好耐無踩過單車，今日四條友嚟嗰甘既！我哋十一點半係大埔茶記食早餐，跟住就租車開始起行。今日有阿Roy 既參與，佢對d 路完全熟到呢，我跟係後面都唔知佢幾時左轉幾時右轉。
不過踩去上水其實佢都帶過我哋一次，我知道由大埔出咗車站轉咗去太和路，就一路沿著條河踩，最記得過晒梅樹坑公園跟住會經過一條隧道，左轉去林村。而右轉
就可以去上水。而亦係呢條路後，就無咩單車路，要踩吓車路，不過都唔係好多車行姐！唔知係唔係 Roy
太熟路，加上條路好踩咗好多，今日踩得超快。好快就過咗粉嶺公路，過咗民居，同埋屋村範圍不准踩車既地方，接住單車路，一口氣已經去到河上鄉，望住深圳既
大廈。
因為用咗一個鐘左右已經嚟到，所以我哋見有第二間豆花就唸住試吓！點知一踩入村頭，已經發現係年初一行過既古洞。今日真係勁多旅行團。多人到條路好似被
封。我哋去返嗰日行過既祠堂，之後就去返上次任食豆花既 - 鴻淘士多。但係踩得太快，早餐都未落格，所以任食其實都只係食咗一碗豆花同一杯豆漿。
食完豆花，我哋就踩咗對岸，出返去上水。回程我哋踩咗入上水市區，同埋踩去聯和墟。見到聯和墟街市就會唸起每當變幻時。
我哋跟住推住架車搵好出名既四眼仔腸粉。果然好多人啊！企係街食完嗰腸粉、燒賣，就要極速回大埔會合 Helen & Alan。
好快咁又係左穿右插就回返老圍，跟住回太和到去返大埔火車站！佢哋係車站等咗我哋一陣，之後就一齊去返大埔海濱公園同吐露港既交叉位。去到呢度終於覺得好多人踩單車，真係好恐怖。
由吐露港一口氣回到大圍還車，好準時啊，六點前回到大圍還車！跟住就去隔離既楓林小館食飯！第一次嚟呢度，原來係米芝蓮餐廳，仲有估唔到有炸鮮奶咁好味既嘢添！當然唔少得乳鴿啦！
8點前食完飯，帶著疲累既身軀回家。
