0

單車許願遊

vi老篤日記 於 2011-01-18 12:07:52 發表  |  累積瀏覽 683

分類:踩單車 ;地區:大埔
星期日相約11點係大埔火車站等,食埋早餐攪完一輪都成12點先出發!我哋由大埔租車,過咗火車站,去到最遠既7-11,開始入單車路,跟住係會踩去大埔 海濱公園。不過去到某一個位指示鐵路博物館,所以繼續向前踩。其實條路都係單車路好安全,而且沿住太和河踩都幾ok。不過踩踩吓單車路好似同行人路合埋 咗,同埋條路好多行人,開始踩得辛苦,唔可以踩好快!但係過咗大埔市集,開始去到遠少少既民居,就易行好多。

其實係帝欣苑望見前面既樹好靚,所以我哋都停底影咗一輪相。而對面見到既梅樹坑公園都好靚,不過見到條橋過唔到去,所以無再行。

過咗呢棵大樹,我哋就踩一條好窄既行人路去到康樂園啦!其實踩呢條行人路都叫安全,不過就暗斜,所以都幾用力。踩咗一陣,過埋水庫,就去到康樂園位啦!嗰 度有個巴士站,正猶豫之際,有位單車人士就教我哋落隧道。落到去都有兩個出口,向左就係入林村啦!佢仲問我哋仲咩唔去上水食豆花,原來另一條路去上水。幾 好又知多條路。

繼續往前踩,呢段路都係暗斜,到最後係明斜,所以放棄決定推單車,不過林村已在斜對面。今次係我第一次嚟林村,估唔到係踩單車入!

入到去,當然係牌面影張相。同埋影吓棵就死既許願樹。好慘!一棵樹居然可以攪成咁!

影咗d 相後,我哋就入去食嘢先!我食咗嗰碗仔翅,同豆腐花。食完嘢就入去廟同靚靚廁所睇吓!跟住就行出嚟許願。

估唔到許願樹同埋嗰d橙可以假成咁!好似玩具,其實都真係好難頂!我真係唔覺得咁樣會靈lor!

攪完一輪,我哋就走lor!走真係超開心,暗斜路,踩出去,同唔駛踩一樣。不用三分鐘,已經可以去返帝欣苑。

我哋踩到有橋既地方,就過去對面既梅樹坑公園啦!呢度真係好靚!如果係開櫻花就好啦!

入到去公園,居然我哋俾公園d人喝!因為公園範圍不得踩單車!我哋只好推啦!順帶影吓相!都ok!

呢個公園真係好靚,d樹又好靚!估唔到香港有d咁靚既樹!

行多一陣就唔理照踩,好快出公園啦!沿太和河踩,去到某個位見到寫去鐵路博物館,我哋就踩過去!但單車唔可以入,所以只好輪住望吓!衝衝影幾張相就算啦!

跟住踩踩踩,去返大埔海濱公園,沿吐露港踩去大圍。不過我哋今日仲要去小白鷺餐廳食吓嘢先得!原來係吐露港公園第一區有條路轉落去公路底,跟住就可以入到小白鷺啦!我未嚟過呢度,睇戲同埋坐車就見得多啦!

入到去,嘢食都唔平,普通嘢,仲要係下午茶餐。但係位位都要$85。

食完就再去睇咗佢既小黑羊,同埋睇吓嗰湖,再影埋相就走啦!

我哋由返吐露港踩出去大圍。今日可能天氣凍,都唔想踩咁快,踩得快d風食得好應!所以慢踩!踩到6點幾先還車!

今日用咗run keeper 計算住我哋既行程。我哋全程踩咗27.15公里,踩既時間4個鐘頭多d,當然唔計食嘢啦!都幾好啊! 







感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/








鐘意SeeWide的分享,給我們一個Like吧!
  • 攻略日期:N/A
    攻略地點:大埔
  • 攻略時間:N/A
    是次消費:N/A
0人比"掂"

最多能輸入300字

累積瀏覽 209376

全部攻略 323

全部回應 5