2013 雷利衛徑長征
![]()
2011年參加競行者，今年又無無聊聊，於是報咗雷利計劃。先頭唸住競行者辛苦，其他行山運動都係簡單架嗱，點知原來呢個一D都唔簡單。
整個比賽要32小時行晒整條78公里既衛奕迅徑。我報名時都無留意，以為好似競行者咁，兩日行晒整條衛徑。後來發現奶嘢。我哋差唔多每星期都練習，不過每次都係行一至兩段，今日要一次過行晒八段，真係想死。
9點鐘去到起點陽明山莊，混亂中辦理報到、入水、寄行李等事情，跟住9點半就起行啦！一開始落水塘條車路都還可以，一轉入山路，真係單程路，就好似塞車咁，一有人慢少少，即刻停晒係度。去到上山既路，因為上山個個能力都唔同，即刻分散咗唔少人。
星期六既天氣清涼，雖然都曬同熱，不過都有D風，真係算唔錯。但今日點都好，都無心情慢慢欣賞風景。
接住行第二段港島徑，開始散咗部份人，不過都未至於順暢，而我哋亦俾預期快咗少少。去到鰂魚涌地鐵站，又拉根、又飲嘢，完全莫視規則，但真係無辦法。
搭地鐵過海去到油塘。由油塘起，之後行上五桂山，暫時都係第三段，所以都仲叫頂得順。去到第四段－井欄樹，有阿哥、聰、Simon 同 Ivy 一齊行，感覺無咁悶，心情好好多。好快咁上咗去山頂，係飛鵝山道等大家，但第二個到既居然係 Ivy，佢真係好勁，非常人。
之後接住飛鵝山道上去山頂，係一個彎位，居然有架好快既私家車走上嚟，我哋企晒兩邊，佢轉彎又無收油，差D俾佢撞到，真係堅驚，恐怖到連車牌都無留意。被
車嚇一嚇，所以都攞定頭燈，唔想無端端俾車撞。到咗山頂，望見夜景，無嚟過既朋友都會覺得好正。所以影吓相。之後就沿車路落返獅子亭。呢度俾我哋預期早咗
兩小時，所以可以抖耐D，同埋食晚飯，不過我知我食唔到，所以我係無食架。飲咗碗番茄湯，食咗幾塊餅就算。抖咗成粒鐘我哋先出發。
行沙田坳到大埔公路呢段，次次行都悶爆，因為沿引水道行，又無嘢睇！又快唔嚟，足兩小時。夜晚十點半，去到第五個站，見到Perry同埋 Jonah
朋友，要塗吓按摩膏同坐底抖抖。大約停留咗廿分鐘，又要起行。由大埔公路出金山郊遊徑，再到城門水塘。雖然話兩粒星，但體力開始下降中，已經覺得好攰啦！
到達城門水塘抖咗一陣，跟住就向鉛礦坳出發。我記錯咗呢條路一路行石屎添！點知行咗一陣，就沿水塘泥路走。足足行咗成6公里咁滯，悶到人都癲。之後接住真
係石屎路，係咁上斜，行咗好耐先去到鉛礦坳，最慘鉛礦坳唔係check
point，仲要落埋去元墩下先得。我既眼瞓指數勁高，所以係呢度都瞓咗一陣，之後就係上我最驚既九龍坑山。估唔到天光先嚟行，條路望得咁清楚，想避開低
頭狂行都唔得。不過見到好多晨運客，心情都開心少少。上完第一節樓梯，太陽已經好曬，係太陽射住下，要挑戰第二段45度斜既樓梯，相信呢度行十次，十次都
覺得恐怖。
過咗九龍坑山後，大家既體力好似下降得好快。一路行出去鶴藪既路覺得非常漫長。而我跟住 Per 行，心��面只係唸，快D到第7個check point，我想瞓覺。所以一去到就set 好自己嗰位做露宿者。唔知瞓咗幾耐，佢哋食完嘢抖完再起行。
差唔多11點先出發，超曬同熱既環境下，行上屏風山。啱啱起行屏風山都仲好D，但行行吓真係開始死，完全以龜速行走，係超級辛苦咁樣行先上到黄嶺。我可以
形容自己係死咗九成。過咗黃嶺都唔明點解行極都未到八仙，完全係唔知點行，用意志力都頂唔順，又覺得腳軟，又眼瞓，食嘢又嘔。係咁既狀態下，真係行咗好耐
先去得到仙姑峯。跟住佢哋係落山既樹蔭下抖抖。一去到就攤係地到瞓，死咗一樣，佢哋叫我食蕉補充吓體力，我都只係食咗兩細啖，點知當我起身，即刻嘔埋出
嚟。
瞓咗一陣，可能身體唔知咩指數回覆咗D，雖然都係唔食得，連得力素都嘔，但起碼無之前咁腳軟。但一開始我都唔想谷住D氣，所以都係慢慢行。呢段係預計兩小
時，但行咗一個鐘，見到個牌寫住仲有個半鐘先到南涌，真係有D驚，因為我得返一小時到終點。係無水同埋渴望有水源或冰凍可樂甚至烏龍茶既情況下，開始行快
咗。但最正我記得要圍住其中一個墓地行，一路行係超渴望快D見到佢，咁先証明我就快行完。終於見到之後，上返車路，指示寫要9個字，我得15分鐘時間，所
以完全係狂跑之下，係完結前既幾分鐘，跑到終點。
意志力簡直唔知幾時會爆發，我亦唔相信我可以係最後跑落山。不過亦因為咁，先可以係最後幾分鐘完成，完成32小時行78公里既紀錄。
