日本人真係守時d,8點2去到亞洲博覽館已經不停話仲有五分鐘開場,攪到要跑去入口處。最慘仲要檢查手袋睇吓有冇相機,真係趕死。入到去燈其實未熄,但大 家已經熱情好高漲,不停叫喚 Namie,真係嚇一嚇。我嗰位好唔錯,係第六行,附近仲有好多日本人添!未到8點半演唱會開場啦。
一 嚟 Body Feels Exit,雖然我無睇過佢巡迴演唱會 rundown ,不過我估差唔多。而且係慶祝出道20週年,所以好多出道時既歌都有唱,例如:Try Me ~私お信じて~、Don't Wanna Cry、Chase the Chance 、Sweet 19 Blues、A Walk in the Park 等等。當然亦有新d 既歌,仲要配合MV,唱 Fight Together,就有海賊王加安室動畫一齊慶祝20週年。唱 Love Story 就有香里奈加田中圭 MV,而安室就企係樹下唱,超浪漫。唱最新既 Big Boy Cry之前就播咗佢自己 Kose 既廣告。
全個演唱會唱咗兩個半鐘,完全無停底講過任何嘢!最多都只係encore時舉吓牌話多謝香港 fans。再加上佢好多歌都係快歌,唱功同氣量都真係唔錯,Dancer 又多,舞台同煙花效果都好好。有幾吓煙火,嚇到我隔離條友好驚添!而我最記得第一個舞台係樓梯,安室著住高踭長Boot 上上落落都幾勁。
演唱會既尾聲,就係 Encore 完唱 Can You Celebrate? 之後再唱埋 Only You and Say the word,整個演唱會就完結啦!
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/