Happy pre-birthday dinner with family @ 香宮

趁未有野食, 三母女先來一張合照~~


由媽咪拍板點了水仙, 茶香清新, 沁人心脾, 可惜我不能多飲~~



前菜三小碟, 分別有金勾黃椒菜甫, 滷冬菇, 及牛展, 水準都唔錯


乳豬燒味併盤($180), 份量十分精緻
鬆化極脆的乳豬皮下, 夾有一小片麵包, 再拌以嫩滑豬肉, 一人一件唔多夠喉呢! 
中間叉燒是理想的三分肥, 不過蜜味逗留面層, 唔得入味, 一般


蟹皇帶子炒鮮奶($200)  
 店內其中一項招牌菜, 成品超嫩超滑, 配以鮮美帶子及蟹黃同吃, 十分美味, 點上少量浙醋, 更起畫龍點晴之妙! 推介!!


由另一邊影, 可見菜式相當足料! 



原來媽咪從未食過釀蟹蓋, 就點了蟹蓋、響螺各一, 讓她試試~


炸釀鮮蟹蓋($75/位), 定價不高, 成品卻大大隻, 抵食非常!!


抵食之下, 當然唔會期望蟹肉成分好高原來, 中間蟹肉摻了大量椰菜絲, 但鮮美的蟹肉同清甜椰菜絲又幾夾, 點上少量香醋都幾好味! 都值得推介~


焗釀鮮響螺($75/位), 又係好大隻螺, 超熱地上檯


響螺內釀以香口的肉末及大量洋蔥粒, 相比下蟹蓋較為吸引


XO醬露筍牛柳條($180)
參考了豪總的食評, 特別要求牛柳炒嫩些, 成品果然令人滿意, 當中爽口的露筍更是令人食個不停!! 


涼瓜炆班頭腩($220)
成品香氣撲鼻, 熱氣上騰, 班頭腩又肉質細嫩, 鮮美入味, 是色香味俱全之作, 連涼瓜都甘甘地易入口! 

 最後再來一客金瑤蛋白瑤芥蘭粒炒飯($130)
炒飯夠鑊氣粒粒分明, 清淡中見香口, 是個很好的收尾, 我同阿B食了唔少!


之後店方送上生日蛋糕, 係個2磅的Tiramisu丫!!好開心, 黎張大合照先~~~ 


來張郭氏一家三口的~~  由玉仔揸大機影的合照... 都唔差喎~


許願中~~~ 其實都不外乎關於家人, BB.....


Tiramisu質感微濕對辦, 芝味適中, 酒味不會太濃, 我同媽咪都鍾意!! 
不過2磅真係太多, 我地食哂了一半打包返去呢~


此外仲有一支免費紅或白餐酒, 又係打包了返屋企~~~

============================================

感謝 甜魔媽媽 提供以上資料

甜魔媽媽的網誌: http://gourmetyan.blogspot.hk/

============================================