探險家攻略 > 城中探秘 / 旅遊 > 特色景點 / 古蹟 / 廟宇 / 長線旅遊 > 上海。豫園﹑磁浮列車

上海。豫園﹑磁浮列車

由平凡人於 2015-08-17 22:00:00 發表 | 累積瀏覽 517

分類：長線旅遊特色景點廟宇古蹟；地區：中國

< 武漢﹑上海﹑蘇州5天遊 >

第五天（續）

短短既旅行即將完結，而家要由蘇州坐車返上海，夜晚就坐飛機返香港lu；返到上海見有小小時間，繼續係上海行下先


又返到又新又靚既蘇州火車站

裡面又大又靚，同以前小小既蘇州站比差好遠好遠；呢個站係高鐵同普通火車共用，想去上海搭高鐵又得搭慢火車都得，我地時間唔多就緊係坐高鐵啦



等上車啦，唔知係咩車呢？

原來今次係坐當時最新款既CRH380A列車


座位好舒服，當時係道諗：「點解咁快到架！如果可以坐耐啲先落車就好啦！」個一刻有一種唔想落車既感覺，因為舒服到唔想起身

半個多小時車程返到上海，再坐地鐵去到「豫園站」，見朋友未去過豫園就帶大家黎睇睇，雖然話呢道冇咩睇，不過話晒都算係上海必到既地方，咁就黎行行啦



其實冇咩野好睇，純粹到此一遊


好好好多人，都唔知呢道有咩吸引力可以吸引到咁多人黎（自己又係黎左，哈哈）

呢道最出名就係南翔小籠包，應該無時無刻都超多人排隊；以前曾經慕名黎食過覺得冇咩特別，今次就唔排lu，好多地方既小籠包都好食過呢道

最後是但入左間快餐店食小小野就算

又再食到南京燒賣

今次雖然係第三次去上海，但就係第一次由上海坐飛機返香港，順路貪玩坐下磁浮列車；坐地鐵去到「龍陽路站」轉磁浮列車去機場，車費單程50蚊，用一卡通平小小40蚊，即刻去増值先



磁浮列車路軌好特別；因為列車行駛時會升高而唔會接觸到路軌，所以路軌同我地平時見開既好唔同

日間15分鐘一班車，好快就到；部車停車時會成部降低，好有趣


磁浮列車咁先進，估唔到裡面真係好差，座位窄都算，車箱入面好污漕，坐位又有漬，坐得好唔舒服

列車最高速度431km/h，7分幾鐘就可以去到機場；不過唔係所有時間都會行咁快，每日只有兩段時間先會行到呢個速度（我坐個時係冇分，而家先有分速度，想坐就要注意啦）

磁浮列車行車時好似飛機一樣離開地面，係我想像中應該係好靜好舒服，因為冇路軌既摩擦力ma；但係現實呢部車行車時又嘈又震，感覺部車好似就快飛出去咁，有一刻諗過部車會唔會震到散呢！有對頭車經過時突然「砰」一聲，比佢嚇一嚇！坐高鐵咁舒服點解呢部野咁差架！

好快就黎到浦東機場，機場上面一枝枝野感覺怪怪地
今次乘坐春秋航空返香港，機票好平架，只係$199再加稅項，最平係佢啦；因為我係用信用卡買機票，係春秋航空櫃位check in時要另外簽名做信用卡認證（香港﹑上海﹑石家莊都一樣要咁做），如果唔係用自己信用卡買就麻煩啦



上海機delay係家上便飯，今次只係delay小小已經好好


坐車出去上機

好大霧

春秋航空可能冷門小小，佢係中國第一間廉價航空公司，同其他廉航一樣機上好多野都要另外收貴，不過飲野食野價錢唔會好貴，同地面差唔多；仲有春秋航空既國際航線有包15KG行李寄倉，所以香港線有得免費寄倉，真係好（唔知而家仲係唔係呢？）

飛上天後空姐們大部份時間都係機頭機尾唔出來lu；飛機座位同其他廉航一樣都係咁迫，不過只係坐一陣就冇咩所謂啦，而呢部機比之前坐去石家莊個部新好多，上次部勁舊

大約兩個鐘航程就返到香港，一個小旅行話咁快就完lu，明天又要返工啦；今次春天出發仲諗住可以見到好多花花草草，可惜今年天氣比較凍，好多花都遲左開，同盛開既花草樹木無緣...唔緊要啦，今次睇唔到將來總有機會睇到既，哈哈

< 武漢﹑上海﹑蘇州5天遊 >

< 完 >

鐘意SeeWide的分享，給我們一個Like吧！