接住第二日又睇演唱會，今次仲去到澳門添！唔係第一次去澳門睇，但就係第一次俾錢睇。所以都唔知原來最早只可以揀
1點鐘既船。所以落咗船再去換飛，再行返出去氹仔市區，都攪到成三點幾！但最估唔到，我約咗阿珍出嚟！佢帶咗我哋去食嘢，細佬話要食葡國，點知係意大利，
好衰地走咗之後，再去咗間真係葡國菜啦！三個人食咗五個餸，都幾飽！不過都算幾好味，但葡國菜真係好油啊！
![]()
食
完就去咗佢返工既地方Galaxy！除咗行去幾個酒店大堂，同埋見到香港都有既商店，再加Pacific Coffee
飲咖啡。我哋仲上埋去海灘添！感覺勁似以前水上樂園，仲要超多人添！參觀完第一次去既Galaxy，就過返隔離既威尼斯人。之後珍就自己行，我哋又去食，
食咗安德魯葡撻。之後行咗一圈，出咗去影吓新濠天地，金沙城。我哋最後都過埋去金沙城睇吓！點知咁新既酒店，入面咁娘，財神及噴水池，七十年代咩。之後就
沿威尼斯人外圍入返表演場地！
係澳門睇演唱會，入場前仲要檢查隨身物品。居然相機仍然唔俾攞，要我寄存，真係煩。所以我將d手信放晒係面，再次檢查，順利進入。我哋坐既位真係最遠最側
嗰行，睇電視都辛苦。但一到8點1左右，熄燈開場，d人就湧去前面坐，我哋都唔執輸，坐到第二行，當然唔係平地既第二行啦！不過相信都係個千蚊既飛。好在
我哋都決定得早，之後d 保安就攔截咗！但嗰場其實真係幾少人，六成人左右！
好啦！8點3響音樂，響咗十分鐘，4Minute
先出場，當然我唔係好識佢既歌啦！今次睇都好明顯係細佬叫姐！佢唱咗四、五首歌就玩遊戲送簽名碟。第一個中係坐係我前面，不過佢攪咗幾耐先出到去攞禮品！
之後抽咗好耐都無人出去攞，悶爆！4Minute都無癮，所以就咁送俾台下算啦！送完再唱幾首歌，前後佢出場大約1小時。
接住居然係有 Trouble Maker，雖然係一首，都幾好！起碼呢隻火辣舞睇得高興d嗎！跟住再嚟十分鐘音樂到B2ST 啦！佢d歌好d，最少都識
Shock, Fiction, Bad Girl 啦！但大致上同 4Minute
一樣，唱幾首之後抽獎，不過今次d歌迷有上台，仲可以抱抱添！再唱多幾首歌，咁就完！最後Encore
一齊出嚟唱多首歌，咁就無，兩小時攪掂！仲要衫到無換過。如果最貴飛係 $1680，咁都幾貴。
我哋換唔到11點半飛，要12點鐘船。仲有成個幾鐘，所以去咗food court 食d 嘢再走。去到碼頭，超多人，好在我哋都係早換飛既人，仲有好多要等到3點！佢哋都係睇完演唱會，慘爆！
因為呢個唔上唔落既時間，所以我決定玩到盡，我落咗船仲去咗新開既誠品，零晨兩點鐘，點解好似下晝五、六點咁！買書可能要排大半個鐘。所以我行晒三層，到止一遊就算啦！總算完結今日咁緊密既行程！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
