攪咗好耐十月一日既活動，最後因為得返五個人，所以係零晨時份決定改行程。由原先游水加BBQ既活動，改為踩單車。
好開心最後冇落雨仲鬼咁好天，踩單車、影相good 極！
雖然約咗十點半係東涌等，不過攪攪吓都成十二點先出發！因為踩過兩次，所以都叫有d印象，唔駛前兩次咁勁搵！不過今日真係好熱，我唸我未試過咁曬，咁熱去踩單車，未出東涌映灣園已經汗流浹背。
![]()
估唔到過埋油站，已經係差唔多開始咗一個鐘。雖然烈日，不過今次見到藍天白雲，仲好清晰見到機場添！影咗幾張相，開始踩踩踩！到搬單車位，停底又影吓嗰湖啦！不過幾時呢度變咗奧運徑呢，莫名其妙！但係呢條路原來係可以行入梅窩，有機會真係要試吓！
![]()
搬完單車過埋黑洞，踩咗一粒鐘，去到竹篙灣啦！今日條路好順，一嚟真係記得d位，二來國慶日，得幾架貨車行過！行馬路都好順，正爆！去到竹篙灣，呢個指定景點，緊係要停低影相啦！影十次都唔嫌，同埋d竹次次都好似唔同，有多有少！
![]()
過咗竹篙灣，好快就係欣澳站，間住踩去馬路，直上神奇道。唔駛半個鐘，就去到迪士尼入口。當然呢度又係另一個重要景點，死都要停低影吓！唔好話我哋，攪到有部私家車都停低影架！影完相再過兩個迴旋處，就入到迪欣湖啦！
今日迪欣湖多人到有d恐怖，有一家大細，有影結婚相。連水上單車都要排隊，勁！圍住湖踩一圈都鬼咁多人。我哋中途都停低咗，食吓嘢，抖吓！
係最後補給完，我哋就踩返出東涌。返出去再踩快咗，不過我仍然最驚過迪士尼兩個迴旋處同埋馬路嗰段。今次仲要俾架不知所謂既貨車勁響按，攪到我哋以為仲咩添！
唔駛個半鐘已經去到過黑洞既地方。太陽仲開始日落，所以我哋仲搵咗嗰位，影吓咸蛋黃。不過真係落得好快，影影吓，已經見唔到樣，要閃光燈補lu。果然要捕足日落既時間係好短暫。
踩到七點既時間就還車，今次足足踩咗7粒鐘。勁！跟住係東涌行咗陣就食嘢，成個人散晒！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
迪欣湖活動中心
釜山水族館
Thormork 冰島高地
六義園(東京)
中環街市
鴻運單車行61
珠璣巷
數碼廣場