沙巴之旅 - 第二日 - 神山 (Mountain Kinabalu) - 住宿篇

好辛苦咁"懶"到住嗰度，放好背囊，整理吓d行裝。食咗頭痛藥既我真係好返少少，所以都仲有力氣行返落嚟影吓間屋入面既環境。

入面其實唔係好大，不過都好清楚有一個食飯既地方。跟住真係有門既房。而我哋嗰間，雖然要行一條好斜既木梯，不過入到房，有床，同埋住六個人姐。對比係富士山既元祖屋，真係好好多。

影完相，我都係返入自己嗰窿到瞓。不過6點左右，午睡又唔係，又係陌生環境其實都幾難瞓。不過都要抖抖。聽住音樂，斷斷續續都叫瞓到既，有幾首歌miss 咗咁lor！

不過去到9點左右，開始聽到落雨聲，係好大聲嗰隻，仲有閃電，同埋行雷。我起身望過出窗，真係好大雨。但係咁樣，我反而瞓得好d，成個鐘先醒一次。每次醒 我都望吓幾點。嘩！係咁落，我哋點半都要起身，但係十二點都仲落緊。Carol 有講過，之前睇blog，話大雨上唔到，只係得一個外國人上去。我嗰心完全唸係唔係我哋呢！(估唔到呢個念頭唔止發生係我身上。)

到咗零晨1:30，都仲未覺得周圍好有動靜咁。真係好想放棄，話俾我聽太危險啦！今日不宜上山。但唔知邊個開始起身執嘢先，我聽見覺得係要行，所以都要執嘢！跟住有人開燈啦！

我哋盡量將唔攞上山既嘢留係床度。返落嚟先攞啦！準備晒d嘢，我哋落樓食埋早餐，著好羽絨就起行啦！ 

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/