辦咗五年既攝影馬拉松，今年終於第一次試。8點鐘就要去到會展登記，跟住坐定定等大會既開幕儀式。講解咗活動等資料後，9點鐘，第一條題目就出現
﹣光、影、動。全部著紅色衫既參加者就出發。見到呢個題目，我就選擇咗搭船去尖沙咀文化中心。今日參加者有1500人，所以除咗我，仲有好多人都選擇搭船
過海。
去到文化中心，咁啱有個Kinder 出奇蛋活動，好多小朋友參加跑步比賽。紅色衫既 Photo Marathon 選手，當然影住小朋友跑步啦！而我就係度影住人哋行。
之後我就唸11點至12點先返去會展交相，不如行去紅隧口。行到去紅隧口，居然都有紅色衫既人係度影緊相。果然呢個活動令所有參加者四散。再加上佢今年仲玩打卡，計吓三張相，去咗幾多公里，最遠嗰個有奬，我相信揸車嗰D好著數。
影完紅隧，我就經理工，去到科學館。咁啱見到兩架舊巴士，有大機我又影吓佢啦！影完我又行返去碼頭搭船。行咗一個大圈影一張相，真係攰死！不過我又衰，最唔捨得用錢搭車，哈哈哈哈！
11點幾返到會展，上載咗第一張相，跟住第二張主題係點、線、面。攰啦！所以唔行咁遠，不過要食嘢先，好肚餓。最後行咗去灣仔仲要行到去譚臣道，食咗嗰間華南粉麵茶餐廳。又話好正既牛腩、崩沙腩。點知麻麻！再加埋杯嘢，65蚊，好貴啊！
食完有力氣終於唸到影咩，就係影怡和大廈。所以搭咗叮叮過去。果然又有紅色衫既人啦！影完我又好cheap 咁行返會展。
1點半左右返到會展，第三個主題係山、海、天。呢個咪我平時行山既景。我即刻唸起大潭水塘。雖然好攰，就咁影有人踩水上單車嗰邊都應該ok。所以由會展行去灣仔街市，搭6號車去先。咁都撞到有其他紅色衫人仕。
搭車去到油站，沿黄泥涌峽道上去，好曬啊！咩防曬都無啊！去到嗰水塘，見到幾多人踩水上單車，不過影出嚟既相好似麻麻，覺得上次行到去大潭篤水塘好似靚
D。所以行咗衛徑落咗去水塘。估唔到要行成半個鐘，之後當然唔會好似平時咁上山啦！但見到大風坳同大潭路，覺得大潭路應該好D。唔駛上山，所以向大潭路出
發。但勢估唔到行行吓係分叉路，無人行去大潭既。但無辦法，行回頭路上斜真係無力氣。一路行去大潭路，的確係好平坦既山路，不過無人行，一個人行山真係好
驚！從未試過一個人行山，原來真係好可怕。分叉路牌寫行半個鐘，我完全唔敢停底，望實自已一個行咗幾耐，行咗幾分鐘先見到一個迎面以來既鬼佬，但之後一D
人聲都無。行咗十幾分鐘，終於見到一對外藉夫婦影蟻路，個心終於定一定。行多一陣，總共行咗廿一分鐘，出到大潭路。好彩！
去返大潭路既大壩，見到有小巴去柴灣，即上。之後，由柴灣搭返地鐵去灣仔啦！交埋第三張相，再攞埋大會既紀念品，可以攞飯食，不過食咗幾啖，唔好食，又有
D飽，無再食啦！五點左右啦，我就走啦！我係陪玩人仕，無必要等到7點半，同埋真係攰到爆！我繼續選用平既交通工具，搭船去返尖咀。
今日整個活動辛苦過行山，由朝都晏，行咗四萬幾步，攰死我啊！
