行山樂 - 黃龍、大東山、伯公坳

好耐都無行過山，今日心血來潮就想行吓！今日天色俾噚日星期六差，沒有藍天白雲，但亦沒噚日咁熱！

我今次跟隨行山王本書由東涌行去伯公坳。不過用電話影有d唔清，加上由東涌站行去消防局，再上天橋，無注意之下，以為好似踩單車咁直行，點知就係去到逸東村，唯有再行天橋，跟住東涌砲台走啦！

去到東涌砲台，我都係第一次嚟呢個圍牆，以為入咗嚟就係起點，影完一輪相問人，原來唔係呢度，要向返轉頭行，最後去到士多，再問人，終於見到赤立角村同低埔新邨嗰牌。終於攪咗成個鐘，11點3可以起行。

過咗村口，就會見到黃龍坑郊遊徑嗰牌。一路行見到好多人跑步落山，心口當然有號碼牌，唔知係咩跑山比賽呢？繼續行十分鐘左右，就見到黃龍坑郊遊場地。行多幾步就見到上大東山既牌啦！

一嚟就行樓梯，咁耐無行，果然係力氣既表現。今日唔算熱、又唔曬，頂得順。所以都算可以，反而 +Asintar Chan 要多加練習。

相信有過千級樓梯 (因為中段見過五百同六百幾既數字。) 行咗40分鐘終於可以回一回氣。因為前面嗰d樓梯真係又高又密，之後雖然都係繼續上山，但係行吓平路，行吓碎石、又行吓斜路，感覺好好多。

終於上咗個半鐘，完成黃龍郊遊徑，正式向大東山出發。不過今日係超級大霧，嚟到呢度都己經好迷霧。行多幾分鐘，見到第一間廢屋，但係望去草地只係得幾米既視線。完全感受唔到陳奕迅唱片封套既美景。一路繼續上，都見到幾間廢屋，不過真係大霧到連有人都係差唔多撞啦先見到姐！

過晒d廢屋，行多少少爛路，上到山頂，就開始落山啦！不過落山都唔係容易，但就無上嚟既樓梯咁高！一路落山既路，望到條馬路，而左邊望住嗰海，右邊就望住機場。而前面望住既山就係上次上鳯凰山既路！大約落咗九個字既時間，終於到咗馬路啦！

用咗3小時38分，完成咗7.81公里既路程！