6點半已經要係酒店食早餐，因為車我哋去神山公園既車會係7點鐘係我哋酒店門口等。7點準時就帶領我哋一行四人上山啦！
差唔多兩個鐘頭車程，望住嗰神山駛去。由平地慢慢駛向千幾米既神山公園入口。去到神山公園入口， 係8點9既時間。落咗車，見到好多背囊友同我哋一樣，準備上山，心情突別興奮同緊張。
與tour guide 見面後，每人獲發神山當日既通行証，就係咁，攞住自已D嘢，帶埋嗰証，又上VAN仔，車到我哋去千八米既地方。真真正正上山既起點啦！
公園入口十足一個監獄咁，簽咗名，過咗嗰鐵閘先入到去。9點半開始起行，一開始既環境十足行大埔滘既情況咁，週圍都係樹，好似入咗森林咁。跟住就慢慢有樓梯斜路咁上斜。
10:07 - 去到第一個休息亭，停低影吓相，行多幾步，就見到寫住一公里既牌。
跟住一路係咁行。今日天色好好，有d曬。所以都算熱，不過可能係二千米高既地方，都未致於熱死。
唔駛半個鐘，又去咗另一個亭。不過我哋都要抖抖！其實雖然行咗唔耐，但真係好攰。因為心跳都幾急，唔知點解，可能上高地啦！而休息既亭，每一個都有水補給，亦有廁所。都算係咁啦！
過咗亭，我哋終於望見前面既神山啦！仲有好高，點行好呢！
10:42 - 行咗1.5M啦！都好似算順利，雖然仍然逢亭必停。
係亭既附近見到田鼠，雖然我有影，但勁驚，因為佢其實好似一隻老鼠多d。而d花草相對無咁特別，我以為定焦鏡影花草可以大派用場，點知要好努力搵一d特別少少既花姐！
11:48 - 我哋終於去到3公里既牌，估唔到行成三個鐘左右，先行咗三公里。仲要成日覺得行得好急，心跳好快添！
雖然以咁既速度覺得應該都覺得可以3點去到3300M，不過原來之後既路係咁難行。
2500M以上開始係雲行地帶，好大霧咁！又唔知係唔係空氣稀薄，真係行得好慢！去到5公里既牌都已經3點！影嗰張相只係勉強有一點笑容。估唔到真係行到想死。
繼續上斜，龜速下往上行，去到5.5公里，都已經3點55分啦！即係成粒鐘先行到半公里，真係撞鬼！
不過已經係過咗3200既高空啦！雲開始已經係腳下。加上今日咁好天，藍天白雲，真係好靚！
係死躝死行之下，終於係4點42分見到我哋食dinner既地方同埋住既地方啦！
我哋首先去咗食嘢嗰度先！唔知係唔係高山反應，或者唸住要盡快嚟呢！我一坐底就好唔舒服。佢哋食嘢，我都只係扒係度瞓。唸住食少少嘢，點知又想嘔。所以最後咩都無食就去返去住嗰邊啦！
都唔明點解住嗰邊仲要行成幾十級樓梯過去，去到攞咗房，可能食咗頭痛藥就好d啦！不過都係6點鐘左右就瞓啦！前所未有！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
