探險家攻略 > 休閒玩樂 / 城中探秘 / 旅遊 > 郊遊 / 特色景點 / 古蹟 / 廟宇 / 公園 / 其他 / 長線旅遊 > 蘇州。虎丘﹑七里山塘﹑觀前街

蘇州。虎丘﹑七里山塘﹑觀前街

由平凡人於 2015-07-14 09:25:00 發表 | 累積瀏覽 726

分類：長線旅遊特色景點廟宇古蹟公園其他郊遊；地區：中國

< 武漢﹑上海﹑蘇州5天遊 >

第四天

上海呢啲大城市對我黎講興趣不大，今次黎到上海係因為要借佢機場出入咋，我都係鐘意蘇州多啲，係蘇州唔需要去啲咩出名既景點，只要係舊城區入面就已經好靚啦


今日唔洗好似琴日咁早半夜就起身，可以舒舒服服訓到天光；今日行程好豐富，大家都急不及待出發，所以八點就已經去左食早餐



路過一間快餐店就入左去，不過啲小籠包睇落皮有小小厚唔係咁靚（味道已經唔記得啦）

早餐之後坐地鐵去到上海火車站，呢道有火車去蘇州

上海火車站超大！當年第一次坐火車黎到上海就係係呢道落車，計計埋埋已經黎過呢道好多次啦；好多人坐火車來往上海，去到買火車飛既時候已經要買個半鐘後既班次，所以都係預先訂定飛好啲



今次坐呢部CRH3C列車，係唔係好似日本新幹線呢？

由上海去蘇州最快最舒服就係坐高鐵，大約半個鐘車程就到；不過有時候覺得咁樣搭高鐵都幾搵笨，以前搭和諧號（動車）去蘇州只係廿幾蚊，而家搭高鐵去蘇州就四十蚊，實際上高鐵只係快幾分鐘...

咁岩旁邊有另一部高鐵一齊並排向蘇州行駛
旁邊個條係京滬線，由上海虹橋站前往蘇州北站再北上北京，而我坐緊既係滬寧線，由上海站前往蘇州站再北上南京，當中有一小段路係並排所以會見到鬥快既奇景（最後係人地部車行得快啲！）；如果去蘇州就要小心買錯蘇州北站，因為北站遠離市區好多好多

