探險家攻略 > 休閒玩樂 > 農莊 > [親子旅遊] 上水假日農場 Holiday Farm

8 [親子旅遊] 上水假日農場 Holiday Farm

由 kimfamilytravel 於 2014-10-03 00:00:00 發表 | 累積瀏覽 1985

分類：農莊；地區：上水

今日我哋去咗上水假日農場, 本來預約咗尋日去, 但係因為有朋友報料俾我知道尋日超多人, 所以改咗今日先去!

今日老婆要做Facial所以我要先帶住2個小朋友先去玩, 我同Hysan & 芊芊落樓下食咗個早餐先, 跟住就同佢哋搭76K巴士由元朗去到上水, 落咗巴士後就即刻搭的士入去農場, 都只需$40多(因為帶住BB車, 所以都搭公車都唔方便) 只係10-15分鐘就到農場入口, 假日農場需要事先成為會員, 同埋email或電話book日期, 在門口有個姨姨會收費同埋確認你身份同你的booking

跟住入到去第一時間見到個千秋同好多個打拳用的沙包, Hysan一見到就走埋去推撞D沙包同攬住玩, 這個時侯出現咗個意外, 因為D沙包2邊搖, 芊芊這個時侯行咗埋去沙包群裡面, 正正有個沙包被推撞番埋嚟, 就撞到芊, 芊向後跌, 個後腦撞埋石地....我好驚好驚, 即刻抱起佢睇吓有冇事, 好在佢喊完都冇咩嘢, 所以大家如果有帶小朋友去真係要好小心!

Shutter Speed | 1/100 s

Aperture | f/2.8

ISO/Film | 160

我哋沿路邊行邊玩邊影相, 佢哋真係超級無敵多嘢玩，沙包->千秋->木頭車->繩索->水管滑梯->氹氹轉->騎草馬.....假日農場有些玩樂設施只開放1-3點! 因為要有職員從旁協助! 你睇相就知有幾多嘢玩了, 可以足夠唔停咁玩半日, 跟住又去餵羊, 佢哋有好多隻, 不過買草要一路行落去小買部就有少少遠(3分鐘路程) 到咗1點, 我只係同Hysan玩2個最多人玩的設施, 一個係飛天繩索, 一個係坐落去個水桶度滑落去, 佢坐咗落去我只係見到佢個頭頂....2條隊都係排咗大約15-20分鐘, 我想像到如果係10月1日嚟可能仲多人

排咗成廿分鐘先玩得個10秒！

呢個飛天繩索飛完係要自己拉番去，出得嚟玩預咗要還

之後同佢再去排多一個遊戲，係坐係水桶到滑落山，一去到已有15個人，於是我就去排隊，係排隊隔離放咗幾張吊牀係度，等佢哋2個可以過去瞓吓玩吓，打發吓排隊既時間，終於到Hysan啦，因為我要睇住妹同影相既關係，所以要佢自己一個玩，其實都幾斜幾驚架，排係後面個男人都唔敢相信佢可以自己一個人玩，其實好多時你只要唔放大件事，你自己都唔覺得驚，個小朋友根本都唔會驚，大家可以不妨試一試！

人坐底咗幾乎見唔到佢個頭

跟住因為芊芊都差唔多要食飯, 所以未到3點我就唔玩其他啦, 同佢哋落去小買部附近坐低食嘢, 都幾好坐, 幾舒服! 好在唔多人, 如果唔係都唔知坐係邊度settle down, 呢度其實有燒烤場, 但係要之前book定! 起初都覺得燒嘢食既場會好逼, 好唔舒服好熱, 但係好疏落, 同埋個日都唔係太熱! 有風

跟住食食吓嘢媽咪到了, 我哋再去埋其他地方行吓玩吓, 見到好多牛, 又餵兔仔! 最後再玩吓其他玩過或未玩過的設施, 我們就走了!

Camera | CANON 5D Mark III

Len | EF 24-70mm f/2.8L II USM

最後差唔到就5：00，要走了！本來以為唔知去邊度可以截的士，跟住朋友叫我去小買部話有好多的士call台, 於是我是但打一個就即刻有, 仲好快到! 所以離開完全唔係問題

呀劍評分: 8分

呀劍評語: 如果閒日去少人D, 可能會俾更高分, 好多唔同設施玩，設施都係以環保原則設計，由於不在地面，空氣好又開揚，實在值得一家大細去, 如果多一家人去的話仲可以燒埋嘢食! 可以一早去玩到4-5點都得! 廁所就污糟少少, 不過農場嚟講好正常!

呀劍貼士: 裡面小賣部都有d嘢飲嘢食賣, 沿路又有棉花糖/ 蛋撻/ 茶粿等小食, 都唔怕會餓親! 如果你朝早去可能就要帶埋D嘢食去for lunch好D! 另外都係換片要自己搵個地方匿埋換!

假日農場簡介
農場共分五個區域，包活遊戲區、植物園、原野活動區、小小動物園以及創作坊。導賞員會帶參加者走一個原野生態漫遊，參觀沿路的植物園中的植物。在 5、6 月的時候荷花池內的荷花盛開，配上一個錦鯉池，簡直是取景的好地方。

地址
上水大隴坑村

交通
車輛可直達本農場,沿途有路牌指示,由上水到本農場行車時間約10分鐘
上水火車站轉乘的士,車程約15分鐘,車費約$50

電話
2668 4055 / 2670 2345

網址
holidayfarm.intimex.hk/default.html

(以上資料更新至文章當日)

============================================

感謝呀劍萬帥提供以上資料

呀劍萬帥的網誌: http://kimfamilytravel.blogspot.hk/

============================================

鐘意SeeWide的分享，給我們一個Like吧！