。

(http://www.tokyometro.jp/en/subwaymap/pdf/routemap_tcn.pdf)

如果你無乜去郊外地區，買pass一定最抵，仲要買最多的3日，多幾百¥就可以多1日pass。套票要係機場T2京成鐵路櫃檯，詳情上官方網站參考。

(http://www.keisei.co.jp/keisei/tetudou/ckyliner/us/index.html)

Skyliner同Access Express都係同一個月台上車，唔好上錯車呀。藍色車係skyliner，橙色車係Access Express。

我們的酒店住在赤板，一個較為偏僻、近涉谷的地方。由機場去酒店用了一個多小時，早上11時到酒店放低行李，出去涉谷食午餐。第一餐就當然去朝聖啦，去食好多次都唔會厭的「一蘭拉麵」。香港得2間要排隊排好耐，黎到日本就好多地方都有店。食後感：係日本食始終比較好味xd（極有可能係心理作用）。

食飽就去下一站小朋友的最愛，去橫濱原鐵道模型博物館+麵包超人館。由涉谷去橫濱可以坐東急東橫線（subway pass不包）到新高島站再行過去。去自由行一定會唔識路問人路，我們遇到一個好好人的日本太太，見我們傻下傻下，佢推著個BB囡都親自帶我們行左10分鐘去鐵道博物館。日本人其實好好人！

拎住地圖都唔識行過去，哈哈。

原鐵道博物館展覽出無數由幾十年前到而家的列車模型，面積不算大，一個小時必定走畢，入場券承惠¥1000，4歲以上小孩半價。電車鐵路呢家野，大男孩小男孩都咁鍾意！

我就覺得大開眼界超級興奮，相反女仕們就…

麵包超人館離鐵道博物館好近，行過天橋走10分鐘就到。麵包超人係日本好受歡迎，好多日本人放假都會同小朋友黎玩。因為專門招待小朋友，係reception度設有locker同幫你keep住BB車，等你玩得盡情。

一出新高島站已經有超人歡迎你。

場內就有條滑梯，外甥仔排隊玩左10次先肯走。

一共有3層，每層都有小遊戲，要小朋友搵下野、答下問題、做下動作。3層遊戲通過晒，姐姐會送一個靚靚紙製麵包超人獎牌俾你。雖然姐姐淨係識講日文，小朋友唔識聽，但係只要你夠主動肯用動作答問題一樣過關！

真係好多小朋友！見到咁多公仔，大人都好開心！

麵包超人原來真係麵包黎！

帶住小朋友同架BB車真係幾支力。夜晚番到新宿已經散散地，一於去食大餐補一補。去過日本的人一定對這家餐廳不陌生，「蟹道樂」，好快樂。新宿蟹道樂位於Disney Store上面，離新宿站好近，5分鐘可到。

全個menu都係食蟹，價錢當然不平啦，平均一人¥6000。咁出名，物有所值！

Hotpot 蟹

第一日一落機就玩到去橫濱，係chur左少少，第二日hea下先得。

============================================

感謝 晉盈遊 提供以上資料

晉盈遊的網誌: http://chunyingtravel.com/

============================================