因為兩條友包團既關係，可以好彈性咁決定幾時起身同出發真係好！可惜係vivien 唔記得改時間，佢早咗兩個鐘頭起身，攪到我都瞓唔返，所以食完早餐，仲係酒店慢慢影花！
我哋十點出發，但之前一晚酒店已經通知我哋，今日罷工。係見到司機同導友時，佢哋仲粉飾緊架私家車，話要寫明 - Tourist only。果然出到去，每一個路口都有人叫停我哋，要望清你嗰樣先可以過。不過導友話，因為咁，我哋今日無塞車問題。
我哋第一個去既地方係Monkey Temple， 先頭我都幾驚，最憎去馬騮山，點知可能太熱，馬騮都要抖啊！行咗上去見到d 塔仔同棕色建築物，去到最高點就有一個四眼神廟。導友都好詳盡咁講俾我哋聽，不過我最無心機聽呢d 㗎嗱！
我哋應該都影咗幾耐相，之後就去第二個景點 - 舊皇宮。一群建築物都以啡色為主，除咗一個白色建築物。導友帶我哋入去活女神廟先，仲好detail 解釋活女、一年一度祭祀等！之後就再入去舊皇宮，不過一個廣場咁，都無再detail 望。亦都可能係咁，我miss 咗佢講既性廟！頂！我呢個三級人，重點想睇架麻！仲唸住影吓佢d 雕刻，點知到而家我連邊個廟係都唔知！火爆！不過都無計，咁熱、睇到兩間都係咁上下都無鬼心機！
行完兩個景點，已經到食飯時間，佢帶我哋去一間中國餐館。雖然d嘢食油d ，不過都ok！反而係咁熱，居然都無冷氣、仲要飲熱茶真係辛苦。唔知係唔係得我哋兩個關係，唔似平時間團，導友坐埋嚟同我哋一齊食，不過都ok，佢仲要係素食姐，三個人食完其實都剩番好多嘢！
之後我哋就去咗巴騰 (都係睇住行程寫返出嚟) ，呢到係世界遺產既地方。不過就咁望d建築物，同舊皇宮都無分別，可能係同一個年代既產物，所以一齊入世界遺產啦！
每一個建築群最靚都係嗰d 柱，每一條木既柱都雕刻咗唔同既圖案。當然去大陸其實仲靚仲多。不過唯一唔同可能係雕刻主題。尼泊爾可能宗教色彩強烈d，所以全部都係關於佛咁！中國既變化就可能多d 啦！
導友其實都幾攪笑，係建築物入面會好detail介紹，但一出嚟行去另一個建築物時，就會左穿右插咁行去，不過兩個人，佢點都要等我哋，所以我哋邊行邊
影！但係擺工真係好唔同，連帶所有舖頭，就算係賣手信，全部都唔開！我哋係好彩望到另一面尼泊爾，不過正常既影像我哋又見唔到姐！
唔知係暢通無阻既關係，or
行程本身係咁hea，今日既行程已經完結。我哋坐車返酒店！不過下晝街頭聚集既人比較多，去到一個我估係大街既交滙署，多人到車都行唔到。好在有警車，佢
為我哋開路，雖然可能只係五十至一百步既距離，不過無佢應該死緊！最後兩點鐘左右返到酒店，hea爆！
夜晚係返咁靚既 Hyatt 食自助餐，呢個團呢一刻覺得爽爆！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
