唔知仲咩走去參加毅行者，而每一次練習都會問呢個問題，到咗今日11月18日，真正舉行既日子，我哋起行啦！
11點開始起行，由北潭涌開始。 真係好緊張啊！點樣可以行兩日呢？
之前一晚勁大雨，以為今日實陰天或者落雨啦！點知出太陽，太陽眼鏡同帽都無準備，所以只好勁搽放曬！11點起行既朋友都唔係超級毅行者，相信大部份係公司
隊，所以無見到係萬宜水庫度喪跑，亦可能有成100公里，點都要留力既！我哋用咗兩個鐘頭既時間去到萬宜水庫，跟住就過浪茄，再上西灣山。超驚中暑，好在
無事。去到第一站西灣係三點，比我哋原先預既時間早咗一個鐘，而去到第二站北潭坳更加係未到六點就到咗，比我哋預計時間好，咁樣既話有望唔駛40個鐘完
成。
係第二站係阿哥既朋友support我哋，佢哋預備晒KFC 飯俾哋，食完6點幾既時間，我哋就起行再上最艱辛既第三段 -
雞公山。係上山路，多數我俾wendy 快，所以哥同我行前，wendy同jonah
行後！不過預料唔到既事就嚟，我哋行緊上山，估唔到落雨，仲要好大，我即刻要著雨褸，阿哥就無著，點知雨係咁越落越大，碎石樓梯變咗小瀑布咁，又濕又滑。
好辛苦先上到山頂，阿哥都頂唔順要著雨樓啦！而我哋個個對防水行山鞋都入晒水。由雞公山落山更恐怖，半個鐘可以落去既路程，要一個鐘先落到，仲要係變咗勁
濕勁滑既樓梯，攪到我都跌咗一次，終於係10點半既時間，我哋完成咗第三段！第三段有公司support，佢哋提供咗食物同水俾我哋，最重要有一罐凍可樂
啊！不過胃口真係麻麻！而哥既朋友又繼續出現，仲帶埋哥嗰老婆出嚟！勁啊，十週年結婚記念wor，好sweet！我哋之後仲見到cat姐，佢原來都要等
人，佢仲俾咗d黑膠袋，紙巾嚟support咗我哋！
第四段係水浪窩到基維爾營。本身呢段都好甘，全鞋濕晒加埋d泥濘路真係百上加斤。Wendy
嗰朋友係咁惡劣既環境下仲同我哋繼續行，真係佩服。去到上山既位，又突然再落起雨嚟！點解永遠都係上山時落既呢？就算唔落都唔好受，d泥濘地令到我哋既鞋
滿晒泥，完全發揮唔到佢防滑既function，加上d泥漿地好黏，所以wendy嗰frd - peggy
對鞋既鞋底都甩咗！亦係咁，佢滑咗兩次落地，就算唔滑，大家對鞋、褲，全是泥濘！好辛苦咁去到中段，見到嗰亭，我哋就入去休息，不竟咁行法，唔止行慢咗，
腳都用多咗好多力！大約瞓咗半個鐘左右，我哋3點3再起行，預計六點先到達基維爾營。
好開心涯到去基維爾營。我哋登記完，好需要搵嗰位瞓吓！6點幾既時間，原本去到獅子亭會合陳慧敏同per，點知遲咗咁多。亦發現之前send既
message
send唔度出去，所以佢哋已經起行去緊獅子亭。基維爾營係收唔到電話，要靠有線電話同佢哋聯絡，勁唔好意思吓，叫佢哋遲三小時先好上亭，我離開基維爾營
再同佢聯絡。
係基維爾營總算搵到嗰地下瞓吓！而wendy既兩個朋友亦係我哋睡夢中離開。我哋應該休息咗個幾鐘。最攪笑我半夢半醒間好似聽到哥同wendy對
話，jonah隻腳又唔得，天氣又咁差，不如唔好再行，心裡面好高興咁！不過佢哋無叫醒我，我就繼續瞓！點知起身佢哋話無講過，估唔到我心裡面係咁想離
開！
大約8點鐘既時間，我哋再上路啦！用咗一個鐘既時間去到獅子亭！我哋係士多休息同埋食我哋既早餐。問心胃口又係欠俸，只係食咗少少！但最緊要回合到per
同陳慧敏。我既急救鞋襪啊！per幫我攞咗一套全新加鞋既行山衣服俾我。面對其他參賽者甚至隊友仲著住對濕鞋、濕襪，我真係覺得好幸福！最重要，阿媽仲要
幫我嚟一個絕配添！真係浮誇到震！
好10:40分啦！繼續往獅子山出發，一輪樓梯後，到咗11:30到達畢架山嗰亭啦！抖咗一陣再起行上畢架山頂，12點鐘到達！呢一part既時間好似好順wor！落咗個半鐘山，終於離開鷹巢山。而馬騮亦開始出沒！
