2013 毅行者 Support

繼2011年參加毅行者後，呢兩年都有support 公司隊友或朋友既參賽。今年唔止提供食物，仲一齊行添！仲要係針、草、帽添！

今次要support 嗰隊勁堅，三十小時內可以完成。跟據估計，朝早5點左右，就已經去到城門水塘。我哋五個support 既友人，相約4點鐘係深水埗等，然後買埋早餐、汽水，搭的士去到城門水塘。

去到城門水塘搵個位坐吓既機會都無，周圍都係support 既朋友，咩嘢食都差唔多可以係度搵到。好辛苦咁搵咗個位坐。此時天空仲見到好多星星，我哋坐底無耐，就已經見到隊友落山，佢哋真係好快。食完嘢，抖咗一陣 大家就起行。我哋support 既都幾流，行得仲慢過佢哋，算啦！好明顯我哋係遊玩，同埋自己影相。

今次再行針山，都發覺佢真係幾多樓梯wor，但無論行得點辛苦，都唔夠九龍坑山。呢個山真係唔想再行。

用咗9個字既時間，上到去針山山頂。跟住落山，然後再行草山。呢段相對輕鬆。但對比兩個已經行咗一日既毅行夫妻，佢哋真係好堅，唔覺得佢哋無力，同埋眼瞓，仲好似快過我哋呢D啱啱行既朋友。

不知不覺去到草山頂，落埋山就到check point。今次反而覺得呢條落山既山路樓梯都幾多，行極都未完，D梯級又高。排排隊咁落完山，就到第七個Check Point － 鉛礦坳。

鉛礦坳永遠都係大站，幾時都咁多人。加上有好豐富既補給，唔同味既壽桃牌杯麵。無論競行者既朋友，或是support 既朋友，都可以係度食飽飽再行過。



大約9點鐘，我哋又再次起行。亂石陣中上大帽山，永遠都會記得。

今次秋高氣爽，又唔係比賽，感覺真係唔同D。而上到山，又見到一片既禾稈草，真係舒服。唔知係唔係今次日頭上嚟呢，覺得點解條路咁長，行極都未到嗰亭。應 該行咗差唔多一個鐘先見到。當係見到嗰亭，好開心既時候，不幸既事件就發生 － 係山上面拗柴，再一次係大帽山跌到啦，上次係嘔，今次仲要衰到拗柴。坐係舊大石度，除咗鞋，腳已經腫咗，佢哋即刻攞撒薩巴斯幫我噴，最勁仲有紗布、膠紙， 真係咩嘢都齊。因為用紗布捆到好實，雖然係有D痛，不過都要頂住落山。

過咗嗰亭，係一條上斜路，雖然腳係有D痛，但都可以。沿途見到猛龍隊，佢哋由視聽障人仕組成。好堅，佢哋可以行得咁快，當年我哋參加時，呢個時間，我哋只係出金山郊野公園。上到去嗰波度啦！明明帶咗相機，可惜拗柴，已經叫人幫我攞袋，唔通仲攞部相機玩咩。

跟住就係落斜啦！落斜真係有D難度，隻腳 feel 度有D有痛。所以都只係以普通速度落山。唉！話support 人wor，居然...... 返到屋企一定俾阿媽同細佬話啦！一唸起呢part 都無心機。

落到山，毅行夫妻都應該差唔多抖完，繼續向9、10段出發。我當然即刻歸家，沖完涼，快D落去睇跌打。