輕輕鬆鬆機場遊

23 JULY 2015(THU)

，我終於都可以嚟機場啦~

哈哈哈....我地嚟機場當然唔係去飛(雖然我內深心處係十萬個想)，只係今晚我地要去博覽館睇SHOW，所以早少少入嚟機場，帶小小豬去睇飛機呀！

機場我地之前都有嚟過行，不過就只限係好煩忙嘅T1區，後來經魚子醬媽介紹，原來T2仲多嘢睇，所以今日我地嚟HEA遊機場啦！

入嚟T2第一時間就係一定會去迪士尼店行下，因為依度啲貨物成日都會做特價，好多精品都係$40左右，我緊係嚟睇下有冇得執平嘢啦~

不過今日啲特價貨品都唔係太啱心水，所以都冇入貨，留返下次入迪迪尼先買啦！

下一個目的地竟然係去買SUBWAY~

其實之前小小豬睇電視廣告時見到都已經話想食，不過屋企附近都冇，估唔到入機場就見到，所以就買一件嚟俾隻為食豬試下。

食飽飽有氣力，我地就周圍行下，依兩父子真係冇嘢玩，佢地話係機場一定要推行李車哦，真係唔知好嬲定好笑啦~

之後我地就向今日最主要嘅目的地進發啦~

其實航空探知館及機場展望台都係戲院內，我曾經都有一刻以為自已去錯地方，但係場內見到好多飛機模型、飛機引擎....等等，我應該係冇去錯地方啦~

場內仲有幾個舊飛機擺設，可以坐定定扮乘客呀~

好明顯小小豬對航空探知館興趣不太，不停嘈住要去睇飛機，所以我地就上機場展望台睇飛機啦~

一出升降機門，真係忍唔住嘩左幾聲，因為個VIEW真係勁正呀~

整個展望台真係可以話係一望無際，靚靚地坐係啲石壆位睇飛機升降及靚風景之餘，吹埋啲涼風，成個感覺都勁FREE呀~

場內仲有啲望遠鏡可以免費俾大家用嚟睇飛機呀~

依個小小豬係展望台睇飛機，都不知幾開心呀~

見我影飛機，佢又話要做攝影師~

不過...飛機佢就影唔到，只係影左幾舊雲呀~

唔覺唔覺我地三口子都係依度都坐左差唔多有個半鐘，唔係因為我地要食飯趕入場睇SHOW，我估我地都可以再繼續坐，睇耐啲風景，因為真係勁舒服，好唔捨得走呀！