9 Fish & Chick：桌桌有魚

由山區麵包王於 2015-07-06 00:00:00 發表 | 累積瀏覽 1331

分類：餐廳；地區：西環

有咗港島西延線，嚟西營盤、堅尼地城真喺超方便，亦開始多咗走入依個小社區覓食。好似以前到訪過嘅Café Malacca、Piccolo Pizzeria & Bar，都喺唔錯嘅食店，當然，依區仲有好多卧虎藏龍。今晚同朋友嚟到嘅Fish & Chick，雖然唔喺咩名店，但出品一樣出色有水準。

由堅尼地城站行過嚟位處新海旁街嘅Fish & Chick都喺10分鐘左右，超方便。店舖唔喺好大，連埋吧位，應該都唔過30，但極有氣氛，感覺熱鬧。一室藍、白、黃，加上好多與海洋相關嘅擺設，樓底又高，雖然因為門面喺開放式，室內溫度有點高，但一杯冰凍嘅檸檬梳打，暑氣全消。

雖然由友人發辦，但都想了解一下有咩菜式，英式炸魚、法式烤雞固然喺店家嘅主打，原來仲有唔少小食、沙律、煎魚菜式，以及自家製甜品。

飲品方面，一系列梳打、凍飲，竟然仲有多款咖啡、花茶、啤酒及各類餐酒，真喺睇佢唔出，麻雀雖小，卻喺五臟俱全。

檸檬梳打 $35

一大杯檸檬梳打，夠冰凍，味道酸香清爽，啱晒一陣一邊食住啲吉列小食，一邊飲住杯檸檬梳打。

有氣果酒 $60

Brother’s Cider有氣果酒，有蘋果、士多啤梨、野果、啤梨共4款口味。想試，又唔飲得多，可以點一枝兩份飲。桃紅色嘅有氣果酒入口冰涼，帶點自然嘅果香味，酒精度低，非常易入口。

小食大部份都喺超熱氣嘅吉列食品，如炸鮮海蝦、炸魚手指……人少少大包圍就點「滋味海鮮籃」（$140），有齊炸鮮魷魚、炸生蠔、炸蟹球、炸鮮海蝦及炸魚手指，不過，樣樣得兩、三件，適合兩、三個人嚟食。

秘製炸蟹肉球配沙律 $100

依一款喺店方推介嘅小食，一客有6粒，外層炸得金黃，一咬香脆而唔油膩，裡面蟹肉好足料，口感軟綿；中間仲伴有大量沙律菜，少少油醋調和，平衡一下熱氣嘅炸蟹肉球。

炸生蠔 $80

從餐牌所知，喺新出品，同樣都喺一客有6粒，雖然外屠金黃，但可能生蠔本身比較濕，做出嚟嘅效果無蟹肉球咁好食，外層較厚較黏。

鯛魚配燴雜菜 $140

雖然英式炸魚喺招牌，但香煎即日鮮魚亦幾特別，有鯛魚、鱸魚、盲曹，另仲有一款焗製嘅法式鹹鱈魚蓉配鵪鶉蛋。賣相精巧立體，鯛魚起肉香煎，皮脆肉嫩，魚面鋪上大量火箭菜，令道菜睇落更清爽，而魚底就墊有大量燴雜菜，有甘筍、茄子、青瓜、三色椒……等等。不妨唧啲檸汁，一來苦澀嘅火箭菜較易入口，二來魚肉更鮮味。

無鬚鱈魚配薯條 $145

平時食炸魚薯條都唔知喺食緊咩魚，餐廳有咩就賣咩，但晌度就唔同嘞，一共有7款嚟自唔同地方嘅魚類可供選擇，我哋所食嘅無鬚鱈魚（Hake Fish）喺嚟自紐西蘭，小弟都喺第一次聽有此品種漁獲，亦喺小店嘅新出品，加配青豆蓉需再補$25。

整份炸魚薯條的確大份，而無鬚鱈魚大大件，又厚身，一身炸得如披上金衣，色澤金黃，一刀切開，脆得交關，應聲咔嚓裂開。外層粉漿好薄，非常香脆，魚肉則嫩滑鮮甜，雖然店員介紹一隻亨氏麥醋，專用嚟食炸魚，但小弟愛佢嘅自家製他他醬，酸咪咪，又唔會咁易整濕個外皮。薯條「專登」做得粗身，叫人食得豪邁，而青豆蓉清甜豆味濃，咁食法又幾得意。

法式烤雞 $180

全隻$180送兩款伴菜，而半隻$90則送一款伴菜，伴菜有蘑菇、燴雜菜、薯蓉、青豆、甜粟米和沙律菜可以揀。焗好嘅烤雞，散發出陣陣香草味，外皮帶點脆，卻唔油膩，而雞肉既嫩滑，又入味；伴菜揀咗甜粟米同蘑菇，前者加入牛油炒，後者則用上黑椒炒，兩者都同樣味美。

自家製甜品一共有3款，分別喺朱古力軟心蛋糕配雲呢嗱雪糕、意大利奶凍、檸檬罌粟籽蛋糕。

朱古力軟心蛋糕配雲尼拿雪糕 $65

賣相精簡，個朱古力軟心蛋糕外觀似扁身嘅心太軟，切開當然唔會流心，但就喺軟心，形成一個半熟狀態，朱古力味超濃郁，帶點甘苦味，拼埋啲雪糕一齊食，一凍一熱，過癮乎！

講明Fish & Chick，差唔多枱枱都有英式炸魚或法式烤雞，見有咁多客幫襯，就知水準不賴。朋友話一晚食咁多炸嘢怕唔怕，對小弟嚟講，應該綽綽有餘，因為，又唔喺日日食，偶然一次食得開懷痛快啲啫！

個人評分
味道：8/10
環境：7/10
服務：9/10
抵食：8/10
平均每人消費：HK$230

餐廳資料：
Fish & Chick
西環堅尼地城新海旁街25號地下6號鋪
2974 0088

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================