今日又一早享用酒店既豐富早餐。大約十點鐘我哋就出發去玩啦！第一站去咗清水寺，泊好車，由側門去咗清水寺，呢到好多人，仲有唔少係香港人添。一路行上去，最後買埋飛，再洗淨完雙手，入寺啦！
入到寺好似發現更多人，因為好多人影相，又有人係度參拜，攪到大家都好似唔知做邊樣先。越攪得耐，我哋最後所有嘢都做晒！一嚟就影相啦！影完就去買符，當手信都唔錯。之後又去咗求簽，我又唔知買咗塊木條寫心願。而 +Carol Lam 仲買咗塊繪馬寫添！
攪完一輪，終於離開行去隔離嗰地主神社。呢到都唔少人，因為呢度主力求姻緣。 +Carol Lam 仲要全程當攝影師影住我，誇爆！不過亦係咁係度無端端跌咗唔少錢。由買符到繪馬，再到拜神，神社既錢真係易賺。
離開地主神社，我哋繼續行，遠少少距離影返整座清水寺，之後到一個小塔，最後行返去「音羽の滝」，好多人排隊飲佢既長壽、健康、智慧既泉水，所以無排就離
開啦！出返清水寺，條街都超多人，而且係舊屋仔都幾有特色，不過人很多。而且店舖主力賣手信品。最後係d橫街窄巷行咗一小時左右就離開啦！其實係度午饍都
唔錯，選擇好多，不過泊車貴，每二十分鐘計算，每十分鐘係100円，咁食個飲要俾多$60 泊車費真係唔掂，都係第二度搵食好啲。
![]()
離開清水寺，我哋就去金閣寺啦！不過望到附近有咩嘢食就停底啦！最後我哋食咗一間韓式燒肉店，仲有午餐選擇，所以千四円食到兩塊簿牛肉燒烤都算係咁！
![]()
食飽飽下一站 -金閣寺。金閣寺對比之下無咩特別，一座金色既寺廟，唔係好大，亦唔入得去，只可以說係一張美麗的 Post Card ，無論你識唔識影相，你都可以影一張 Post Card，就係咁多。最特別相信係入場票，因為十足十一張符。睇完金閣寺，我哋就離開京都，去大阪。
今個旅程美中不足係坐唔到嵯峨野小火車，希望下次睇紅葉既時候，可以再嚟京都一次。
由京都揸車落大阪大約個半小時。6點鐘左右到酒店，分別攞房同環車，之後係心齋橋行咗一個鐘。係 Daimaru 13樓既小鯛雀鮨 すし萬，食晚飯。食完再周圍行吓道頓堀，之後就回酒店。
不得不講酒店好近心齋橋、同道頓堀叫Hotel Vista Grande Osaka，但附近太多無料所，可能酒店有啲房都係咁用途，佢沖涼既玻璃真係對正間房，雖然有百葉窗，不過都覺得好唔安全咁！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
