宜蘭單車之旅 - 第二日
![]()
雖然之前一晚食宵夜，又洗衫攪到成兩點鐘，不過今朝8點鐘又要起身啦！係民宿大廳食早餐，估唔到係咁豐富，仲要有唔係我既朋友 - 生果！食完早餐，我哋都hea咗一輪！大約10:45先出發！
原來民宿對面已經係單車路，沿著單車路會出返冬山河既單車路！不過好可惜最尾嗰少少居然係泥濘路，車轆、鞋，無一幸免！唸起都憎！所以一上返單車路又整理吓鞋同單車先！但係更唔掂既係阿per，佢居然好唔舒服嘔，所以停咗一陣再起行！
![]()
出返冬山河既利澤簡橋，今次係對岸既地方，望見一班學帆船既小朋友，見到佢哋控制架船都幾驚險，有時好似攪到架船就反咁！ 我哋係度停咗半個鐘，阿per 好似好唔掂，佢坐係度休息，所以我哋咪影吓小朋友，影吓花，影吓石！
一路繼續踩冬山河道，最後一段居然係木長廊，踩木板，感覺怪怪咁！不過聽住d木聲又好爽！出咗冬山河，又見到大水閘！之後踩咗無耐，又上返噚日條蘭陽溪單車路，又再次係無車平坦既單車路，其實感覺真係好安全！
上返單車路後，per 越來越唔掂，最主要可能噚日淋完雨冷親，佢好似好易濕身病！我哋係單車路停吓踩吓咁！不過停底都會發覺都有幾多石櫈石枱，d 農民既生活其實幾寫意！
大約兩點鐘左右，轉咗去一條叫安農溪左岸既單車徑，無耐就出返市區，去到一個叫大洲既舊火車站，影吓相之後，就去咗附近便利店補給，停咗幾個字，之後就一口氣去民宿啦！民宿嗰邊叫員山區，過咗鬧市，去到宜蘭河，過埋橋踩咗無耐就到民宿！
未到四點返到民宿，民宿主人好熱情，又茶又咖啡，又介紹我哋一陣去邊。per 就留係民宿，我哋就再出去附近玩玩！
雖然我哋今日取消了原本三星鄉既行程，不過就去咗我都幾想去既KA VA
LAN！我最估唔到伯朗咖啡原來同噶瑪蘭係同一間公司。入到去展覽室，發覺雖然佢話釀酒過程，不過感覺好唔真實，似做俾你睇！睇完展示館，就去咗買場，當
然就係忍唔住買咗兩支啦！不過都係細size 姐！
之後我哋沿路返民宿啦！但天色已經黑啦！係中途我哋再停底食咗碗麵，先再踩返民宿！原先今日要踩50幾公里，但最後估到踩去酒廠都攪到全日踩咗45.93公里，算係咁lor！返到民宿，影完一輪相，per 都起身醒晒，我哋就出去夜市lu！
夜市係宜蘭車站附近，佢哋去咗車店蓋章後就行過去！夜市唔係好大，行咗無耐，又落大雨，所以求其揀咗嗰位坐，不過都係有我愛既排骨湯！上次同sue去台北
都無去夜市飲唔到，今次可以補返！由細到大，真的對呢個排骨湯十年不變，不過始終覺得係六合或者士林好似正少少！除咗湯，我哋仲食咗蚵仔煎、臭豆腐。食完
之後，又行去買嘢飲，佢哋食葱油餅，我就食沙茶粟米，最後我哋仲買咗串燒，我哋既食量真係驚人，踩幾多單車都消耗唔返！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
