Cycling - 南生圍

由 vi老篤日記於 2009-02-24 17:59:25 發表 | 累積瀏覽 555

分類：踩單車；地區：元朗

星期日又係郊遊既時間，今次係去南生圍。因為夜晚有飯局，所以約早d出嚟。我哋約咗十一點係元朗西鐵站等，我哋去到i.shop指示既地方，但係發覺冇單車租，跟住問吓d街坊，終於搵到單車舖。當試好車攪掂晒已經係十二點。由單車舖出發，我哋要一路問人去到博愛醫院，跟住就有一條小路入咗條小村，但係入咗村唔對路，有五隻野狗，我哋跟住掉頭，原來行錯路，踩返出去，有條車路，所以沿車路行，呢條已經係南生圍路。雖然條路唔算好多車，不過一開始有d旅遊巴迎面行，過咗幾架之後都ok，只係間中後面有d車行，單程路咁有d煩。

條車路右手邊係一條河，原來呢條就係錦田河，我哋停底睇咗一陣，因為都有d雀鳥係度，同埋有介紹係咩雀。都有d攝影愛好者係度影相架，不過我就唔多影到！

跟住我哋再一路踩，天氣出奇地好，仲好勁太陽添！帽啊、太陽鏡啊、防曬啊都冇準備。所以係呢條路踩都幾應。踩咗一個鐘鬆d，過咗錦田河，去到三貝河，終於見到係大草園既地方。草園冇我想像中咁大，不過都好ok，同埋有人係度拍緊廣告。過咗大草園就到咗兩旁樹既景。呢度都幾似韓國既南怡島，不過d樹少d同埋條路冇咁長，但係香港嚟講都算美景。仲有人係度影婚紗相。

過咗呢度就去咗有間廢屋既地方，呢度好多人，好似有d攝影團係度影相咁。再踩多一陣就有條臭湖，不過呢度都係拍攝場地，有條木做既路，似小碼頭，真係唔識形容。不過肯定真係有好多劇集係度拍過。(搵返張相啦!)

踩多唔係好耐，就見到有士多既物體，又係食餐蛋麵既時候。我哋補充完體力就見到游水渡既牌，推單車過去，見到兩岸都好多人。我哋要等咗幾轉先得，同埋6個人6架單車唔可以一次過添。

過埋河，已經出返三貝村，踩多一陣就去到朗屏站。嗰時太約三點鐘，所以我哋決定唔還車住，繼續踩去天水圍，我哋一路踩一路問，都唔駛半個鐘就見到天水圍，跟住我哋都係繼續問人，因為我哋想踩過去濕地公園。原來都係一條直路，不過有d係單車路，有d係石屎路。d單車路真係超好踩，順到爆！差唔多四點我哋就到濕地公園。

我哋都有踩架單車入去，但係我哋只係上嗰小草皮，望吓嗰公園就算。因為俾錢入場有d無聊。我哋小休咗一陣，同埋影吓相，就沿路出返朗屏。再係朗屏沿西鐵路軌去返元朗，五點鐘去返單車店，完成今日踩五個鐘之旅。

即刻爭取時間返屋企沖涼，當換好衫，著返一件黑色衫時，先發覺自己對手咁紅。真係唔掂。去到荃灣，等齊人，大約七點九就上去Karen屋企。傾傾吓，食少少嘢，不知不覺就坐咗成粒鐘。跟住我哋4個離開karen屋企，就去食飯。係呢一刻我feel到自己好攰，有d呆呆地。太約十點幾左右，我哋就離開返屋企，正式完成星期日既活動。

感謝 vi老篤日記提供以上資料

vi老篤日記的個人網誌: http://vivi-1212.blogspot.hk/