周杰倫魔天倫世界巡迴演唱會 - 香港站

等咗好耐，好辛苦咁撲到周杰倫既飛。終於13號，可以睇第一場啦！未試過睇演唱會遲到，估唔到轉咗工就奶嘢！仲要我飛的、奔跑，最後入到場已經熄燈，都未坐定，周杰倫就出嚟！

我哋嗰位雖然寫係第二行，但實質係第四行。同嗰台好近，不過係最側。所以一出場，周杰倫係飛船出嚟，完全睇唔到。到行咗出嚟先見到。而當我好努力勁影既時候，居然 Security阻止我，攪到我無得繼續影落去添！但試問我又點會唔影呢！最多咪偷雞。

唔知係唔係而家睇演唱會係舞台無咁多嘢攪呢，當佢不停換佈景，又有煙火、又有紙碎，too much。不過呢個好似係佢特色，但我已經唔記得咗啦！

中間有幕以天台為主題，其實套戲已經唔吸引，仲要7、80年代既look，係最難頂。呢part完全投入唔到，而袁詠琳又好似唱得好差咁。之後有part 唱鄧麗君既歌，仲要同佢對唱，其實都有D恐怖。有一 part 就彈琴，仲唱埋明明就，正啊！而自彈自唱嗰part亦唔錯。

到尾聲，局然唱首廣東歌，仲要係大熱既歲月如歌，佢仲話要帶返眼鏡先似。唱咗一半，嘉賓就出場，係 cool魔張智霖。之後周杰倫再彈安靜，同張智霖合唱。呢個嘉賓真係估唔到。

去到散場前，嚟幾首輕快歌曲，最後唱埋陽光宅男，11點10分前就完結。

今次演唱會都算幾好睇，但唔知係唔係太側，我覺得自己唔係投入得好好添！

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/