今朝未7點就起身,
一早往東涌港鐵站出發
唔係360, 唔係入禁區摸蜆, 而係去睇中華白海豚...
因為早到咗成半個鐘頭入到東涌
所以在Haagen Dazs食個早餐先
哥哥咁早起身, 搭個幾鐘頭冇得坐既港鐵又勁轉車都冇扭計
獎佢睇iPad啦!
說好的拉花呢? 說好的木板呢?
點解同張相咁大出入既?
悠悠閒閒食完個早餐之後就番去港鐵站C出口集合
跟住一齊往東涌碼頭出發
呢個就係今次活動既主辦機構負責人「海豚哥哥」
今次活動每位$150
由朝早9:00集合到1:30解散(Official 1:00)
行行吓見到有藍色的士Hysan好興奮
沿住單車徑行上天橋,
大約15分鐘度就行到碼頭
跟住見到塊路牌有個Mickey Mouse Icon!
Hysan又嘈住好想去
佢話好多同學都去過
我就同Hysan講「有好多地方你去過的, 你同學都未去過喎」
跟住佢又開心番!
(其實我已經計劃咗同佢去一次)
上到天橋見到昂坪360纜車
我應承Hysan下次等媽咪得閒就一齊搭一次!
行到嚟海旁,
沿海旁邊的矮牆畫咗好多畫
好靚! I ❤ 東涌 I ❤ 香港
晨咁早已經有好多人喺度釣魚喇
今日天氣咁熱都出嚟釣魚,
真係佩服!
嚟到碼頭啦!
負責人跟義工聚埋開少少會,
我哋就在附近行行走走去吓厠所先
Hysan見到有位大叔喺度釣魚
跟住又嚷著好想試吓釣魚,
我就同佢講釣魚要好有恆心架喎
佢話OK.....
我就肯定佢唔夠5分鐘就話「點解咁耐都未有魚上嚟架!」
負責人召集我哋啦,
先同所有人在碼頭邊影大合照
原來除咗海豚哥哥仲有一個叫做海豚姐姐
海豚姐姐借咗隻大海豚公仔俾Hysan影相
由到碼頭到上船等咗差唔多15-20分鐘
除咗我哋自由報名的朋友之外,
仲有3間來自中小學的部份學生一齊參加
因為人數唔多, 所以船上好多位,
Hysan當然要坐喺船邊啦
海豚哥哥在船頭同所有學生玩遊戲,
講解救生衣點著等指定動作
睇住Hysan的背影,
對任何事都充滿著好奇
心裡真的希望他這份好奇心
可以繼續持守住
到將來大個可以探索更多新鮮事
呢度睇到既填海區域,
係港珠澳大橋的人工島
由於填海工程越填越出
所以海豚哥哥話以前其實在這位置已經可以睇到海豚
依家就...
而呢個就係第三條跑道既填海工程
唉.....
Hysan又走到船尾睇浪
佢又問我點解浪係白色....(有冇人識答? 請留言)
終於有一張正經!
跟住架船再行行吓見到個島,
唔知叫咩名呢?
到哥哥大個D既時侯可以再帶佢去呢D比較辛苦既Trip喇!
在船上差唔多40分鐘了,
在左手邊我哋見到機場tim!
真係好近! 見到D飛機升降好大架
船終於去到一望無際的大海,
成個船程都要一個鐘頭15分鐘
我們都行出去到船頭
當海豚又游走了之後,
我們又要開船去搵
搵到後又停低等待佢游過嚟!
十分需要耐性!
整個過程我哋都睇到接近10條!
佢終於上水面啦
仲跳起呀!!!!
佢哋都唔係接受過專業訓練
係自由自在自己想跳就跳出嚟啦!
仲有陣時會見到佢哋成相成對咁一齊游
呢張係佢向住我正面游過嚟!
海豚哥哥話如果越多灰斑喺個身度
即係話佢越老!
佢話呢隻算係青年中華白海豚
Hysan都睇到攰哂!
去到最尾仲開始問我走得未....
不過佢都勢利架啦
小朋友有咁好耐性算係咁
等吓睇吓, 睇海豚都睇咗成個鐘
你哋睇吓呢D中學生直情出去睇咗一眼跟住就埋位瞓覺,
睇嚟佢哋去睇Big Band會精神D
船沿路回程就用咗接近一個鐘度
番到機場附近仲有好多飛機升降
差唔多每1分鐘就有一班
仲超近!!!!
最後都同海豚哥哥影番張相先
喺船度仲識咗好多朋友
呢張相就係其中一個朋友仔幫我哋影架啦
落咗船之後,
因為今朝真係好早起身,
Hysan都已經超肚餓
我哋去咗M記食Minions個餐!
估唔到個香蕉批真係好好食喎!
杯柚子汽水都超正!
個飽雖然係番炒黑夜漢堡!
但係都OK好食
Photo by CANON 5D Mark III, Len | EF 35mm f/1.4L USM; EF 70-200mm f/2.8L IS II USM
呀劍評語: 相比起在海洋公園訓練好預備好俾你睇的海豚, 在大海觀看中華白海豚來得更自然, 看到他們自由自在, 沒有既定的模式去看, 要自己慢慢深索! 看見海豚喜歡時跳就跳, 不跳就不跳, 十分自在! 且叫小朋友學習到要專心, 若一不留神就會錯過, 讚!!!!
環保生態協會 簡介
『環保生態協會』是一所愛護大自然的非牟利慈善團體(編號91/7434)，協會一直致力推動環保教育為目標，多年來透過舉辦不同活動, 透過給人大自然、環保的知識，叫人有反思，改變人過往的觀念，從而帶出愛護大自然的行為。先改變〝人心〞，人便自然做出正確的行為。達到『因著認識，從而珍惜』！
開放時間
7am - 11pm
費用
$150/ 1位
港鐵 東涌站 C出口 沿天橋向海旁方向到東涌碼頭
網頁
http://www.eco.org.hk/
https://www.facebook.com/eco.org.hk
(以上資料更新至文章當日)
============================================
感謝 呀劍萬帥 提供以上資料
呀劍萬帥的網誌: http://kimfamilytravel.blogspot.hk/
============================================
9
[親子旅遊] 東涌 大澳 環保生態協會 中華白海豚
環保生態協會
JL Cafe.Kitchen
禪修體驗班
6月27日 樂富培訓就業日
青山發電廠- 中電CLP
Party Ideas HK
北潭涌郊遊徑
菠蘿園