衛徑第三、四段 ﹣ 油塘至沙田坳

過咗農暦七月，我先夠膽行油塘呢段！因為一嚟就係將軍澳華人永遠墳場。

由油塘地鐵站出發，經過大本營。之後向鯉魚門商場行，之後向鯉魚門方向行，去到街口就會見到將軍澳華人永遠墳場嗰牌。沿斜路上山，果然係考起孝子賢孫。行 咗兩公里左右，就見到衛奕信徑指示後，就無再向墳場行。繼而斜路上山。不過斜路都唔算辛苦，而望見維港景色，亦都好唔錯。估唔到維港兩邊既山頂 ﹣小馬山同魔鬼山都可以望見咁靚既景。

但上到咁上下，望見炮台山指示，又見到一班晨運客，跟住又唔係上山，係落山。落到去澳景路，跟住接住對面馬路既衛徑。一開始都係好多晨運客，仲要係公公婆 婆，上山快過我哋。行咗無耐，見到真正既第二段補給站。估唔到由地鐵站嚟到呢度都行咗成個鐘。之後繼續上山，望見條路都幾甘，但係晨運者真係勁，好快又上 到去頂。行到五桂山，見到標柱，之後向前面兩塊金屬板方向行。呢兩塊板係唔知仲咩。過咗之後，開始平路繼續行。無端端去到叉口位，居然向森林方向行，唔係 睇住比賽份資料，相信一定 miss 咗。

行入呢個森林，開始見到D公仔，十足十好似去咗虎豹別墅咁。你問我，我唔會覺得公仔可愛，我都覺得幾驚。所以相都無影。一路行落山，去到有人煙居住既地方，完全唔知係邊度嚟，寫住叫馬游塘村，不過我哋落嚟既地方都仲係叫觀塘晨運徑。

一路行，如果唔係睇住大會既地圖一定唔識行。而指示衛奕信徑既黄色標誌，亦大部份退色。唔知點樣行咗去澳頭村，估唔到呢頭咁多不知名既地方，亦有咁多村屋。過埋澳頭村好快就行到出大路，去到井欄樹，第三段不知不覺就行完咗啦！

行 完第三段用咗2小時40分，所以決定行埋第四段。入到井欄村，搵返衛奕信徑真係唔容易。行行吓、又問吓人，終於搵到上山條路。原來都未開始上山，行咗一陣 見到上次由百花林落嚟見到既舊屋。跟住我哋繼續落山，去到濠涌。又係入咗村，係不知不覺間轉咗條小路。之後就真真正正上山啦！呢個東洋山要上到580米 高，係正午時間，無嘢遮，真係幾甘！我一邊攞傘，一邊握住行山棍，但都唔理咁多，最緊要唔好暴曬，跟住嘔。

足足上咗一個鐘頭山先到山頂，呢段路真係勁，唔怪得知三粒星。係唯一既樹䕃抖咗一陣，繼續行，跟住應該接住飛鵝山路，行多半個鐘，就到咗飛鵝山頂，估唔到咁快就嚟！

影吓相，係亭抖咗一陣，跟住落山到獅子亭。烈日當空，真係好辛苦，好在落雨太多，好多流水，用D冰凍流水沖沖頭，的確可以降吓溫。由山頂落到獅子亭大約半小時。今日用咗6個半鐘行咗16公里。

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/