家庭樂 - 吉澳、東平洲 - 行山,郊遊

繼年初二超凍去破邊洲，今日都算勁曬下去東平洲。同阿媽阿爸、及其表妹，一行七人參加油麻地既東平洲一日遊。

一早去到大學站已經超多人，點解一架船可以坐咁多人架！其實成架船都係啱啱好夠坐。離開馬料水碼頭。(唔係去過都唔知，原來平日踩單車條路，未到科學園嗰度就係落船，我真係唔知，好流添！) 係坐船其間，領隊都有不停講解，去到印洲塘附近仲介紹咗d怪石。舊石又真係幾似一隻手既！

坐咗超過個半鐘去到吉澳啦！跟團既人，唔知點解最like一窩風，一落船就去買茶菓。當然包括同行既三個師奶 ! 吉澳其實無咩行，舊警署，唔算特別，有間天后廟！原本都好普通，最特別佢介紹咗以前天后廟問口既鬼老門神。佢一講真係覺得嗰門神怪怪！都唔同平時嗰d，原來係以前英國打嚟時，攪爛咗人哋天后廟嗰門神，佢哋整返一個俾人，但係點識畫我哋d咁難既樣啊！所以變到咁怪！不過真係好好笑，所以平日唔影廟宇既我，都破例影一次。

影完天后廟，到佢門前既姻緣樹。其實香港好多島都係咁，碼頭、天后廟、廟前一棵樹，同埋漁排，再加大街既幾間舖頭同埋酒家。問題只係嗰島幾大，條街幾長姐！不過吉澳同我上次去既糧船洲都屬於管制範圍，所以跟團先嚟到！而呢度既居民對外既船隻係駛去沙頭角，真係一個漁村！

睇完，鬼咁早就要食飯。十一點就食飯，總共有成廿八圍！嘩！每圍十人，全團差唔多三百人，痴線！

十二點又上船，終於駛去東平洲啦！不過係駛去東平洲時，途經既海域真係好近咁望見大陸，近距離見到鹽田港啦！跟住遠望到華僑城、小梅沙！估唔到真係近成咁！

一點三終於落船啦！東平洲又係一個地質公園，所以見到d一層層既石，好似馬屎洲咁！不過呢度比馬屎洲大。但係跟團真係唔好啦！無得行晒！佢只係預行一半。所以今次我只係行到去貓眼洞同埋斬頸洲。嗰個貓眼洞唔提，我唸我miss 埋添！而斬勁洲都特別既，無端端分開咗兩邊，而d石又真係一層層咁！

睇完，又繼續行，其實都行咗個幾鐘，即係行咗東平洲既一半，另一半，我相信我要下次再嚟啦！三點三上返船走lu！不過又要個幾鐘，最後差唔多五點落船走啦！眼瞓到震！