話咁快就黎到蘇州，今次係第三次到蘇州，估唔到而家蘇州站比以前大左靚左好多，上一次黎個陣仲係舊蘇州站，當時只係一個小小既火車站，環境同而家比差好遠

首先買好明天回程車飛；我諗新舊蘇州站有一個共通點，就係出站個時都係一樣有勁多拉客既人阻住你行，就好似要衝過木人巷咁，煩到爆炸

火車站呢道就有遊１坐，坐遊１可以去到好多蘇州出名既地方，好方便


總站上車唔怕冇位
蘇州巴士可以用上海一卡通，係上海買定張卡黎到呢道搭車方便好多

坐車去到位於觀前街既酒店check in放低行李；揀住係觀前街係因為呢道係蘇州前中一個最熱鬧既地方，食野買野都好方便，而且位於舊城區中心位置交通都好方便



安頓好之後已經成一點啦，即刻搵地方開餐
呢間餃子店上次黎個時都食過，我好鐘意食餃子所以今次再食多次



觀前街因為係「玄妙觀」之前而得名



蘇州普通既街道同建築都好靚，感覺好舒服



坐上遊１去「虎丘」；虎丘有「吳中第一山」之稱，當年蘇東坡有講過「到蘇州不遊虎丘乃憾事也」，係唔係憾事要黎過先知

隨街都可以見到小橋流水美景


山塘河由蘇州城通到虎丘，可以坐船黎都得，當然收費比坐巴士貴好多

入去虎丘啦，入場費60蚊



虎丘有一座好出名既「虎丘塔」，因為個塔係斜，又有「東方比薩斜塔」之稱；虎丘係一個非常有歷史既地方，不過歷史我就唔理咁多啦，專心欣賞風景仲好



入面環境幾靚架



有古裝美女表演琵琶

相傳呢塊係吳王闔閭既試劍石，被吳王一劈為二；旁邊有顧瑛詩句：「劍試一痕秋，崖傾水斷流，如何百年後，不斬趙高頭」

「傳說真娘為唐代蘇州名妓，相貌出眾，能歌善舞，由於自幼失去雙親，被迫賣笑青樓，但她賣藝不賣身，直到有富商重金買通老鴇，要真娘陪宿，真娘遂自縊身亡」

真娘墓

有表演睇bor，不過呢個表演好似同虎丘有啲格格不入


寫下生靜靜地欣賞美景仲好啦



虎丘入面有一個劍池，相傳吳王闔閭墓就係劍池之下，而且仲有三千把寶劍陪葬，信不信由你啦；「虎丘劍池」呢幾個字原本出自唐代書法家顏真卿手筆，幾來右邊「虎丘」兩個字日久失修損壞，由後人補刻，所以蘇州有句俗語「真劍池，假虎丘」

有兩個窿咁有趣



向虎丘塔進發



唔知呢啲係櫻花定桃花呢


去到虎丘塔前面啦！虎丘塔全名係「虎丘雲巖寺塔」，有過千年歷史，明朝時虎丘塔已經被發現向東北方向傾斜，經過補救措施後虎丘塔一直聳立到而家

虎丘景區入面環境幾好架



虎丘最令我印象深刻就係呢間小小既廁所！去過大陸都知道一般公廁衛生情況都強差人意，不過虎丘呢個廁所乾淨之餘仲完全冇異味，而且廁所入面仲有冷氣，可以話係一個五星級廁所！呢個廁所係我係中國咁多景區入面見過最好既一個！

虎丘都行得差唔多，行返去門口走人lu

離開虎丘後，坐遊１去到山塘街落車，遊覽「七里山塘」

清乾下江南時黎到七里山塘，御筆書寫「山塘尋勝」四個大字；清乾好鐘意山塘街環境，返到北京後之後係頤和園後湖仿照七里山塘模樣修建左蘇州街



山塘街係江南水鄉環境，點小得小橋流水呢


山塘街係明清時期蘇州最發達地方，經濟商業好繁榮，而家好多人非常熱鬧；當地有民歌咁唱「上有天堂，下有蘇杭。杭州有西湖，蘇州有山塘。兩處好地方，無限好風光」，證明山塘街係蘇州人心目中地位有幾重要



山塘街好似普通街道咁免費進入，當然如果想入啲指定景點參觀就要另外買飛



隱約可以感受到古時山塘街船來船往既熱鬧景象，不過而家天開始暗人都開始少，如果夜晚黎呢道既話會有另一番靚景，我見人地夜晚影既相超靚



又有古裝美女出沒


行完山塘街出返黎lu；門口整個咁既牌坊係道，唔知有冇人會覺得同外面環境有啲九唔搭八呢？

山塘街出面環境都係咁靚



天黑前離開山塘街，坐遊１返到觀前街

咁多小食店，整返串先



觀前街有超多餐廳選擇，咩都有得食

求其入左一間餐廳食麵


晚餐後媽媽係附近行街，我就同朋友去到位於平江路既「貓的天空之城」cafe，我好鐘意呢間cafe架，有好多好靚既postcard，可以係呢道慢慢寫，上次黎到蘇州都係呢道消磨左好多時間架

Cafe旁邊係「明堂青年旅舍」，上次同一大班朋友就係住呢道；旅舍位於平江路之上，環境好靚，當年我冇揀錯住呢道，哈哈

寫完postcard出來平江路已經關晒燈，今次再次同平江路無緣...平江路係蘇州一條歷史老街，有超過800年歷史，平江路係蘇州古城至今保存最為完整既一個區域，係呢道可以睇到古時蘇州居民既真實面貌，可惜上次行唔到今次有行唔到...如果下次有機會再到蘇州一定要行行平江路！

寫完postcard已經好夜啦，由平江路行返觀前街既小巷街燈已經熄晒，我同朋友三個人打開電話電筒一齊跑返去觀前街，呢個時間觀前街已經冇咩人行，不過就多左好多拉客既人，不停想拉你去搵蘇州美女，哈哈^^我地就唔理咁多，早啲返酒店訓個好覺仲好啦

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

Leon690 於2015-07-14 10:13:03 留言
蘇州美女古時就好出名, 依家就唔知啦...
舉報回覆
No.1

平凡人於2015-07-14 21:19:58 留言
原文由 Leon690 於 2015-07-14 10:13:03 發表
蘇州美女古時就好出名, 依家就唔知啦...

