澳門飲食之旅 - 富仕葡國美食、禮記、祥記麵家、漢記咖啡、安德魯葡撻、亞馬交美食

我哋10:45船由上環到氹仔，無端端仲俾人upgrade 坐咗頭等。真係正好多！第一站我哋過返澳門半島食嘢先，見到的士站好多人等緊，即刻行去澳門半島既酒店車，最後坐咗架 MGM 既車，跟住轉的士。我哋上嗰架的士好好，佢聽到我講既地址唔識就即刻call 台。所以我哋俾第二架車早到。司機仲叫我哋一路行入去，所以好快就搵到啦！不過有人一開始講錯，明明係荷蘭園、雀仔園一帶，但佢話近媽閣，都唔知係邊！

到咗第一站 -富仕葡國美食，我哋點咗佢係牆上話出名既菜式，包括忌廉馬介休焗薯蓉、燒雞釀飯、芥末羊架、黑椒牛仔肉、芝士焗西蘭花同葡式炒蜆。雖然八個人，但都只係叫咗六個餸，因為仲要去第二到食。我比較 like 嗰芥末羊架，因為真係好特別，而焗薯蓉就外表好靚，加上有馬介休，味度啱啱好。

忌廉馬介休焗薯蓉

燒雞釀飯

食完第一餐，因為係荷蘭園附近，所以我哋食咗禮記雪糕，仲要死屈朱生請真係開心，點都要食個雪糕磚先。

食埋甜品真係飽，所以行吓。我哋沿瘋堂斜巷走，再出返去大三巴。大三巴真係最多人既澳門景點，我哋當然點都要影返張合照。(可能可以同六年前嗰張比對 吓！) 之後沿大三巴出去大馬路，再去福隆新街。不過再食嘢之前要買手信先。我阿媽依家指名要食最香，所以要去咗夜呣街買咗最香餅家杏仁餅先。之後再買咗檸檬大 王，辦咗阿媽既手信，就嚟再食啦！

第三站 -祥記麵家，我呢幾次嚟都無再食，今次食又覺得好好味。可能蝦子麵實在太多蝦子，加上炸雲吞又好想食，正！真係食到好飽啦！我哋就搭車過氹仔！唸住搭的士，點知等得嚟上巴士仲好。慢慢消化吓都唔錯，只係架車迫啲姐！

一路搭巴士，經過一啲好陌生既角道 - 石排灣。以前應該係嗰山，係小型賽車場隔離。最多都係有個郊野公園，有個燒烤場。但依家係成排屋，真係變得好快。

搭巴士去到路環，當然又係食啦！我跟咗冒險王既介紹，去咗漢記咖啡， 要試吓佢杯手打咖啡。但估唔到佢咁遠。係圖書館既另一方向行，去到碼頭最尾見到海關。海關既右邊有條路，一路行過晒左邊既船廠，去到尾既綠屋就係。如果唔 係我死唔心息，相信大家見到一群野狗就離開啦！唔知係唔係太多人慕名以來，坐滿晒之餘，叫杯咖啡要40分鐘先到。攪到係度餵蚊。飲完快快走啦！

出返去迴旋處，當然要食返個安德魯葡撻。仲要心急到跳上的士食添！坐的士去返氹仔 Galaxy。唯一一站唔食嘢既地方，賭錢。要睇Thomas 玩花旗骰，學吓點玩麻！點知得一張枱，但又超多人。Thomas 同 Cherry都係玩咗一舖。贏咗40蚊就算。而朱生玩 Black Jack，今日既洗費代代平好，好叻啊！

玩咗一陣，停留大半個鐘，我哋去返氹仔官也街既亞馬交美食。呢間好耐之前已經有人推薦我，不
過 次次都 book 唔到位。今次終於可以一嘗。我哋叫咗葡國雞、牛尾、豬手、辣汁蝦、馬介休炒菜等。雖然個個話飽，但一嚟葡國雞仲要嚟白飯添！食量超級驚人！不過真係幾好味 吓！食完飯，差唔多八點三左右要走啦！ 不過再嚟買埋鉅記，再加多個甜品 - 木糠蛋糕。嚟咗十個鐘，食咗七餐，真係痴線！明正言順，食食食之旅！

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/