每份工作都辛苦

20.07.2015

小地勤依幾日都放假 , 3 日假今日已到尾聲 . 依幾日都好忙 , 忙執屋 , 之後要裝修 . 其實我好少買衫同鞋 , 自從開始儲錢 , 我都好少亂買野 , 一來唔想花錢 , 二來唔想浪費 . 我好清楚自己買左咩野 , 放左係邊 , 因為執屋同點數係我每兩個月必做既事 .

我男友成屋都係衫 , 佢既衫係我既 5 倍 , 我堅逐件數 , 仲比我執左一大箱全新未開既衫同褲 ... 我地性格完全相反 , 我節儉 , 唔亂買野 , 鐘意儲錢 , 而佢就大洗 , 鐘意就買 , 要洗到一蚊都無 . 其實小地勤係行軍訓形既人 , 我男友成日笑我將來會係惡媽媽 , 我其實似佢呀媽 , 多過佢女朋友 . 

近半年 , 係 Seewide 發現多左好多新手追隋者 , 佢地既加入都係想更清楚地勤既工作同生活 .

地勤既工作唔難 , 最難係處理 Delay 而又無 Slot ( 起飛時間 ) 既航班 . 如最近上海玩完 , 依加再玩北京既空中管制 ( ATC ) . 正常來說 , 如果當地無 ATC , 飛機完成登機程序不久 , 就可以推出跑道等起飛 . 假如遇上 ATC , 就要由目的地分配一個 Slot 時間比你先可以飛離香港 . ATC , 無人會知道要等幾奈先可以起飛 .

所有地勤都討厭大陸既 ATC , 大陸既機場就算設備再好 , 機場再大 , 人手再足 , 都永遠不及香港 , 原因係天空是軍方的 , 不是旅客的 , 常常 Delay , 亦常常累幾他機場 Delay , 呀公再多錢都除唔去 Delay 排第一既美名 .

可能有些朋友會覺得小地勤人事方面比教難攪 , 其實只係我個人問題 , 因為我唔係大家所認識既 check-in 或閘口地勤 , 我係一名係細部門工作 . 而部門人數又得十幾個人 , 要自保要唔講是非係好難 . 我只希望同事既是非當中 , 我永遠不要做主角 . 一般地勤每日返工會拍不同既同事 , 一日做咁多班機 , 每班機唔同人 , 只要你唔該前唔該後 , 做好自己既野 , 根本唔會成為犯眾僧 .

好多人做地勤 , 目的係想轉空姐 , 不過空姐既福利早就大不如前 . 除左大型航空公司仲可以 stay over 外站一 , 兩日外 , 小型航空 , 如大家都認識既龍仔同小地勤間公司 , 一星期起碼飛 4 日 , 1 日就 Standby , 就算 stay 外站都只夠係訓覺 , 唔夠你去玩 .

地勤同空姐今時今日都唔係咩吃香航業 , 好多航空公司仲要將地勤轉型做 handling agent , 目的係再賺多一點 , 而 handling agent 根本不算航空公司 , 又點會有一折機票 , 就算小地勤當年因早入行 , 仲有一折 , 亦有 5 套免費票 , 但都要有位先上到機 . 而現今香港 , 人人都大把錢 , 亦愛旅遊 , 上機機會率真係大減 . 有時機票做特賣 , 仲平過所謂既一折 .

現實咁講一句 , 剛畢業搵唔到工 , 航空界絕對容易請人 , 玩返過一 , 兩年 , 如果仲好鐘意份工應該留低 , 否則都係早點向現實低頭 , 係出面搵份穩定加正常返工時間既工作 .

一 , 兩年絕對夠你玩曬亞州熱門城市 . 小地勤公司又請人 .

2015 年 8 月 7 日係機場富豪 B/F 威靈頓廳 0900-1800 即場面試

有興趣就記住帶定學歷 , CV , 工作證明以及近照自行前往

對比起小地勤剛入職 , 現在 FOC ( 免費票 ) 由 5 套減到 2 套 , 再遲些入職的 , 可能連 FOC 係咩都唔知 ...