自從毅行者後,差唔多兩個月無再行山。2012年又開始想行山啦!今日cherry都有參與,大家都好希望可以行吓hea山影吓相。不過一早預告今日天色麻麻,白茫茫咁仲好似想落雨咁既天。
我哋今日揀咗西貢古道,呢條兩粒星由順利到濠涌既路段。出咗彩虹地鐵站,一路沿清水灣道入,行上飛鵝山。一路都係車路,只係斜路狂上斜,都唔係十分難。而
飛鵝山頭既屋真係靚,Cherry 仲話佢哋嗰 summer intern
住係8號,駛唔駛咁靚啊!一路繼續再沿飛鵝山路行,去到見到馬鞍山郊野公園牌後繼續向前,行多少少就見到寫住百花林既牌啦!除咗係百花林,呢度仲係孫中山
母親嗰墳地。可能亦係咁,係落樓梯時兩邊都有好多墳地。
係過咗孫中山母親墳地後,有一個位可以望到西貢濠涌同埋白沙灣,不過今日真係天色麻麻,影出嚟都唔靚!一路繼續往下行,再見到一條馬路,而有個牌寫住往濠涌,呢度應該就係所謂既西貢古道。沿路都係一d好大舊既石路咁,如果落雨後行死緊!
行行吓見到一間舊屋,本來好想入去影相,點知有人問仲咩,所以就走咗lu!落多一陣就已經出返一條引水道既地方,我哋繼續沿條馬路行多一陣就已經出濠涌lu!估唔到今日咁hea既行山,兩個半鐘就完成!
出返西貢公路我哋就搭車入西貢碼頭食嘢。最後我哋揀咗有三十幾年歷史既扒房 - 西貢蘇珊娜餐廳。我哋霸晒二樓,嘢食都真係幾ok,又有午餐,$70
就ok la!食完我哋仲係度傾計,都係不離佢哋台灣單車之旅,聽完我真係好想同佢哋去一次,希望佢哋今年可以攪第二轉,而我又join 到啦!