禽日收咗同事一個WhatsApp： 內容是這樣的：
「各位小心， 這是我今朝的親身經歷：我屋企剛剛收到個無來電顯示的電話，一拎起是普通話錄音，通知我話有份文件擺喺中聯辦，叫我按2字與職員聯絡 。按後有一大陸男人問我攞姓名，我唔敢俾，問佢咩事？佢話無名CHECK唔到，於是我問佢攞低電話號碼，話會打返俾佢。佢俾咗21009004呢個電話過我。我唔知好唔好打番去？但老公話好大機會係騙案，叫我唔好理佢！」
睇完呢段Apps後，撩起咗我嘅好奇心，順便學吓野，睇吓究竟啲騙徒用乜手法呃人？我即時打電話去了解一下！第一次打去，無人接聽，轉咗去留言服務，我霎時間唔知噏乜？唯有求其問係咪大快活？我想落二份早餐柯打，第一份要五香肉丁湯粉，煙肉炒蛋，涷奶茶少甜多冰，第二份要麥皮，餐肉炒蛋，鴛鴦走糖多奶。大家記住，千祈唔好用自己手機打去，因為俾對方知道你個手機號碼，分分鐘玩返你轉頭，每晚深夜三點，依時依候收到電話叫你起身疴尿，咁就真係偷雞唔到蝕揸米！
我用公司電話打去，所以無有怕！到咗下晝，我又再打去試試 ，呢次竟然有個女仔接聽，我問係咪中聯辦？佢話我今日唔係第一個打去問呢個問題，我應該收到騙徒電話。咁我問佢間係乜公司？佢話係工聯會，我扮野話：我以為真係中聯辦有緊要野搵我添！我收線之後，跟住喺網上用呢個電話search，睇吓係咪工聯會，但係搵唔到，如果大家有時間的話，麻煩幫手核實一下呢個電話！
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
