遊世博真係超攰，第三日完全唔知醒起身，居然瞓到10點鐘。攪完一輪食埋嘢，去到田子坊已經係12點半。
![]()
田
子坊門口有個牌坊，不過撞啱有旅行團，好難影張無人既相。向前行幾間舖頭d
陶瓷公仔都幾特別。跟住又行咗去陳逸飛工作室。而佢對面間舖頭更加令我唔見幾百蚊。我買咗件中式衫、頸鍊及手鍊。再向前行都係一間間舖頭仔。都買d現代得
嚟又有傳統氣息既嘢！而街兩邊都係一d好舊既樓，仲有好多有人住。不過係正街嗰d，就多數改為舖頭同埋餐廳。不過我唔知點解唸起永利街呢！有d
9唔搭8。
一路行吓d細街，突然開始落雨，雖然唔算好大，不過有d麻煩。但係咁樣影條街又好唔同。可能感覺潔淨咗！
行咗兩個鐘之後離開。搭地鐵去到海倫路站。一出站又見到三腳車，所以唔搵等佢車我去。正啦！唔駛行，又唔駛搵就去到，都係俾$5。去到見到呢座舊Building 真係好靚，幾結實。無唸過佢以前係一個屠場。不過入到去就真係有d陰森，因為有d位真係好黑。
講
咗咁耐呢度係叫1933老場坊，佢以前係一個屠場，但係而家已經變為創意工業之地。入面有餐廳，有設計公司同埋一d商店。我哋去嗰日係假期，仲有一個市
集，好似藝墟咁，d嘢都ok，不過無唔見錢。除此之外可能佢設計特別，都有好多人帶齊相機嚟影相，所以我都好like呢度！覺得冇去錯。只係自己影相水準
未夠高，係背光既環境下，齋影景還可以，但影人就好黑啦！而佢附近都有一d舊居，d屋真係幾殘吓，不過都係攝影既好題材。而呢度最重要有American
Apparel 既旗艦店。不過好可惜去嗰時唔知點解無開。
離開呢度我哋就搭的士落新天地。呢度都超商業化吓，雖然樓仍是舊建築，不過感覺似係步行街多d。我哋唸住係度食晚飯，但係都唔知揀咩好，無理由去zen，所以最後都係去咗香港有既新吉士。不過感覺價錢同香港都係一樣，兩個人食咗三百幾蚊，香港都得啦！唸起都貴！
食完又要趕去世博啦！因為夜晚入去感覺唔駛排咁耐，所以最後博殺。
我
哋今日由中國館嗰邊入口入，只係見到好多人走，但係冇人入。我哋一嚟去返噚日未入既其中一個主題館 -
城市人館。呢度講五個國家既其中一個家庭，他們的不同生活。圍繞住、工作、溝通、環境...
佢入面用咗好似牛奶盒代表屋，而一開始既通道又似用運汽水既膠箱砌成。又有d好似紙皮屋既物體。最後一個藏書閣最記得，因為唔係畫嚟，d書係真，攞出嚟雖
然無重量，因為得嗰皮同埋體積，但係感覺好壯觀。
離開咗之後，嘗試行去世博文化中心，睇吓有冇得上去，點知都係唔得！又要行返出嚟都攪到攰晒！所以又俾咗$10，搭環保車去到英國館。去到只見英國、意大利仍排好多人，所以我哋去咗盧森堡。
盧森堡嗰館真係唔算特別，不過佢入館內會見到兩個盔甲。睇完又會行山戶外，一出去除咗十居其九會差錯腳，跟住就會聞到花香，因為右邊牆種滿花。
![]()
行完呢度，又去咗隔離既荷蘭館，一路上斜，一間間屋都放咗唔同既荷蘭特產，有miffy、傢俬、太陽能車、牛.... 最攪笑有更屋係攪緊私人party，因為睇緊波，應該係荷蘭隊出場。咁啱行到嗰個位，入面大叫，我相信係入咗波，嚇一嚇！
睇
完就去咗對面既意大利館，因為係關門前最後一批入，所以睇每一樣嘢都勁趕。包括古董車、建築、法拉利、高踭鞋。到上樓上，首先會見到好細既大衛像。十萬人
影，完全埋唔到身影咁！跟住去到投射幕牆，佢只係一片玻璃，但係影出嚟既人好真。睇完就已經無嘢要走。所以企咗邊邊，影吓場內既靚衫同埋另一邊既弦樂團。
而賣嘢區已經不能入lu。就係咁走馬看花睇完咗意大利館。呢個館日頭都要排三粒鐘，真係唔值。
睇完已經十點三啦，d館已經關門lu，咁啱呢度好近碼頭，我哋就搭船去浦西嗰邊走啦！搭船時不停望住盧浦大橋，佢七彩時真係好靚。而望去世博文化中心同埋世博軸都好唔錯。我最叻就係試晒所有連接浦東浦西會場既交通工具。
離開時，再一次嘗試搵巴士搭，都有去我哋酒店嗰頭，又可以望吓四周既街景。今日係最早返酒店，差唔多十二點就返到。不過仍係嗰句，超攰！成身散晒！
