香港羽毛球公開賽

 星期五又要好準時放工，唔係因為返學，係要趕住落伊館睇羽毛球比賽。6點半就開始，又係6點放工即走都趕唔切。已經要飛的落去，但係星期五落銅鑼灣條路勁 塞，所以6點9先去到。今日呢場係爭入4強，同舊年睇4強爭入總決賽好唔同。首先有兩個場，兩邊都進行緊比賽。比賽緊亦都可以入場，同埋兩側d位冇人買。 今次我都係坐中間，兩邊都要望吓，攪到好攰，要兩邊都兼顧。
因為遲咗入都開始咗，一開始係左邊混雙，右邊就係女雙，我記得女雙中華臺北輸咗！混雙係好似中國對馬來西亞。其實因為兩邊場，再加上都係有女雙、男雙、混雙、女子單打同埋男子單打，所以即係前後睇咗十場，真係唔多記得邊隊對邊隊。
去 到男子單打，林丹同埋陳金都唔打，對男子單打都係有d失望。仲要一嚟係丹麥，點樣都覺得外國人打羽毛球差d。點知對嗰個印尼"靚"仔，佢好似完全投入唔到 咁，所以兩盤就輸咗俾丹麥lu。跟住仲有場男子單打係香港既陳仁杰對日本，日本仔一嚟好燥，仲好快就打斷咗兩塊拍。不過佢跟住打得好穩陣，係佢冇咩犯錯 下，而陳仁杰經常打出界下，咁既情況下贏咗入決賽。不過陳仁杰始終代表香港，所以其實有好多人叫加油，大聲支持。
而仲有一場混雙係英國對波蘭，兩邊鬼佬對壘，真係令我好唔想睇，所以真係冇咩點望，加上一出場，周圍d人已經講，嗰英國佬成日飲啤酒啊，打波佢肚腩都咁大，更加唔會睇啦！
跟住有女單表演，中國對中國，第一次睇王儀涵，原來咁細個，不過真係好勁。但係左邊係男雙比賽，d球來球往超快，所以完全吸引咗。第一場男雙係新加坡對丹麥，第二場係馬來西亞自己打自己。第二場再好睇d。超快，正！
睇咗咁多場，最後十點鐘先完，所以跟住先有飯食，不過俾$200睇咗咁耐，咩都底啦！
星期日再會睇總決賽，希望有更精彩既表演。