0

澳門之行 (第二日) - 亞婆井前地、崗頂前地、Sky 21....

vi老篤日記 於 2012-11-28 15:37:58 發表  |  累積瀏覽 397

分類:長線旅遊 特色景點 ;地區:澳門
 第二日其實好想瞓晏d,不過有d人實在太早起,最後10點前要起身。今日天氣又差,想落雨咁,仲要凍咗!

一早去咗食大利來既豬扒飽先,因為快,唔駛唸、唔駛搵!但而家無位坐既大利來,要我企係街食嗰件有骨既豬扒飽,真係煩到爆!

食完就行咗去喜蓮咖啡食 紅豆冰,陳慧敏叫嗰個就係紅豆奶茶,感覺好怪添!食完覺得氹仔都無咩咩睇,所以就搭車去返澳門!原先唸住搭的士,不過離開酒店區,係住宅區附近真係唔見到 有的士,所以最後都係等到巴士上車。好在都有巴士直去媽閣,我哋就搭到去媽閣廟。由媽閣廟,我哋行去港務局大樓,之後再行去亞婆井前地!呢d咁特別既地 方,對於我嚟講當然唔係第一次去啦!(而家唸,我其實都幾熟。)

佢哋三個咁陌生,所以順便緊係去埋鄭家大屋。但對於我嚟講鄭家大屋真係最唔特別,因為係廣州荔灣間屋好似仲靚d,都唔講其他大屋啦!跟住我哋沿指示上埋主教山。但今次嗰教堂外牆裝修,所以教堂無咩好影。唯有又係影住旅遊塔,今次旅程佢出鏡率好高。


離開咗主教山,其實我無咩 idea 行邊,所以沿住d指示牌行吓其他古跡地方。第一個指示係聖老楞佐教堂,連名都唔識讀添!教堂又係黃色既外牆,其實真係無咩特別。繼續向前就係崗頂前地。 噢!點解我未嚟過既!所以今次覺得最特別就係嚟咗呢度!第一個見到既建築物就係崗頂劇院,行入去唔算好大既地方,但感覺真係古跡。再行前d 見到教堂啦,仲有聖若瑟修院。而聽過好多次既何東圖書館原來亦係呢度。圖書館可以入去,前面古舊既建築物,入面連接了另一座新型圖書館,呢款保育手法都唔 錯!我哋係入面影得鬼咁開心同埋係度瓜瓜叫,忘記了係圖書館添!

離開圖書館,一路落斜,原來就出返去民政總署大樓。於是我哋行去福隆新街醫肚先。我哋一嚟去食魚翅撈飯啦!當然出名嗰間豌仔翅就排晒隊,所以我咗譚家就算!味道普通,不過用砂鍋盛載都唔錯,食極都好熱,幾十蚊係咁既貨仔!之後就去咗保健牛奶食甜品。

食完嘢又行去另一景點,都係食嘢既地方,係英皇娛樂酒店對面既Sky 21。平時嚟呢度應該嗰景好perfect!因為遠望見到主教山、東望洋燈塔。眼前所見就係旅遊塔 。(都話佢見報率期高。) 今日雲層超厚、又天陰陰咁,想影張靚相都難,唔落雨出到出面已經算好好!我哋係度都 hea 咗個幾鐘,跟住就去食晚飯啦!

搭的士去返噚日食唔到既媽閣長城燒烤,真係忘記了邊個同我講ok,不過又平又唔難搵又新嘗試,去吓無坊!我呢d食肉獸緊係要牛、羊咁啦!仲有叫到咖哩雞、青口、魷魚!味道都算唔錯,最重要價錢都唔係貴!

食完飯最後一個景點就係大三巴同買手信啦!去到大三巴,點解而家d燈咁弱既,唔知係唔係因為入面做緊粵劇,or 射燈真係換咗!而隔離多咗條路去哪吒廟,仲有介紹哪吒添!

之後我哋就買埋手信,搭巴士,送佢哋三個去碼頭啦!
鐘意SeeWide的分享,給我們一個Like吧!
  • 攻略日期:N/A
    攻略地點:澳門
  • 攻略時間:N/A
    是次消費:N/A
0人比"掂"

最多能輸入300字

累積瀏覽 209394

全部攻略 323

全部回應 5