行山 - 高流灣, 蚺蛇灣, 蚺蛇坳, 赤徑

今日約咗舊同事勁早出發行山。食早餐既朋友就約咗8:30係西貢食。我呢d係屋企食埋既呢，就9點係西貢碼頭等。不過係我勁驚遲到同埋好想試吓間金山粥店 既炸兩，所以我都早咗入，大約8:50搵到間粥店，佢d炸兩真係好大，係成條打孖既油炸鬼包住腸粉食，所以佢哋話好大碟，分咗半碟俾我都夠。
齊晒人之後，我哋就出發係西貢碼頭搭94號去黃石碼頭。阿飯同carol病咗，所以最後係7個人行。不過係6男1女，我都未試過，哈哈，可以受保護吓先！
今 次目的要行蚺蛇尖，不過唔想原路來回，所以睇過吓website，就由高流灣出發。去高流灣，要搭船。跟據媽咪講，去到黃石碼頭會有船家問你架嗱，唔駛一 定搭街渡。果然有人問，所以我哋唔等，每人都係俾多6蚊，20蚊坐快艇過去。坐既船同係馬屎州出大尾督嗰次一樣。今次坐得前，都幾食風，幾凍吓。唔駛10 分鐘就去到，當時都係10點鐘，都幾早。高流灣有個碼頭，入到去就見到有嗰牌寫住去蛋家灣。

跟住我哋就一路沿大路行，過埋d廢屋，就開始上山。跟住一路沿大路行。中間見到有條分叉路，不過應該唔啱。(後來知呢條路係入去嗰d青年中心。)

所以我哋繼續行，跟住上山見到我哋落船既地方，跟住好快又落山，不過開始發覺有d唔對路，果然行到落去原來係得一個碼頭。

所以我哋又折返，仲不停係度唸到底邊度有分叉路，除咗紅白桿嗰邊，無啦！所以最可疑係蛋家灣。可能因為有牛同埋廁所嗰位，分散咗我哋既注意力。一路行返出去，不過中間居然發現嗰牌，寫住去赤徑，所以我哋就直上啦！

點知一路行d草叢，條路都唔清晰。行咗一陣，開始覺得好唔對路，所以我哋又折返。出返去大路。

所以都係覺得最可疑係嗰隻牛嗰位。出返去之後，果然再睇吓d介紹同埋觀察，果然發現有條山路。(呢個時候都11:45，我哋攪咗個幾鐘都未搵到條路添！) 於是就上山行，行咗無耐就見到蚺蛇尖係我哋前面，呢條路應該啱啦！雖然呢度都睇到有條路，不過沙石好多，但尚算ok。

其實呢條山路完全係沿水管走，不過都ok，行到。同埋行山木棍真係好重要。一路再行就見到一個好靚既海灣。係呢個位超涼，好舒服，亦都好靚。

再繼續行，就見到有另一個灣，呢個灣仲靚，因為望到d水好清，海藻都見到，但係嗰沙灘就完全冇人！得3隻牛。(後來睇返，原來呢個就係蚺蛇灣。)

我哋繼續一路行水管路，跟住轉咗去山後面，見唔到水，望到對面山 - 蚺蛇尖，不過開始發覺唔知點行啦！(難行既程度，連我部相機都要收埋，不時要用手幫忙，又或者用支棍平行。所以冇晒到相，可以証明我哋條路幾辛苦添。)
又行咗一d好險要既水管路之後，決定行返轉頭，跟返一條落山既水管去。係不斷探索之後，終於經過山澗過咗對面山啦！
過咗之後，大家繼續行，見到有個牌，但係上面寫住「水務署所舖設的水管路線，並非遠足路徑，為免產生危險或意外，請勿前進。」不過我哋唔係前進，我哋係由嗰牌後面行上嚟，無d水管道，我哋我哋被困啦！危險咗成日啦！嚟到呢度係1:34分，我哋仲未搵到條路上山添。

行 行吓又出現分叉路，右邊好明顯有條路，不過我哋行行吓有話好唔似轉返行另一條。因為另一邊有人係d葉捆咗絲帶。不過呢條路係沿溪澗上，所以要不停按住d樹 木，或者地下大石爬上山。仲要俾d樹枝界手添！不過就見到嗰好靚既泉。(我唸我呢世都唔會再去。) 越上越唔對路，同埋一路跟d水行，係會超危險，所以我哋又回頭。不過回頭既路真係唔易，明白咩叫上山容易，落山難。手腳並用都唔掂。

去 返分叉路，由另一條路向上行，地下又有水管。於是好努力又向上爬。前前後後行咗成粒鐘，終於上返一條人行既路，不過係三叉口。但係呢個三叉口位，就已經望 到蚺蛇尖啦！不過已經三點，再加上體力未必可以負荷到，所以留返下次啦！咁另外兩條路，一條又係好似行入森林咁，但係就應該係落去大浪灣，另一條就唔知去 邊。好在就係咁啱見到有四個人係蚺蛇尖行落嚟。問佢哋先知原來嗰條路係出赤徑，所以死跟。(後來睇返，先知我哋企緊既三叉位就係蚺蛇坳。)

行返出赤徑條路唔算難行，由山上落返去，就見到有牌寫住係鹹田灣，或者係北潭凹。我記得呢條路上次由西灣亭去赤徑有行過。以前呢度冇寫話行上去係蚺蛇尖。

我哋於是向北潭凹去。由蚺蛇坳去到赤徑大約用咗1粒鐘。赤徑停一停之後，就行返出北潭凹！跟住出返西貢市。全日行咗差唔多七粒鐘。

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/