8 [親子旅遊] 長洲 Cheung Chau

今日係端午節，我哋一早就約好咗大舅父要到長洲睇佢比賽！

其實係近三年我哋每逢端午節嘅指定動作


今日因為呀芊發燒所以今年只有我同Hysan出發

我哋都冇特別話安排好幾點起身出門口，

因為始終係放假，都想輕鬆D

早上大舅父就話Wtsapp我知佢大概12點幾比賽

我哋10點幾就先落街食個早餐先

我哋去咗「開心小敍」，

呢間本來位於元朗雞地嗰邊既茶餐廳，

居然喺我樓下附近開咗分店，

佢哋最出名係豬扒煎蛋飯，不過我我哋嚟食早餐

就嗌咗個豬扒煎蛋通，

豬扒確實係好味，其他嘢就普通囉






我冇特別睇過船期，

真係諗住去到碼頭先算，

我一去到係11:40，職員話快船12:00開，

我哋就Do咗入去先，因為好多人

點知未到12點，就可以上船，滿座就開船了




在船上的Hysan好興奮，睇到大海大浪大船！

今日天色真係不錯，仲好熱Tim





Hysan望住個海突然問我

Hysan「Daddy, 點解D浪係白色既?」

我「...」
我哋差唔多12:20就落船了

都有一年冇嚟過長洲,

今日好熱鬧, 但人唔算太多! (可能對香港人嚟講仲早)













我哋第一時間去唐記搵大舅父先

因為佢哋呢隊獅藝龍既龍舟隊，

年年都會喺呢度打「櫈」！

幸好大舅父仲未落場，

佢俾其他人玩先，自己要到2:40先比賽！









我哋行行吓，見到有間賣豆花的小店，

就先停下來補充吓體力先

見到佢有自家製「純鮮奶魚仔燒」，

於是買$20/4件支持吓

老細話佢哋呢部係全港唯一一部自動烤魚餅機

凍豆花$12碗，

不過唔係咁鍾意佢用膠碗，

一來冇咁有特色，二來好唔環保

我都明洗碗人工依家好貴...





之後見到一大棑檔廚房後吊住一隻隻雞,

Hysan見到好攪笑! 叫我影低一陣俾舅父睇



之後一邊行一邊見到好多特色小店

如果同老婆一齊就會逐間逐間慢慢行

跟住見到有間賣自製雪條既餐廳，

賣$8/支，可惜只賣剩椰子/蜜瓜/奶茶及咖啡味，

所以Hysan揀咗支椰子，我就揀咗支奶茶

佢係用不銹鋼器皿去急凍，

好似我哋細個自己用果汁整的雪條一樣

奶茶雪條有點甜，唔知可唔可以叫佢整多款係少甜既雪條呢！

椰子味濃，真係超爽！天氣咁熱食番條止止熱都OK












其實喺長洲你會見到好多檔賣緊，

但係呢檔先至係最正宗的！

所以千祈唔好去錯檔，





跟住再向住沙灘方向行，

當然唔少得係嚟食扭扭薯片啦，

好似嚟到長洲唔食佢唔似嚟過，

不過自己食過咁多次反而想試新嘢

所以買咗一支大薯棒再加多一支大蝦棒

都係各$20！

不過大蝦棒就有點失望，

佢其實都係炸蝦，一隻點上沙律醬，另一隻就點上泰式甜酸醬，

冇咩特別，而且炸蝦皮仲唔夠脆！好似擺咗好耐咁






之後睇時間都差唔多到大舅父上場，

我哋就行內街番去唐記

跟住發現一間店nitti-gritti

係我之前喺巿集認識過的，

所以入去打個招呼，

裡面賣既嘢都好有特色，

有部份物品係購至土耳其等其他國家！

所以唔會咁容易喺其他店舖見到㗎！

最近Hysan架單車撞爛咗個呤噹！

咁啱見到佢哋又有得賣

$58雖然有點貴

但係都懶得去單車舖配，

所以就買咗，等Hysan可以自己維修！










行行吓又想食冰菠蘿，

不過見到有個仲吸引，係小冰西瓜！


我哋番到去現場，見到大舅父要落場了！

準備要開始了，我同Hysan坐在碼頭邊，

要為舅父打打氣！

賽事開始了...

結果我就唔提了...因為被封口唔講得，總之冇嬴到啦！

雖然輸咗，不過唔緊要！大家至在開開心心過一個端午節

所以最後嚟張大合照！

這樣也可以讓Hysan學習，比賽輸咗都冇所謂

俾佢知道「志在參興」既道理
跟住我哋就成班一齊去東灣沙灘玩，

中間經過頭先既大大粒魚蛋

我就買咗一串再加一串龍蝦搭芝士丸食

真係好好食呀！皮脆肉厚！芝士丸爆出嚟好香，龍蝦丸落足料

總共承惠$25





去到沙灘，Hysan玩得好開心，

俾大舅父掉落水，嗌哂救命！笑死我

成班龍舟隊落哂水飲啤酒，好開心！



玩玩吓水, 同舅父走咗去摸蜆!


仲有好多靚姐姐陪Hysan玩

我都行埋一二邊等佢慢慢玩！




差唔多5:30我哋就番去碼頭

買咗麥記買咗個魚柳飽餐，

邊食邊等6:00快船！好精彩既一日

番到屋企Hysan行行吓都同我講「Daddy, 我今日好開心！」

============================================

感謝 呀劍萬帥 提供以上資料

呀劍萬帥的網誌: http://kimfamilytravel.blogspot.hk/

============================================