衛徑六、七段 ﹣ 九龍水塘至元墩下

今日終於唔係夜晚行，改為晨早起身行。7點約咗係深水埗地鐵站等，之後坐的士去大埔道九龍水塘。係入口等埋 Peggy，就開始起程。

衛奕信徑D路真係好難認，print 住大會既指示，唔睇清楚都有可能miss咗條路。條路入口真係超細，同埋一嚟就上山咁，不過都唔算太勁，因為唔係一條45度行山梯級，間中轉吓彎，真係無 咁覺。反而好多馬騮屎係條樓梯度，好臭吓！上吓樓梯、行吓平路，又行吓D樹蔭，都算舒服。行行吓應該由九龍水塘接咗去金山家樂徑。不過都係出到嚟見到嗰牌 先知。

之後經過走私坳，只係與麥理浩徑少少重叠。之後又上山，今次仲要有兩隻馬騮欄路，超驚。上咗一輪梯級，跟住到頂，之後都算輕輕鬆鬆落山，行咗1個鐘頭9個字，去到城門水塘。

唔係行麥徑真係開心好多，唔駛上針山、草山。我哋沿水塘行，真係可以算係輕輕鬆鬆。行咗5公里既水塘路，去咗另一邊既城門水塘，呢邊環境都幾靚。如果城門唔係咁多馬騮，其實行城門簡簡單單都有好多靚景。

開 始離開城門水塘，跟住都係行好闊既車路，不過就係斜既車路行去鉛鑛坳。行斜路都係一個鐘，不過對比草山，都叫簡單架嗱。去到鉛鑛坳，都只係停咗10分鐘又 再起行。不過嚟緊呢條路就只係落山姐。但呢條落山路一D都唔易，沿途係碎石路，加上噚日落完雨，不停有水流落嚟，D石滑到不得了，我都跌到一獲，好在 pat pat 落地，多肉地，頂頂姐！係咁落落落， 落咗8個字樓梯，終於見到第七段既檢查站。4小時41分行完15.3公里，只係快咗20分鐘，咁即係我哋得20分鐘抖，之後繼續行。到時比賽已經行咗咁 多，都唔知頂唔頂到。

我哋落斜行咗少少之後，見到有小巴就上啦！上到車，先發現到下一站要行既地方，睇嚟去完檢查站，要行多10至15分鐘先上九龍坑山。

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/