而家應該都唔錯既，哈哈
舉報回覆
No.2

stellaluk 於2015-07-15 08:43:27 留言
引用自 '平凡人' 的相片：
回覆：不知是馬定驢，總之辛苦你了！
舉報回覆
No.3

stellaluk 於2015-07-15 08:45:55 留言
引用自 '平凡人' 的相片：
回覆：好似電影裏飲花酒的花艇
舉報回覆
No.4

Leon690 於2015-07-15 11:18:38 留言
原文由 stellaluk 於 2015-07-15 08:43:27 發表
引用自 '平凡人' 的相片：
回覆：不知是馬定驢，總之辛苦你了！

我之前都坐過依D車, 問個個人 ,佢話係驢仔, 因為比馬粗食、重負，價值平, 一般壽命20歲
不過做苦力10歲就完,

驢仔一個載我地6個人, 個司機係咁打佢叫佢行快D, 我地叫個司機慢D啦, 跑死佢啦, 到站聽到佢行完係咁喘氣, 我問個司機叔叔, 驢仔要快D退休啦, 司機話如果佢地唔做得一般都係煮左佢食, 真係覺得係祖國工作O既動物都特別幸苦D...
舉報回覆
No.5

1874飛飛於2015-07-15 14:28:04 留言
未見過咁樣既虎丘, 都係秋冬景好d
舉報回覆
No.6

stellaluk 於2015-07-15 14:38:04 留言
原文由 Leon690 於 2015-07-15 11:18:38 發表
我之前都坐過依D車, 問個個人 ,佢話係驢仔, 因為比馬粗食、重負，價值平, 一般壽命20歲
不過做苦力10歲就完,

驢仔一個載我地6個人, 個司機係咁打佢叫佢行快D, 我地叫個司機慢D啦, 跑死佢啦, 到站聽到佢行完係咁喘氣, 我問個司機叔叔, 驢仔要快D退休啦, 司機話如果佢地唔做得一般都係煮左佢食, 真係覺得係祖國工作O既動物都特別幸苦D...

另一方面，我都不看馬戲，都是怕想起到佢哋受訓的苦況！
舉報回覆
No.7

平凡人於2015-07-15 23:13:00 留言
原文由 stellaluk 於 2015-07-15 08:43:27 發表
引用自 '平凡人' 的相片：
回覆：不知是馬定驢，總之辛苦你了！

睇顏色似係馬，不過我唔係好識分
舉報回覆
No.8

平凡人於2015-07-15 23:14:17 留言
原文由 stellaluk 於 2015-07-15 08:45:55 發表
引用自 '平凡人' 的相片：
回覆：好似電影裏飲花酒的花艇

哈哈~證明啲艇夠晒特別
舉報回覆
No.9

平凡人於2015-07-15 23:17:32 留言
原文由 Leon690 於 2015-07-15 11:18:38 發表
我之前都坐過依D車, 問個個人 ,佢話係驢仔, 因為比馬粗食、重負，價值平, 一般壽命20歲
不過做苦力10歲就完,

驢仔一個載我地6個人, 個司機係咁打佢叫佢行快D, 我地叫個司機慢D啦, 跑死佢啦, 到站聽到佢行完係咁喘氣, 我問個司機叔叔, 驢仔要快D退休啦, 司機話如果佢地唔做得一般都係煮左佢食, 真係覺得係祖國工作O既動物都特別幸苦D...

多謝師兄解答，原來係驢仔不過要拉咁重真係好辛苦，而且辛苦完仲要比人食
舉報回覆
No.10