旅行x結婚x蜜月・後記

《旅行x結婚x蜜月》呢個一生人一次大Project終於完結了~ 以後旅行就真係細心遊歷，唔使再煩影婚紗相啦！Wakaka~ 講笑啫，辛苦少少都值得嘅！

其實銀仔係一個既傳統，又想創新的人，對婚禮都好似一般女士們充滿憧憬，就好似這個《旅行x結婚x蜜月》大計一樣。由我跟第一位女朋友開始已成日幻想，當時已確定如自己去honeymoon一定要去夢想嘅「大溪地」。及後第二段感情差一點成事，已計劃好晒，要去南太平洋嘅庫克群島註冊，大溪地honeymoon及紐西蘭旅行... 可惜，婚前恐懼症發作，二人分道揚鑣。來到最後一位幸運兒，終於可以跟我一起實現這天馬行空、夢幻般的婚禮！不過港女，唔知係倒楣還是幸運呢？ 哈哈~

今次海外註冊，發現不甚困難，只需有個dream place，就上網搵當地嘅酒店或婚禮公司即可！不過就唔保證一帆風順，就好像之前講嘅巴哈馬行禮，事前功夫做到足，甚至催返我地轉頭，但行禮時的婚紗相，就等到花兒也謝了。直到6月港女話要喺tripadvisor如實反映，先即時速遞返俾我地，又話退返部份錢。好在婚紗照唔係靠佢用來作主力啫！現在先寄來已經太遲了，錢亦無心情再追，話晒都食咗佢一餐免費包場燭光晚餐... 相片的解像度、畫質強差人意，每張相得1mb左右，分分鐘衰過用手機影。當然香港婚展嘅旅行結婚agency較有保證，就算有問題可以追到佢甩褲嘛，但地點選擇較少，唔通好似個個明星咁走去拉斯維加斯註冊咩！

（港女按：本來行婚展時都有諗過香港幫襯婚攝公司，但覺得好似請人旅行，唔符合銀仔理財之道。當然我有幾位攝影師朋友，佢地亦經常周圍去影非常高質素嘅婚照，所以絕對無意倒佢地米。近日「40萬求婚」成為全城熱話，準新人喺冰島影嗰攝婚紗相同短片，亦令我非常羨慕。不過每當諗起器材、角度、妝扮、找景點一腳踢，跟「完美」、「專業」沾不上邊，但重點是回憶滿載。銀仔不停話：「愈來愈多香港人去冰島影啦，有無人去牙買加影丫？有無人去巴哈馬行禮丫。。。」好啦，俾佢認叻啦！）

親身見證粉紅沙灘，跟網上睇嘅後製圖片有天淵之別

講返旅程，回想剛到埗墨西哥，就諗起幾年前去過南美洲，有一種久違的親切感。於墨西哥城機場亦見識到內地人對衝出世界嘅強烈慾望，係機場見有大量嘅寄倉單車及行李，姓名地址均來自內地。（如中立睇）原來他們的視野，單車遊早已唔止我們香港人眼中的台灣環島遊了！不過亦有人會有負面觀感，他們正在向全世界炫富⋯ 但如果他們不是炫富、財大氣粗，而是循規蹈矩、入鄉隨俗呢？我就會用正面的心態睇，畢竟旅途上我也是喜歡去冷門國度，或非一般的旅遊方式。再者，批評別人之時，亦需自我反省，點樣先算係一個負責任而有修養的旅人，銀仔仍需努力學習！

慶幸能參加亡靈節這個盛大嘉年華

今次去過五個國家，治安惡名昭彰的牙買加算是比較擔心。可能只為去honeymoon嘆世界，未能實際接觸到平民化的一面，總算平安愉快！牙買加海岸景色之美亦是超乎想像，希望未來有機會再去探索呢個國家，品嚐正宗藍山咖啡。

難忘牙買加的避世蜜月

Reggae髮型，係牙買加特色

另外每個旅程都帶給我新的知識，如這旅程後令我開始品嚐咖啡，聽reggae音樂。跟當地人傾談，比睇書更能了解當地文化，如封閉的古巴， 真是「讀萬卷書不如行萬里路」。（港女按：如果我早啲開始學西班牙文就好了，呢個行程完全唔夠用）

行程完結回港後，翻開報紙打開電視，本行程踏足過嘅國家或多或少都有新聞報導。

巴哈馬：落成西半球規模最大的渡假村（但就無報導係中資嘅）

牙買加：好似無，但保特賣跑鞋廣告就係我地經過嘅機場附近取景。

開曼群島：當然係和黃遷冊及TVB《世界零距離》去拍攝啦！

古巴：美國突然同古巴friend返，港女發現當地好多民宿已急不及待於airbnb插旗，之前用的英國訂房網已逐步停止服務。

墨西哥：示威反中資於坎昆興建渡假村，原因相傳係建築商大肆破壞當地生態。

係開曼群島與魔鬼魚同遊，也十分難忘

今個加勒比海之旅，同遇過既人傾談間一講起古巴，不論當地人，歐洲美國人，個個都雙眼發光。佢地大部份都嚟過，有種嚮往大同世界既感覺，估唔到竟然咁多人鍾意共產喎！佢地係局外人享受緊自由，以遊客角度消費懷舊當然happy啦！就正如參觀動物園一樣！佢地個個都話古巴D人好nice，整個國家感覺好正，人民唔貪錢，因為貪埋都買唔到野等等… 我都覺得古巴差不多是世上獨一無二既國家，當然仲有北韓啦！不過，來到古巴後，發現原來自卡斯特羅(Fidel)落台後，由佢細佬(Raul)執政呢段期間，古巴已逐漸放低革命，慢慢對外開放了。大量資本主義有如決堤般湧入，每個人既貪念慾望更如洪水猛獸，以敲詐遊客為目標，滿腦子只有錢呢個字，例如的士司機不停兜搭Chino? Coreano? Japones?…)、商店小販努力叫賣 “Souvenir, souvenir”，馬克思既大同世界亦隨即崩潰瓦解了。我相信之前遇到講到古巴點好點好既人，絕對係開放前來古巴的！ 

雖然古巴街頭上仍有大量古董汽車行駛，也有大量共產主義既壁畫，但人心已變，整個古巴也正在急速巨變中，對旅行者而言吸引力亦大減。老實講我有些少失望，但慶幸仍算趕及尾班車！各位有買就趁手喇喂！這行程後，令我有少少想看碩果僅存既真正共產國家 — 北韓。（港女按：有人話身為遊客，無資格要求古巴繼續古舊貧困，留俾觀光客消費。發展係一件好事，如果能夠令多數人得益，當然樂見其成。差不多全民識字嘅國家，絕對值得擁有更多更好。不過觀乎當地人的生活、對政府嘅意見，同埋美國忽然friend返，背後的意圖為何，我就隱隱覺得不妥，希望係我才疏學淺，庸人自擾吧。）

《旅行x結婚x蜜月》@ 加勒比海(完)