我哋今日又係由西貢出發，行走麥理浩徑第三段。撘的士去到北潭坳出發。一開始已經係上樓梯既路，係咁上上上，基本上又係每幾步要停一停，我亦估唔到wendy 係上樓梯既位的確比較吃力。不過係練習慢慢行都無所謂啦！
相信上頭嗰兩、三公里都應該係不停上上上，我唸行咗個半鐘左右，終於係比較平既路，不過亦開始入黑，可能亦係咁，當我哋發現前面有分叉路既時候，選擇咗向
左邊走。先頭都唔知，不過行行吓發現條路好斜，條路又唔見咗咁，又鬼咁多草地。頂唔住真係要開返電筒同搵地圖幫手。好在落完嗰斜坡，就搵返條樓梯路。(不
過後來睇，我哋應該miss咗兩枝座標，而該處亦係一個營地。)
雖然係落樓梯，仲誤以為好快會到，點知唔係落咗好耐，開始係d爛既碎石地。又上吓，又落吓！但相信又好多人練習，所以成日都有人過我哋頭。
係黑夜中行其實望唔到周圍既景，不過有咁多燈光都知一邊係馬鞍山，跟住一邊係上嚟既西貢。反而可能嗰日天色唔係好好，見唔到星星，但飛機聲就聽到。
繼續行行行，終於去到雞公山。之後差唔多係落山路。落咗一個鐘，我哋終於完結咗今日既行程。不過我哋用既時間俾預期多。
後記，今日行夜山，發覺最辛苦唔係行，係入黑後開咗頭燈，好多小昆蟲撲埋面。衰到入我鼻孔添！勁難受。所以我決定要買多用途頭巾，因為我真係接受唔到咁多小昆蟲，我只要留返隻眼睇就得架啦！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
