數數手指，已經踏日十一月，距離毅行者只有兩個星期時間。今日都到咗我哋最後一次練習。
今日我哋決定嚟一次最甘既練習。我哋為咗要刻服眼瞓，同埋要試吓用好攰既身軀行超過五十公里。所以我哋決定星期五放工，由夜晚行到星期六既夜晚。預計25小時完成第三至八段，大約五十五公里既路程！
我哋放咗工係鰂魚涌附近食咗晚飯，之後就入西貢。再搭的士去到北潭坳開始。夜晚十點鐘我哋開始，又係呢條狂上樓梯既山路，不過無太陽曬住，ok好多啦！所
以我哋亦俾平時行快咗！大約三個半小時我哋已經去到西沙路！Wendy
既朋友仲未出現，後來發現去錯咗位置，所以我哋大約休息咗成粒鐘之後再出發。停咗一陣，其實又要warm
up番原來都好煩，都行咗幾多斜路，先可以開始順返。第四段到基維爾營次次都係行得最辛苦，可能佢行既時間長，要行成六小時先完，再加上行完第三段超攰，
攪到呢段好似「懶吓懶吓」！由呢段開始上山既道路上，我就已經開始播歌，但係去到五點幾六點真係好眼瞓啦！所以無嗱嗱，阿哥、Mary同我，係度喪行，上
山唔停，係咁non-stop
行行行，行到連天都光啦！終於用咗五小時去到基維爾營。一到空地，我哋仲即刻瞓係地瞓！以我一個咁潔癖既人，原來攰起上嚟，真係可以咩都唔理！重要有兩隻
唐狗望實我哋三個，好似霸咗佢地盤咁！但係我仍然唔理，差唔多大字形咁瞓咗！喪快行真係有回報，我哋早過Wendy
佢哋成半個鐘到，佢哋嚟到都瞓咗半個鐘，所以我即係用咗一小時休息，正！
好！繼續行，目的獅子亭食餐蛋麵。呢段到咗Wendy
發威，佢一枝箭咁行，我就係未醒追唔到，就算連佢既朋友都係！所以只有阿哥同佢行前，我哋就係後面慢行。到咗飛鵝山，佢哋有等埋我哋先行，不過wendy
繼續上咗鍊，可能佢太肚餓。但係朝早既飛鵝山，我緊係要影吓啦！所以唔理佢，我哋三個係度影相！
係獅子亭，終於有洗手間，可以整理返小小自己嗰衰樣！跟住嚟一個熱辣辣既早餐。雖然我食唔晒，不過都好努力食咗餐肉同蛋。同埋再次閉目養神。
好補充完，Wendy 既朋友要離去啦！我哋4個繼續上路！又係獅子山既上斜路先！係咁上上上，到差唔多12點，我哋去到畢架山嗰波啦！都唔知幾時開始唔係挑戰座標柱，改為挑戰天文台波波！
開始落山啦！亦開始進入馬騮範圍啦！佢哋d叫聲超恐怖。過咗大埔道，就進入金山郊野公園，d馬騮多個人，係晒馬路咁，一齊行都驚！行咗成粒鐘，終於去到上樓梯前既亭，不過一坐底係嗰亭，睡魔就急call，所以我哋又瞓咗半粒鐘，之後唔停，半個鐘左右到城門水塘啦！
去到城門水塘，我哋大休，食吓嘢，洗吓面，仲買咗雪糕添！Jonah 隻腳好似好痛，所以佢係度走，我哋就繼續向大帽山出發！
一嚟又要針山啦！行極樓梯都未到中間條路度！阿哥就反而係咁行唔理，我同wendy
就慢慢抖，因為都幾熱架！中間仲同人傾吓計添！到中間會口返阿哥，就上針山尖啦！阿哥又係non-stop，不過我都無停，係咁行樓梯上去，所以又俾我抖
多一陣啦！五點鐘上到頂，我哋停咗一陣就落山，跟住行埋草山，由草山落返鉛礦坳天就黑，又要用頭燈啦！大約7點去到鉛礦坳，又瞓咗一陣，跟住起行上大帽
山，咁攰之下，亂石都覺得上咗好耐，再跟住嗰條長命斜，終於九點到咗大帽山啦！沿車路落山，足足行咗一個鐘，最慘係唔開燈，行到好眼瞓！十點鐘出返荃錦公
路，終於完成了二十四小時行山之旅！行完後好有信心完成毅行者，不過睡魔既急call真係好驚，都唔知點刻服好！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