過大埔道後，行去金山郊野公園，唔知點解今日d馬騮少咗，可能晏啦！兩點鐘起行，大約三點九到達城門水塘！一班同事已經等定我哋，預備咗食物、飲品！但嗰刻我最需要係眠一眠，所以無理到瞓一瞓最緊要！
大約攪到5點啦！我哋又出發啦！一上又係最辛苦既針山。不過呢刻我同wendy都好開心，因為support既fatsun同alan幫我哋攞晒d嘢，我
哋只係攞住咗兩枝棍上山，好爽啊！而且佢哋十足魔鬼教練，上山勁上樓梯都無得停，亦係咁用咗半個鐘就上到針山，簡直不敢相信！
好快咁落埋樓梯，6點已經過左針山去到停機坪既位，準備晒頭燈，我哋又再起行出發。跟住係行草山，相對針山佢只係斜路對於我嚟講斜路可以行得好快。 跟住再跟fatsun落山，極快速度，7點4就去到鉛鑛坳。
大家抖咗一陣，我飲咗嗰好咸既磨菇湯，惡夢就開始。一開始我跟fatsun行頭，唔知係唔係未warmup跟住又行好快呢，我跟住佢行超唔舒服，真真正正
條氣唔順。中間忍唔住我已經話可唔可以慢少少。過晒d亂石，我都未ok，唔知點解咁辛苦，去到有個位我係突然腳軟，要食嘢！fatsun &
gor
陪我，佢哋行先，食完嘢好d，但好明顯係血糖低。不過真係好頂唔順。去到亭到，雖然會合咗大家，但我又要瞓吓，休息吓啦！不過問心嗰亭好凍，大風到死，但
係好明顯我無理會！我都唔知休息咗幾耐，跟住起行，飲埋杯熱薑茶，點知即嘔，不過嘔咗係舒服d既，所以可以繼續行啦！行上大帽山既路，已經唔覺得斜，只係
不停咁望住地下行，唯一停既一刻就係嘔。好記得見到大帽山嗰波再嘔一次，落山過咗過閘行條馬路又嘔一次。真係黃膽水都嘔埋出嚟！所以我連水都飲唔到，好似
俾行神山嗰次嘔得嚴重！我都令到大家遲咗好多先去到第8個check
point，時間已經係11:25分。扮精神咁影咗幾張chok相，之後佢哋係度飲飲食食，我係大姐架車瞓覺。瞓咗一小時，大約12:45又再起行。起行
前又嘔多次，所以之後我連水都無飲，只係用嚟濕口算啦！真係唔知攪咩，又唔係頭痛wor，連仲咩都唔知，唯有講條氣真係唔順，一飲水只係落到喉嚨，行多兩
部嘔埋出嚟！
不過欠兩段點都行埋佢啦！唔食嘢同唔飲水唔代表行唔到。可能平日食得飯多，一日半日唔食嘢，其實仲會有好多力氣架！另一個原因攪到身體狀態咁差，可能唔夠
瞓，血糖太低啦！但係食住得力素都唔係咁得。好在第九段係大馬路，雖然係好悶既路，不過我就牽住wendy同jonah，完全係閉著眼行。我終於好明白點
解要靠隊友，可能亦係咁我好返好多，而行既速度亦唔係慢好多，應該3點4左右去到第9個check point 啦！哥同Derrick
行先，見到佢哋已經瞓得好熟lu！登記咗之後，我哋一齊再休息咗一個鐘！瞓埋呢一個鐘，我個人終於醒晒！
大約4:30繼續起行，一開始呢段係沿水塘行，一條平路，輕鬆到唔駛用棍行。不過wendy又電兔上身，行得好快。我好驚行得快又缺水又唔出汗，中暑唔知
咩事，所以都係行慢少少算啦！行咗成個鐘水塘，之後一條大斜馬路。6:15分既時間，我哋去到9A呢個check
point！太陽亦開始準備出嚟！行返少少山路，上吓落吓咁！行多半個鐘，又見返條馬路，雖然仲有5公里，但尾聲在望！
好明白點解最後呢part
有d人係可以跑落去，因為你知道就快到終點，條路又闊又易行，真係好想快d闖過終點！我都相信我係發咗癲，所以我一個人自己好快咁喪行，足足快咗佢哋兩個
字，真係估唔到，不過點都要四個人一齊衝線既，所以係終點前等埋大家，而fatsun
亦準備好相機，捕足晒我哋衝點既經過！好嘢！雖然用咗44小時51分，不過我哋4個終於做到，完成了毅行者之旅！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
